މީޑިއާ ކައުންސިލުން ނޫސްވެރިންގެ އަސާސީ ޕްރޮގްރާމެއް ހިންގަނީ
ނޫސްވެރިކަމުގެ ދާއިރާއަށް އަލަށް ވަންނަ ފަރާތްތަކަށް "ނޫސްވެރިކަމުގެ އަސާސީ ޕްރޮގްރާމް" ގެ ނަމުގައި ޕްރޮގްރާމެއް ހިންގަން މޯލްޑިވްސް މީޑިއާ ކައުންސިލުން ނިންމައިފި އެވެ.
މޯލްޑިވްސް މީޑިއާ ކައުންސިލުން ކުރި އިއުލާނެއްގައި ބުނެފައިވަނީ ނޫސްވެރިކަމުގެ ދާއިރާއަށް ނުކުންނަ އާ ކުދިންނަށް މިކޯސް ހިންގޭނީ އޮންލައިން ކޮށްކަމަށެވެ. އަދި މިޕްރޮގްރާމުގައި ބައިވެރިވާ ފަރާތްތަކަށް ހާއްސަ ސެޓްފިކެޓެއް ދޭން ނިންމާފައިވާއިރު، މި ޕްރޮގްރާމުގައި ބައިވެރިވުމުގެ ފުރުސަތު މިހާރު ހުޅުވާލާފަ އެވެ.
މިމަހު 16 ގައި ކުރިއަށް ގެންދަން ހަމަޖެހިފައިވާ މި ޕްެރޮގްރާމް ހިންގަން ހަމަޖެހިފައިވަނީ އެއް ހަފްތާ ވަންދެނެވެ. އަދި މި ޕްރޮގްރާމް ނިންމާ ފަރާތްތަކަށް ސެޓިފިކެޓެއް ދޭ ގޮތަށް ހަމަޖެހިފައިވާ ކަމަށް ވެސް މީޑިއާ ކައުންސިލުން ބުނެފައި ވެއެވެ.
ހިލޭ ކުރިއަށް ގެންދެވޭ މި ޕްރޮގްރާމު ކުރިއަށް ގެންދިޔުމަށް ހަމަޖެހިފައި ވަނީ ކޮންމެ ދުވަހެއްގެ ވެސް ރޭގަނޑުގެ ވަގުތުގައެވެ. އަދި މި ޕްރޮގްރާމުގައި ކިޔަވައިދޭނީ ރާއްޖޭގައި ތިބި ނޫސްވެރިކަމުގެ ދާއިރާގައި ތަޖުރިބާކާރު ބޭފުޅުން ކަމަށްވެސް އެމްއެމްސީ އިން ވަނީ ބުނެފައެވެ.
އެމްއެމްސީން ވަނީ މި ޕްރޮގްރާމުގައި ބައިވެރިވާން އެދޭ ފަރާތްތަކަށް ބައިވެރިވުމަށް އެދޭ ފޯމު އޮންލައިންކޮށް ފުރުމަށްފަހު އަންނަ ބުރާސްފަތި ދުވަހުގެ 2:00ގެ ކުރިން އެކައުންސިލަށް ހުށަހެޅުމަށް އެދިފައެވެ. އަދި އިތުރު މައުލޫމާތު ސާފު ކުރަން ބޭނުންވާ ފަރާތްތަކުން 7967919 އަށް ގުޅުމަށް އެ ކައުންސިލުން އެދެއެވެ.
