ރައީސްއަށް ތާއިދު ކުރައްވާކަން ޑރ. މައުސޫމް ހާމަކުރައްވައިފި
ޖުމްހޫރީ ޕާޓީ (ޖޭޕީ)ގެ ސްލޮޓެއްގައި ޓޫރިޒަމް މިނިސްޓަރުގެ މަގާމަށް އައްޔަން ކުރައްވާފައިވާ ޑރ. އަބްދުﷲ މައުސޫމްވެސް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ތާއިދުކުރައްވާކަން ހާމަކުރައްވައިފިއެވެ.
ޑރ. މައުސޫމް މިރޭ ކުރެއްވި ޓްވީޓެއްގައި ވިދާޅުވީ އަންނަ ރިޔާސީ އިންތިހާބުގައި އޭނާ އެންޑޯސް ކުރައްވާނީ ރައީސް އިބްރާހިމް މުހައްމަދު ޞާލިހުކަމަށެވެ.
"ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ދެވަނަ ދައުރެއް ލިބުމަކީ ރާއްޖެއާއި ރާއްޖޭގެ ރައްޔިތުންނަށް، އަދި ކިޔެއްތަ މުޅި ދިވެހި ދައުލަތައް އެންމެ ފައިދާ ބޮޑުގޮތްކަމަށް އަހުރެންނަށް ވިސްނުނު ހިނދު، ރައީސް އިބޫއަށް އެއްވެސް ޝަރުތަކާއި ނުލައި ތާއިދުކޮށް ބައިއަތުހިފާ މިކަން އެންމެ ކަތުންނަށް އަންގާލުމަށް މިފޮޓޯއާއެކު މިވާހަކަ ހިއްސާ ކުރީމެވެ" ރައީސުލްޖުމްހޫރިއްޔާ އާއެކު ހުންނެވި ފޮޓޯއަކާއިއެކު ކުރެއްވި ޓްވީޓުގައި ވިދާޅުވިއެވެ.
އެހެންނަމަވެސް އޭނާ ޖުމްހޫރީ ޕާޓީން ވަކިވިކަން ނުވަތަ ނޫންކަން ހާމަކޮށްފައެއް ނުވެއެވެ.
ޖުމްހޫރީ ޕާޓީގެ ސްލޮޓުތަކުގައި ސަރުކާރުގެ އިސް މަގާމުތަކުގައި ތިބި ބައެއް ބޭފުޅުން ރައީސް އިބްރާހިމް މުހައްމަދު ޞާލިހަށް ތާއިދުކޮށް ޖުމްހޫރީ ޕާޓީގެ މަގާމުތަކުން ވަނީ އިސްތިއުފާ ދީފައެވެ. މިގޮތުން އެމްޓީސީސީގެ ސީއީއޯ އާދަމް އާޒިމާއި އެމްޑަބުލިއުއެސްސީގެ އެމްޑީ ހަސަން ޝާހް އަދި ހަޔަރ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އާމިނަތު މުޙައްމަދު ސަލީމް (ސޯނީ) ވެސް ވަނީ ޖޭޕީއިން ވަކިވެފައެވެ.
