ރައީސް ޞާލިހަކީ އެމްޑީޕީއަށް ޗޮއިސްއެއް ނޫން: ވައްޑޭ

ކޯލިޝަން ނުހިފެހެއްޓެވުނު ތަނުގައި އެމްޑީޕީވެސް އެކުވެރިކޮށް ބަދަހިކޮށް ނުހިފެހެއްޓެވުނު ކަމަށާއި ރައީސް އިބްރާހިމް މުހައްމަދު ޞާލިހަކީ އެމްޑީޕީއަށް ޗޮއިސްއެއް ނޫންކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ފާޑުވިދާޅުވެ ވައްޑޭ ކުރެއްވި ޓްވީޓުގައި ވިދާޅުވީ ޕާޓީ އޮފީހަކަށް ވަދެނުލެވުނު ކަމަށާއި ގައުމީ މަޖިލިސް ޖަލްސާއެއްގައި ބައިވެރިވެ ނުލެއްވުނުކަމަށެވެ.
"ކޯލިޝަން ނުހިފެހެއްޓެވުނު ތަނުގައި އެމްޑީޕީވެސް އެކުވެރިކޮށް ބަދަހިކޮށް ނުހިފެހެއްޓެވުނު. ޕާޓީ އޮފީހަކަށް ވަދެނުލެވުނު. ގައުމީ މަޖިލިސް ޖަލްސާއެއްގައި ބައިވެރިވެ ނުލެއްވުނު. އެމްޑީޕީ އާއްމު މެމްބަރުން ވިއްސިވިހާލިވާން ދޫކޮށްލެއްވީ. ރައީސް ޞާލިހަކީ އެމްޑީޕީއަށް ޗޮއިސްއެއް ނޫން." ވައްޑޭ ވިދާޅުވިއެވެ.
އެމްޑީޕީގެ ތެރޭގައި ބައިބައިވުން އުފެދި ރައީސް ނަޝީދަށް ތާއިދު ކުރައްވާ ފަރާތްތަކުން ދަނީ ރައީސް އިބްރާހިމް މުހައްމަދު ޞާލިހަށް ތާއިދު ނުކުރަން ނިންމާފައެވެ. އެމްޑީޕީ ނަޝީދު ފެކްޝަނުން ގެންދަނީ ޖުމްހޫރީ ޕާޓީއާއެކު މަޝްވަރާ ބައްދަލުވުންތައް ބާއްވަމުންކަންވެސް ފާހަގަކޮށްލެވެއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.