ރިޔާސީ ދައުރު ފަށާ ދުވަސް ނޮވެމްބަރު 11 އަށް އަލުން ބަދަލުކުރަނީ
މީގެކުރިން ރިޔާސީ ދައުރު ފަށާ ދުވަހުގެ ގޮތުގައި ފާހަގަކުރަމުން އައި ނޮވެމްބަރު މަހުގެ 11 ވަނަ ދުވަހަކީ ރިޔާސީ އާ ދައުރެއް ފަށާ ދުވަސް ކަމުގައި ކަނޑައެޅުމަށް ގާނޫނު އަސާސީއަށް އިސްލާހު ހުށަހެޅުމަށް ނިންމަވާފައިވާ ކަމަށް ބަންޑާރަނައިބު އަހްމަދު އުޝާމް މިއަދު ވިދާޅުވެއްޖެ އެވެ.
ރާއްޖޭގެ 2 ވަނަ ޖުމްހޫރިއްޔާ ގާއިމުކުރެވުނު ދުވަހުން ފެށިގެން ކޮންމެ 5 އަހަރަކުން އިންތިހާބު ކުރެވޭ ވެރިއަކު ހުވާ ކުރައްވަމުން ގެންދެވީ ނޮވެމްބަރު މަހުގެ 11 ވަނަ ދުވަހު އެވެ. އެހެންނަމަވެސް 2013 ވަނަ އަހަރުގެ ރިޔާސީ އިންތިހާބުގެ ފުރަތަމަ ބުރު، ސުޕްރީމް ކޯޓުން ބާތިލުކުރުމާ ގުޅިގެން އެ ދުވަހަށްވީއިރު ރައީސަކު އިންތިހާބު ނުކުރެވި، ދެ ވަނަ ބުރަކުން ހޮވިވަޑައިގެންނެވި ކުރީގެ ރައީސް އަބްދުﷲ ޔާމީން ހުވާކުރެއްވީ އެ އަހަރުގެ ނޮވެމްބަރު މަހުގެ 17 ވަނަ ދުވަހު އެވެ. އޭގެ ފަހުން ވެރިކަމުގެ ދައުރު ގުނަމުންދަނީ ނޮވެމްބަރު 17 އިން ފެށިގެންނެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އުޝާމް ވިދާޅުވީ ސަރުކާރުގެ ފަރާތުން ގާނޫނު އަސާސީއަށް ބައެއް އިސްލާހުތައް ހުށަހެޅުމަށް ނިންމަވާފައިވާ ކަމަށެވެ. އޭގެ ތެރެއިން ބައެއް އިސްލާހުތަކުގެ މަސައްކަތް ނިމިފައިވާއިރު އަނެއް ބައި އިސްލާހުތަކުގެ މަސައްކަތް ކުރަމުންދާ ކަމަށެވެ. އެގޮތުން ހިމެނޭ އެއް އިސްލާހަކީ ރިޔާސީ ދައުރު ފަށާ ދުވަސް، ނޮވެމްބަރު މަހުގެ 11 ވަނަ ދުވަހަށް އަލުން އަނބުރާ ބަދަލު ކުރުން ހިމެނޭ ކަމަށެވެ.
"އިސްލާހަކީ އެ އިސްލާހު ގެނައުމަށް ޓަކައި ޕަބްލިކް ރިފަރެންޑަމްއަކަށް ދާން ޖެހޭނެ ކަހަލަ އިސްލާހަކަށް ވާތީީވެ، މިކަހަލަ އިސްލާހުތަކަށް ކުޑަކުޑަ ވަގުތުކޮޅެއް ނަގައިގެން އެކަން ކޮށްލެވޭނީ،" އުޝާމް ވިދާޅުވި އެވެ.
އޭގެ އިތުރުން ރާއްޖޭގެ ސަރަހައްދު ގާނޫނު އަސާސީގައި ބަޔާންކުރަން އިސްލާހެއް ހުށަހެޅުން ހިމެނޭ ކަމަށެވެ. އަމަލުކުރެވެމުންދާ ގާނޫނު އަސާސީގައި އެކަން ނޯންނަ ކަމަށާއި އޮންނަނީ ގާނޫނެއްގައި އެކަން ލިޔެވިފައި ކަމަށެވެ. ކަމާ ގުޅިގެން ބައެއް ކަހަލަ ކަންކަން ހިނގާފައި ވުމާ އެކު އެފަދަ ކަމެއް ކުރިއަށް އޮތް ތަނުގައި ވިޔަ ނުދިނުމަށް ރާއްޖޭގެ ސަރަހައްދަށް ބަދަލެއް ގެންނަ ނަމަ އަމަލުކުރަން ޖެހޭނެ ގޮތްތަކެއް ގާނޫނު އަސާސީގައި ލިޔަން ޖެހޭ ކަމަށެވެ.
ބަންޑާރަނައިބު ވިދާޅުވި ގޮތުގައި އެ އިސްލާހުތަކުގެ އިތުރުން ޖުޑިޝަލް ސާވިސް ކޮމިޝަން އެކުލެގެންވާ ގޮތް ބަދަލު ކުރުމަށާ އަދި ރައްޔިތުންގެ މަޖިލިހުގެ މެމްބަރުންގެ އަދަދު ހިފެހެއްޓުމަށް އިސްލާހުތަކެއް ހުށަހަޅުއްވާނެ ކަމުގަ އެވެ. އަދި މެމްބަރުންގެ ރިކޯލް ވޯޓަކަށް ދާން ޖެހޭ ހާލަތުގައި އެކަން ކުރެވޭނެ ގޮތްތަކެއް ގާނޫނު އަސާސީގައި ލިޔުމަށް ކުރަން ޖެހޭ ދިރާސާތަކުގެ މަސައްކަތް ކުރަމުންދާ ކަމަށެވެ.
އިސްލާހުތައް ގެނައުމުގެ މަސައްކަތް ކުރަމުންދާއިރު ކަމާ ގުޅުންހުރި ފަރާތްތަކުގެ ލަފަ އާއި އިރުޝާދު ހޯދާނެކަން ފާހަގަ ކުރެއްވި އެވެ.
