ނޫރައިން އިސްތިއުފާ ދެއްވި ސަބަބެއް އަދިވެސް ނޭނގޭ، އިސްތިއުފާ ގަބޫލުކޮށްފި
އެމްއެމްޕީއާރްސީގެ ޗެއަރޕާސަން އާއިޝާ ނޫރައިން ޖަނާހު މަޤާމުން އިސްތިއުފާ ދެއްވުމާއިއެކު، އިސްތިއުފާ ގަބޫލުކޮށް ޕީސީބީން އޭނާ ވަކިކޮށްފި އެވެ.
އެކަމާ ގުޅޭގޮތުން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ބުނީ، ނޫރައިންގެ އިސްތިއުފާގެ ސިޓީ 21 މެއި 2024 ގައި ލިބިފައިވާ ކަމަށެވެ. އެހެންކަމުން އިސްތިއުފާ ޤަބޫލުކޮށް، އެ މަޤާމުން އޭނާ ވަކިކޮށްފައިވާކަމަށް ވެސް ޕީސީބީން ބުނެފައިވެ އެވެ.
ނޫރައިން އެ މަގާމުން އިސްތިއުފާ ދެއްވި ސަބަބެއް އަދި ސާފެއް ނުވެ އެވެ. ނޫރައިން އެމްއެމްޕީއާރުސީގެ ޗެއާޕާސަން ކަމުން އިސްތިއުފާ ދެއްވާފައި ވަނީ ދުބާއީގައި މި މަހު ކުރީކޮޅު އޮތް އަރަބިއަން ޓްރެވެލް މާކެޓް (އޭޓީއެމް) ފެއާގައި އިނގިރޭސީ ބަހުން ދެއްވި އިންޓަވިއުއަކާ ގުޅިގެން އާންމުންގެ މެދުގައި މަގުބޫލުކަން ހޯދާފައިވާ ދަނޑިވަޅެއްގަ އެވެ.
ނަމަވެސް އޭގެ ފަހުން އެ ކުންފުނިން ބައިވެރިވާ ބޭރުގެ ހަރަކާތްތަކުގައި ނޫރައިން ބައިވެރިނުކުރަން ޓޫރިޒަމް މިނިސްޓަރު އިބްރާހީމް ފައިސަލް އެންގެވި ކަމަށް ބުނެ މީޑިއާއަކުން ވަނީ ރިޕޯޓްކޮށްފަ އެވެ. އެކަން މިނިސްޓަރ ފައިސަލް ދޮގުކުރެއްވި ނަމަވެސް އާންމުންގެ ފާޑުކިޔުން އަމާޒުވި އެވެ.
ނޫރައިންގެ އިސްތިއުފާއާއި ގުޅިގެން ތަފާތު އެކި ވާހަކަތައް ސޯޝަލް މީޑިއާގައި ދަނީ ދެކެވެމުންނެވެ. އެހެންނަމަވެސް ރަސްމީ ސިފައެއްގައި ނޫރައިން އިސްތިއުފާ ދެއްވި ސަބަބެއް އަދި ހާމައެއް ނުވެ އެވެ.
ނޫރައިން އެމްއެމްޕީއާރުސީގެ ޗެއާޕާސަންގެ މަގާމަށް އައްޔަން ކުރެއްވީ ޑިސެމްބަރު 27، 2023 ގައެވެ.
Ads by STO
