ސަދާގެ މަރު: މައްސަލަ ކޯޓުން ބޭރުގަައި ހައްލުކުރުމުގެ ފުރުސަތު ދީފި
ފުވައްމުލަކު ސިޓީގެ ހޮސްޕިޓަލުގެ އިހުމާލުން މަރުވި ކަމަށް ބުނާ ސަދާ ސައުދުﷲ ގެ މަރުގެ މައްސަލައިގައި ގެއްލުމުގެ ބަދަލު ހޯދަން އާއިލާއިން ކުރާ ދައުވާ ކޯޓުން ބޭރުގައި ހައްލުކުރުމާ މެދު ގޮތެއް ނިންމަން ސިވިލް ކޯޓުން ދައުލަތަށް ފުރުސަތު ދީފި އެވެ.
ބަނޑުގައި ރިއްސާ ވަރަށް ގަދައަށް ހޮޑުލާތީ ފުރަތަމަ ސަދާ ދައްކައިފައި ވަނީ ފުވައްމުލަކުގައި ހުންނަ ފުލޫ ކްލިނިކަށެވެ. އެހެން ނަމަވެސް ސަދާގެ ހާލު މާބޮޑަށް ގޯސް ވާތީ އެ ތަނުން ސަދާ ފޮނުވައިލީ އެ ރަށު ހޮސްޕިޓަލަށެވެ.
ސަދާ ނިޔާވެފައި ވަނީ ހޮސްޕިޓަލުން ފަރުވާ ދިނުމަށް ޖެހި އިންޖެކްޝަނެއްގެ ސަބަބުން ކަމަށް ސަދާގެ އާއިލާއިން ތުހުމަތުކުރެ އެވެ. އެ މައްސަލަ އެ އާއިލާއިން އެޗްއާރްސީއެމަށް ހުށަހެޅުމުން މި މައްސަލަ ބަލައި، އެ އިދާރާއިން ވަނީ ކުއްޖާގެ ކުރީގެ މެޑިކަލް ހިސްޓްރީ ޑޮކްޓަރުން ރަނގަޅަށް ބަލާފައި ނެތް ކަން ފާހަގަ ކޮށްފަ އެވެ. ކުއްޖާ އޮތް ހާލަތުގައި ވަގުތުން ފަރުވާ ދޭން ޖެހޭ އިރު ވެސް ފަރުވާ ދިނުމުގައި ލަސްތަކެއް ހުރި ކަން ވެސް އެ ކޮމިޝަންގެ ރިޕޯޓުގައި އޭރު ފާހަގަކޮށްފައިވެ އެވެ.
ސިވިލް ކޯޓުގައި މިއަދު ކުރިއަށްދިޔަ ސަދާގެ މަރުގެ މައްސަލައިގެ ފުރަތަމަ އަޑުއެހުމުގައި ސަދާގެ މައިންބަފައިންގެ ވަކީލުން ވަނީ ސަދާ މަރުވެފައިިވަނީ ހޮސްޕިޓަލުގެ އިހުމާލުން ކަމަށް ދައުލަތުން ގަބޫލުކުރާނަމަ، ބަދަލުގެ މިންވަރާ ގުޅިގެން ކޯޓުން ބޭރުގައި މަޝްވަރާކުރަން ތައްޔާރު ކަމަށެވެ.
އެކަމާ ގުޅިގެން ދައުލަތުން ވިދާޅުވީ ވެރިންނާ މަޝްވަރާ ކުރުމަށްފަހު ގޮތެއް ނިންމުމުގެ ފުރުސަތު ދިނުމަށެވެ. އެހެންވެ ސިވިލް ކޯޓުން ވަނީ ދައުލަތަށް ދެ ދުވަހުގެ މުއްދަތެއް ދީފަ އެވެ.
ސަދާ ނިޔާވެފައިވަނީ 2021 ވަނަ އަހަރުގެ ތެރޭގަ އެވެ.
