ޔޫކުރޭން ބަލިކޮށް ރުމޭނިއާއަށް ތާރީހީ މޮޅެއް
ޔޫރޯ 2024 ގައި ޔޫކްރޭން ބަލިކޮށް ރުމޭނިއާއިން ތާރީހީ މޮޅެއް ހޯދައިފިއެވެ.
މިރޭ ޔޫރޯ ގްރޫޕް އީގައި ކުޅުނު އެ މެޗު ރުމޭނިއާއިން ކާމިޔާބުކުރީ ފަސޭހަކަމާއެކު 3-0 ގެ ނަތީޖާއަކުންނެވ.
އެ މޮޅަކީ ވޭތުވެދިޔަ 24 އަހަރު ދުވަސް ތެރޭގައި ޔޫރޯ މެޗަކުން ހޯދި ފުރަތަމަ މޮޅެވެ. އެ ޓީމު އެންމެ ފަހުން ޔޫރޯ މެޗަކުން މޮޅުވީ 2000 ވަނަ އަހަރުއެވެ.
ރުމޭނިއާއިން ވަނީ 2008 ވަނަ އަހަރު އަދި 2016 ވަނަ އަހަރުގެ މުބާރާތުގައި ކުޅެފައެވެ. އެހެންނަމަވެސް އެ ދެ އަހަރު އެ ޓީމު މުބާރާތް ނިންމާލީ މެޗަކުން މޮޅުނުވެއެވެ.
އެހެންނަމަވެސް މިރޭ އެ ޓީމުން ވަނީ މޮޅު ކުޅުމެއްދައްކައިފައެވެ. އެގޮތުން، މެޗުގެ 29 ވަނަ މިނިޓްގައި ޓީމުގެ ކެޕްޓަން ނިކޮލައެ ސްޓަންޗޫ ޖެހި ގޯލަކުން އެ ޓީމުން ވަނީ މެޗުގެ ލީޑުނަގައިފައެވެ. އެ ގޯލަކީ އޭރިއާ ބޭރުން ފޮނުވާލައިގެން ކާމިޔާބުކުރި ރީތި ގޯލެކެވެ.
ދެވަނަ ހާފުގެ 53 ވަނަ މިނެޓުގައި ރުމޭނިއާއިން ވަނީ އިތުރު ގޯލެއް ޖަހައިފައެވެ. މިފަހަރު އޭރިއާ ބޭރުން އެ ގޯލު ޖެހީ ރަޒްވާން މަރިންއެވެ. އޭނާގެ އެ ގޯލު އަމާޒުވީ ގޯލުގެ ތިރީ ކަނަށެވެ.
އޭގެ ހަތަރު މިނިޓް ފަހުން، ކުރި އެޓޭކެއްގައި ރުމޭނިއާ އިން ތިން ވަނަ ލަނޑު ޖެހި އެވެ. މިއީ، ޑެނިސް މާން ދިން ބޯޅައަކުން، ޑެނިސް ޑްރަގޫސް ޖެހި ގޯލެކެވެ.
