ހިޔާނާތުގެ ތުހުމަތުކުރެވޭ އޭސީޕީ އާސިފް ސަސްޕެންޑްކޮށްފި
މޯލްޑިވްސް ކަރެކްޝަނަލް ސާވިސްއިން ބަލަމުން އަންނަ މައްސަލައަކާ ގުޅިގެން އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް ވަޒީފާއިން ސަސްޕެންޑުކޮށްފި އެވެ.
ޕްރިޒަންސް ކުލަބުގެ އެކައުންޓުން 200،000 ރުފިޔާއަށް ވުރެ ގިނަ ފައިސާ އެކިއެކި އެކައުންޓުތަކަށް ޖަމާކުރި މައްސަލައެއް ފެންމަތިވެފައި ވަނީ މިދިޔަ ޖުލައި މަހު އެވެ. ޕްރިޒަންސްގެ މުވައްޒަފުން ތުހުމަތުކުރާ ގޮތުގައި މި ހިޔާނާތުގެ ފަހަތުގައި އެންމެ އިސް ރޯލެއް ކުޅެފައި ވަނީ އެ ކުލަބުގެ ރައީސްކަން ވެސް ކުރައްވާ އާސިފެވެ.
ކަރެކްޝަންސްއިން މިކަމާ ގުޅިގެން "ދެން" އަށް މައުލޫމާތު ދެމުން ބުނީ، "ބަލަމުންދާ މައްސަލައަކާ ގުޅިގެން ވަގުތީ ގޮތުން ސަސްޕެންޑް ކުރެވިފައި،" ކަމަށެވެ. އާސިފް ސަސްޕެންޑުކޮށްފައި ވަނީ އިއްޔެ އެވެ.
އަދި އެއީ ބަލަމުންދާ މައްސަލައަކަށްވާތީ އިތުރު މައުލޫމާތު ހިއްސާކުރެވެން ނެތް ކަމަށް ކަރެކްޝަންސްއިން ބުނެ އެވެ.
އާސިފް އޭސީޕީގެ މަގާމަށް އައްޔަންކޮށްފައި ވަނީ 2019 ވަނަ އަހަރުގެ ސެެޕްޓެމްބަރު މަހުގެ ތެރޭގަ އެވެ. އޭގެ ކުރިން އޭނާ ހުންނެވީ މާލޭ ޖަލު ހިންގުމުގައި އިސްކޮށް، ސުޕްރިޓެންޑެންޓްގެ މަގާމުގަ އެވެ.
