އާރުޑީސީއަކީ މާލީގޮތުން ފައިދާވާ ކުންފުންޏަކަށް ހަދަން ހަރަދު ކުޑަކުރުމުގެ ފިޔަވަޅުތައް އަޅަނީ
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އަކީ މާލީގޮތުން ފައިދާވާ ކުންފުންޏަކަށް ހަދަން ހަރަދު ކުޑަކުރުމުގެ ގިނަ ފިޔަވަޅުތަކެއް އަޅަން ފަށައިފި އެވެ.
އާރުޑީސީގެ އިދާރީ ހަރަދުތައް ކުޑަކުރުމާ ގުޅޭގޮތުން އެ ކުންފުނީގެ މުވައްޒަފުންނަށް މިދިޔަ ބުރާސްފަތި ދުވަހު ފޮނުވި މެމޯއެއްގައި ބުނީ މާލީގޮތުން ފައިދާވާ ކުންފުންޏެއްގެ ގޮތުގައި އެ ކޯޕަރޭޝަން ހެދުމަށް ކުރަމުން އަންނަ މަސައްކަތުގެ ތެރޭގައި ކުންފުނީގެ ހަރަދު ކުޑަކުރުން ހިމެނޭ ކަމަށެވެ. އާރުޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ނަބީހް ފޮނުއްވި އެ މެމޯގައި ކުންފުނީގެ ހަރަދު ކުޑަކުރުމަށް މެނޭޖްމަންޓުން ނިންމާފައިވާ ފިޔަވަޅުތައް ތަންފީޒު ކުރުމަށް މުވައްޒަފުންގެ އެއްބާރުލުމާއި އެހީތެރިކަމަށް ވަނީ އެދިވަޑައިގެންފަ އެވެ.
އާރުޑީސީން އަޅަން ނިންމި ފިޔަވަޅުތަކާ ގުޅިގެން އެ ކޯޕަރޭޝަނުގެ މީޑިއާ އޮފިޝަލް އަހުމަދު ފައިރޫޒް "ދެން" އަށް ވިދާޅުވީ މިދިޔަ މެއި މަހުން ފެށިގެން ހަރަދު ކުޑަކުރުމުގެ ގޮތުން އެކި ފިޔަވަޅުތައް އަޅަމުން އަންނަ ކަމަށެވެ. ކުންފުނި ހިންގަމުން އައީ ގެއްލުމުގައި ކަމަށް ވުމުން އެއް ކަމަކަށް ފަހު އަނެއް ކަމެއް ބަލާފައި، ކަންކަން އިސްލާހު ކުރުމަށް ފިޔަވަޅުތައް އަޅަމުން އަންނަކަން ފައިރޫޒް ފާހަގަކުރެއްވި އެވެ.
"އެއް ކަމަކަށް ފަހު އަނެއް ކަމެއް ބަލާފައި، އެންމެ ކުރިން ވެސް ހަރަދު ކުރަމުން އައި އުސޫލުތަކުގެ ސަބަބުން ކުންފުނި ހިންގަމުން އައީ މައިގަނޑު ގޮތެއްގައި ގެއްލުމުގައި. އެ ކަންކަން އިސްލާހު ކުުރުމަށް ފިޔަވަޅުތަކެއް މިހާރު ދަނީ އަޅަމުން މެއި މަހުން ފެށިގެން،" ފައިރޫޒް ވިދާޅުވި އެވެ.
