ތިލަމާލެ ބްރިޖު މަޝްރޫޢު ކުރިއަށްދާ ގޮތް ރައީސް ބައްލަވައިލައްވައިފި

ތިލަމާލެ ބްރިޖުގެ މަސައްކަތް ހިނގާ ސަރަޙައްދަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޒިޔާރަތް ކުރައްވައިފިއެވެ.
މި ޒިޔާރަތުގައި އެމަނިކުފާނުގެ އަރިހުގައި ސަރުކާރުގެ އިސްވެރިން ބައިވެރިވެވަޑައިގެންނެވިއެވެ. ބްރިޖުގެ މަސައްކަތް އަވަސް ކުރުމަކީ ރައީސް މުޢިއްޒުގެ ސަރުކާރުން އިސްކަން ދެއްވާނެ ކަމެއް ކަމަށް އެމަނިކުފާނު ކުރިން ވިދާޅުވެވަފައިވެއެވެ. ރައީސް އޮފީހުގެ އަންޑަރ ސެކްރެޓަރީ ފޮރ ޕަބްލިކް ޕޮލިސީ، މުޙައްމަދު ފިރުޒުލް ޢަބްދުލްޚަލީލް ވިދާޅުވީ، ރައީސް އިބްރާހީމް މުޙައްމަދު ޞާލިޙުގެ ސަރުކާރަށް ނިންމުނީ ބްރިޖުގެ 27 އިންސައްތަ މަސައްކަތް ކަމަށެވެ. އަދި އައު ސަރުކާރުން އެންމެ ފުރަތަމަ ބަލާނީ މަޝްރޫޢު ލަސްވި ސަބަބުތައް ކަމަށާއި، އެއީ ސަރުކާރުގެ ފުރަތަމަ 14 ހަފްތާގެ ޕްލޭންގައި ހިމެނޭ ކަމެއް ކަމަށް ވެސް އޭނާ ވިދާޅުވިއެވެ. ކުރީ ސަރުކާރުން ހާމަކޮށްފައިވާ ގޮތުގައި، ބްރިޖުގެ މަޝްރޫޢު ކުރިއަށް ގެންދިޔުމަށް 200އެއްހައި ތަނބު ބޭނުންވާއިރު، 80 ވަރަކަށް ތަނބުގެ މަސައްކަތް ވަނީ ނިންމައިލެވިފައެވެ. އަދި ޕައިލްތަކެއް ނިމުމުން، ޕައިލް ކެޕިން މަސައްކަތް ނިންމައި، ތަނބުތަކާއި ސްޓްރަކްޗަރ އަޅަން ފަށާނެކަން އޭރު ވަނީ ހާމަކޮށްފައެވެ.ބުރިޖުގެ މަސައްކަތާ އިންޑިއާގެ އެފްކޮންސްއިން ހަވާލުވީ 2021 ވަނަ އަހަރު އޯގަސްޓު މަހުގެ ތެރޭގައެވެ. މި މަޝްރޫއު ކުރިއަށްގެންދަނީ އިންޑިއާގެ އެގްޒިމް ބޭންކުން ދޭ 400 މިލިއަން ޑޮލަރުގެ ލޯނު އެހީގެ ދަށުންނެވެ.
މީގެ ކުރިން، ކުރީގެ ރައީސް އިބްރާހިމް މުޙައްމަދު ޞާލިހު ބޭއްވެވި އެންމެ ފަހު ނޫސްވެރިންގެ ބައްދަލުވުމުގައި އެ މަނިކުފާނު ވަނީ ތިލަމާލެ ބްރިޖުގެ މަސައްކަތް އެންމެ ބޭނުންވި ދުވެލީގައި ކުރިއަށް ނުގެންދެވުނުކަމަށް ވިދާޅުވެފައެވެ.
އަދި އެ މަސައްކަތް އަވަސް ދުވެލީގައި ކުރިއަށް ދިޔަނަމަ މި އަހަރުގެ ރިޔާސީ އިންތިޚާބުގެ ވޯޓުން ރަނގަޅު ނަތީޖާއެއް ލިބުނީސްކަމަށް އެ މަނިކުފާނު ވިދާޅުވެފައިވެއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.