ދެވަނަ ދައުރަކަށް ހޮވިއްޖެ ނަމަ ފުނަދޫގައި 50 އެނދުގެ އާ ހޮސްޕިޓަލެއް އިމާރާތް ކުރާނަން: ރައީސް ޞާލިޙް

ދެވަނަ ދައުރަކަށް އިންތިހާބުވެ ވަޑައިގެންފި ނަމަ، 50 އެނދުގެ އާ ހޮސްޕިޓަލެއް އިމާރާތްކޮށް ދެއްވާނެ ކަމަށް، ރައީސް އިބްރާހީމް މުހައްމަދު ޞާލިޙް ވައުދުވެވަޑައިގެންފިއެވެ.

Ads by Sosun Fihaara

ރިޔާސީ އިންތިހާބުގެ ކެމްޕޭނުގައި ފުނަދުއަށް ވަޑައިގެން ބޭއްވި ބައްދަލުކުރެއްވުމުގައި ރައީސް ޞާލިޙް ވިދާޅުވީ މަސްވެރިންނަށް ބޭނުންވާ އައިސް, ހެޔޮ އަގުގައި ރަށުން ލިބޭ ގޮތަށް އެ ރަށުގައި އައިސްޕްލާންޓެއް އަޅައިދެއްވާނެ ކަމަށާއި ސްކުލަށް އިތުރަށް ބޭނުންވާ ކުލާސް ރޫމްތައް އިތުރުކޮށްދީ, 50 އެނދުގެ އާ ހޮސްޕިޓަލެއް އަޅައިދެއްވާނެ ކަމަށެވެ.

ރައީސް ވިދާޅުވީ ރައީސް ވިދާޅުވީ، ފުނަދޫ ހިމެނޭހެން ބޮޑުތިލަދުންމަތި ސަރަހައްދުގެ ރަށްރަށުގައި ހޮސްޕިޓަލްތައް އިމާރާތްކުރެވި، ހަނިމާދޫ އެއާޕޯޓު އިންޓަނޭޝަނަލް ކުރެވި، އާރުޓީއެލް ފެރީގެ ހިދުމަތުން މުޅި ސަރަހައްދު ގުޅާލެވިފައިވާ ކަމަށެވެ.

އަދި ކުރިއަށް އޮތް ފަސް އަހަރަށް އިންތިހާބުވެ ވަޑައިގެންފި ނަމަ ފުނަދޫގެ ހުރިހާ މަގެއްގައި ތާރު އަޅައި ނިންމައި އެ ރަށު ފަޅުގައި އޮންނަ ފަރުކޮޅުން އާންމުންނަށް އާމްދަނީ ލިބޭނެ ގޮތެއް ހަދައިދެއްވާނެ ކަމަށް ވިދާޅުވިއެވެ.

މީގެ އިތުރުން ރަށުގެ ބޯހިޔާވަހިކަމަށް ފްލެޓާއި ރޯ ހައުސް ވެސް އެޅައިދެއްވާނެ ކަމަށް ރައީސް ވިދާޅުވިއެވެ.

ޔާމީންގެ ވެރިކަމަށް އިޝާރާތް ކުރައްވައި ރައީސް ވިދާޅުވީ, އެ ވެރިކަމުގައި ޕީއެސްއައިޕީގެ މަޝްރޫއުތަކަށް ހަރަދުކުރީ 22 ބިލިއަން ރުފިޔާ ކަމަށާއި ނަމަވެސް މި ސަރުކާރުން މިހާތަނަށް ޕީއެސްއައިޕީ މަޝްރޫއުތަކަށް 32 ބިލިއަން ރުފިޔާ ހަރަދުކޮށްފައިވާ ކަމަށެވެ.