އާރުޑީސީން އެޅި ފިޔަވަޅުތައް:
- މި ވަގުތަށް ކޮންމެންހެން ކުރަން ޖެހޭ މަރާމާތުތައް ފިޔަވައި އިތުރު އެއްވެސް މަރާމާތެއް ނުކުރުން
- އޮފީހުގެ ބަޖެޓުން ހަރަދު ކޮށްގެން ކުރަން ޖެހޭ ދަތުރުތަކުގެ ތެރެއިން ކޮންމެހެން ކުރަން ޖެހޭ ދަތުރެއް ނޫނީ ނުކުރުމަށާ އަދި މިފަދަ ދަތުރެއް ކުރަން ޖެހިއްޖެ ނަމަ ވީހާ ވެސް ހަރަދު ކުޑަ ގޮތަކަށް ދަތުރުގެ އިންތިޒާމުތައް ހަމަޖެއްސުން
- ފޯނާއި އިންޓަނެޓާއި ފެނާއި ކަރަންޓު އަދި މިނޫންވެސް އޮފީސް ހިންގުމުގެ ހަރަދުތައް ކުޑަކޮށް ހަމަޖެއްސުން
- އޮފީހުގައި ކަރަންޓުން ބޭނުންކުރާ މެޝިނަރީ އާއި އިކުއިޕްމެންޓާއި އެހެނިހެން އާލާތްތައް ބޭނުން ނުކުރާ ވަގުތުތަކުގައި ނިއްވާލުން
- އޮފީހުގެ ތެރޭގައި ކުރަން ޖެހޭ މުއާމަލާތްތަކުގައި ވީހާވެސް މަދުން ކަރުދާސް ބޭނުން ކުރާ ގޮތަށް ހަމަޖެއްސުން
- އޮފީހުގެ ފަރާތުން ކޮންމެހެން ބާއްވަން ޖެހޭ ހަފުލާއެއް ފިޔަވައި އިތުރު ހަފުލާއެއް ނުބޭއްވުން
- އިތުރު ގަޑީގައި މަސައްކަތް ކުރަން ނުޖެހޭ ގޮތަށް މަސައްކަތް ރާވައި ކުރިއަށް ގެންދިޔުން
- އޮފީސް ރަސްމީކޮށް ބަންދު ކުރުމަށް ކަނޑައެޅިފައިވާ ގަޑި، ރޭގަނޑު 22:00 ގެ ކުރިން މަސައްކަތް ނިންމާލުން. އަދި އޭގެ ފަހުން ކޮންމެހެން ނިންމަން ޖެހޭ މަސައްކަތެއް ކުރަން ޖެހިއްޖެ ނަމަ އެ ދުވަހުގެ ރަސްމީ ގަޑި، 16:00 ކުރިން އެ ޑިޕާޓްމެންޓެއްގެ ސީނިއާ މެނޭޖަރު، އެޑްމިނިސްޓްރޭޝަން ޑިޕާޓްމަންޓުގެ ސީނިއާ މެނޭޖަރަށް މެއިލް ކުރުން
މި ފިޔަވަޅުތަކުގެ އިތުރުން އިތުރު ގަޑީގެ ކަންކަން ހަރުދަނާ ކުރުމާއި ހަރަދު ކުޑަކުރުމުގެ ސިޔާސަތުގެ ދަށުން އިދާރީ މުވައްޒަފުން ރަސްމީ މަސައްކަތު ވަގުތުގައި މަސައްކަތް ނިންމުމަށް ހާއްސަ ސަމާލުކަމެއް ދިނުމަށް ވަނީ އެދިފަ އެވެ. އާރުޑީސީން ވަނީ ކޮންމެހެން އިތުރު ގަޑީގައި ކުރަން ޖެހޭ މަސައްކަތެއް ވާނަމަ، އެ މަސައްކަތުގެ ތަފުސީލާ އެކު އެ ޑިވިޝަނެއްގެ ޖެނެރަލް މެނޭޖަރު މެދުވެރިކޮށް، މެނޭޖިން ޑިރެކްޓަރުގެ ހުއްދަ ކުރިއާލައި ހޯދުމަށްފަހު ނޫނީ އިތުރު ގަޑީގެ މަސައްކަތް ނުކުރުމަށް އެދިފަ އެވެ. ކުރިން ހުއްދަ ހޯދާފައި ނުވާ ދުވަސްތަކަށް އިތުރު ގަޑި އެޕްރޫވް ނުކުރުމަށް މެމޯގައި އަންގާފައިވެ އެވެ.
އިދާރީ މުވައްޒަފުންނަށް ހޮނިހިރު ދުވަހަކީ އޮންކޯލްގައި ތިބުމަށް ކަނޑައަޅާފައިވާ ދުވަސް ކަމަށާއި އެ ދުވަހު އޮފީހަށް ނިކުންނަން ޖެހޭ މުވައްޒަފުން، އެ ޑިޕާޓްމަންޓެއްގެ އިސްވެރިޔާ ކޮންމެ ހަފުތާއެއްގެ ބުރާސްފަތި ދުވަހުގެ ރަސްމީ ގަޑި ނިމުމުގެ ކުރިން ޑިޕާޓްމަންޓުގެ މަސައްކަތްކުރާ މުވައްޒަފުންނާ ހިއްސާ ކުރަންވާނެ ކަމަށް ވެސް އާރުޑީސީން ބުނެ އެވެ. އަދި އޮންކޯލުގައި ހުންނަ މުވައްޒަފަކު މަސައްކަތަށް ނުކުންނަ ނަމަ ސައިން އިން އަދި ސައިން އައުޓް ކުރަންވާނެ ކަމަށެވެ.
އާރުޑީސީގެ މެމޯގައި ފީލްޑް މަސައްކަތްކުރާ ޑިޕާޓްމަންޓްތަކާއި އެ ޑިޕާޓްމަންޓުތަކުގައި އިދާރީ މުވައްޒަފުން ކަނޑައަޅާނެ ގޮތާ އަދި އެ ފަރާތްތަކުގެ ޗުއްޓީ ގުނާނެ ގޮތް ވެސް ވަނީ ހިމަނައިފަ އެވެ.
Ads by STO
