ބޭނުންވާނަމަ ރާއްޖެއަށް ހަތިޔާރު އެތެރެކުރެވޭނެ މަގު އޮތީ ހުޅުވިފައި: ކަސްޓަމްސް
ބަޔަކު ބޭނުންވެއްޖެ ނަމަ ރާއްޖެއަށް ހަތިޔާރު ގެނެވޭނެ ކަމަށާއި، މިހާރުގެ ހާލަތަށް ބަލާނަމަ އެ މަގު އޮތީ ހުޅުވިފައި ކަމަށް މޯލްޑިވްސް ކަސްޓަމްސް ސާވިސްއިން މިއަދު ބުނެފި އެވެ.
ކަސްޓަމުން ހިދުމަތް ފޯރުކޮށްދިނުމުގައި ދިމާވާ ގޮންޖެހުންތަކާ ގުޅޭގޮތުން ރައްޔިތުންގެ މަޖިލިހުގެ ސަލާމަތީ ހިދުމަތްތަކާ ބެހޭ ކޮމިޓީގައި ވާހަކަ ދައްކަވަމުން ކަސްޓަމްސްގެ އޮފިޝަލަކު ވިދާޅުވީ އެ އިދާރާގެ މުވައްޒަފުން ގާއިމުވެ ތިބެނީ ބަނދަރުތަކުގައި ކަމަށާއި ބަނދަރާ ހަމައަށް އުޅަނދުތަކުން އަންނަނީ ކަނޑުގައި ދަތުރުކޮށްފައި ކަމުން ބަނދަރުތަކާ ހަމައަށް ނައިސް ރާއްޖޭގެ ކަނޑުގެ ސަރަހައްދުގެ ތެރޭގައި ކަންކަން ކުރުމުގެ ފުރުސަތު އޮންނަ ކަމަށެވެ.
ރާއްޖޭގެ އިގުތިސޯދީ ސަރަހައްދަކީ ބޮޑު ސަރަހައްދެއް ކަމަށާއި ސިޔާދަތީ ބާރު ލިބެނީ 12 މޭލަށް ކަމަށް އޮފިޝަލް ވިދާޅުވި އެވެ. އޮފިޝަލް ވިދާޅުވެފައި ވަނީ ބާރު ހިނގާ ސަރަހައްދު ރަނގަޅަކަށް ނުބެލެހެއްޓޭ ކަމަށެވެ. އުޅަނދުތަކުގައި ގެންނަނީ ކޮން އެއްޗެއްތޯ ބެލުމުގެ ފުރުސަތު ލިބެނީ ބަނދަރުކުރީމާ ކަމަށް އޭނާ ވިދާޅުވި އެވެ. އޭގެ ކުރިން އޮންނަނީ ހުޅުވިފައި އޮންނަ ކަނޑެއް ކަމަށާއި ކަނޑުގެ ސަރަހައްދުގެ ތެރޭގައި އެހެން އުޅަނދުތަކަށް ތަކެތި އަރުވައިގެން ގެންގޮސްފައި ވެސް އެބަހުރި ކަމަށެވެ.
"އަޅުގަނޑުމެންނާ ހަމައަށް އަންނަ ކޮންމެ އެއްޗަކީ އަޅުގަނޑުމެންނާ ހަމައަށް ނައިސް ދިއުމުގެ ފުރުސަތު އޮވޭ. މިއީ އަޅުގަނޑުމެން އިންތިހާއަށް ކަންބޮޑުވާ ކަމެއް. އެ އޮތީ އެމީހަކު ބޭނުންވާ ކަމެއް، ނިޔަތް ގަތުން. މިސާލަކަށް ހަތިޔާރު ގެންނަން މީހަކު ނިޔަތް ނުގަންނަނީ. ނިޔަތް ގަނެފިއްޔާ އޭގެ މާނައަކީ ރާއްޖެއަށް ހަތިޔާރު ގެނެވޭނެ މަގު އެއޮތީ ހުޅުވިފައޭ،" ކަސްޓަމްސްގެ އޮފިޝަލް ވިދާޅުވި އެވެ.
މި ކަންކަން ބެލެހެއްޓޭނެ ނިޒާމަކަށް އޮތީ ކަނޑުގެ ސަރަހައްދު ބޮޑެތި އެހެނިހެން ގައުމުތަކުގައި ވެސް އަމަލު ކުރަމުން ނިޒާމަށް ރާއްޖޭން ވެސް އަމަލު ކުރަން ފެށުން ކަމަށް އޮފިޝަލް ފާހަގަކުރެއްވި އެވެ. އޭނާ ވިދާޅުވި ގޮތުގައި ނަތީޖާއަކަށް ވާންވީ މިހާރަށް ހުރި މައްސަލަތަކަށް ހައްލު ލިބޭނެ ހިސާބަކަށް ދިއުން ކަމުގަ އެވެ.
