ރާޅުތަކުން އިއާދަކުރަނިވި ހަކަތަ އުފެއްދުމުގެ މަޝްރޫއުއެއް ފަށައިފި
ރާޅުތަކުން އިއާދަކުރަނިވި ހަކަތަ އުފެއްދުމުގެ މަޝްރޫއުއެއް ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯ އިން ފަށައިފިއެވެ.
ސްޓެލްކޯގެ މެނޭޖިން ޑިރެކްޓަރ ހުސެއިން ފަހުމީ މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، މި މަޝްރޫއުއަކީ ރާއްޖޭގައި އިއާދަކުރަނިވި ހަކަތައިގެ މިންވަރު 33 އިންސައްތައަށް އިތުރުކުރުމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދު ފުއްދުމަށް އެޅިގެންދާ މުހިންމު ފިޔަވަޅެއް ކަމަށެވެ.
އިތުރަށް ފަހުމީ ވިދާޅުވީ، ސްޓެލްކޯއިން މަސައްކަތްކުރަނީ ރާޅުތަކުން އުފައްދާ ހަކަތައިގެ މިންވަރު އިރު އަލިން އުފައްދާ ހަކަތައަށްވުރެ ފުޅާކޮށް، ދެމެހެއްޓެނިވި ގޮތެއްގައި އިއާދަކުރަނިވި ހަކަތަ އުފެއްދުމުގެ އާ ހަރުފަތަކަށް ގެންދިއުމަށް ކަމަށެވެ.
މީގެއިތުރުން އެމަޝްރޫއުގެ ދަށުން ކަނޑުގެ ރާޅުތަކަކީ ފައިދާހުރި ހަކަތައިގެ ވަސީލަތެއްގެ ގޮތަށް ހެދުމަށް ފުރުސަތު އޮތް މިންވަރު ދެނެގަތުމަށް ދިރާސާ ކުރެވި، މައުލޫމާތު އެއްކުރެވިގެންދާނެ ކަމަށް ވެސް އޭނާ ވިދާޅުވި އެވެ.
"ރާޅުތަކުން ހަކަތަ އުފެއްދުމަކީ އިރުގެ އަލިން ހަކަތަ އުފެއްދުމާ ހިލާފަށް، މޫސުމީ ބަދަލުތަކުގެ ސަބަބުން ކުރާ އަސަރު ކުޑަކޮށް، ދެމެހެއްޓެނިވި ގޮތެއްގައި ހަކަތަ އުފެއްދޭނެ ފުރުސަތުތަކެއް އެކުލެވިގެންވާ ވަސީލަތެއް،" އެކްސްގައި ކުރެއްވި ފަހީމް ވިދާޅުވިއެވެ.
އެ ކުންފުނީގެ އަމާޒަކީ މި މަޝްރޫއުގައި ކުރެވޭ ދިރާސާ ރާޅުން އުފައްދައިދޭ ހަކަތައިގެ ސަބަބުން މިހާރު ހުރި އިއާދަކުރަނިވި ވަސީލަތްތައް ފުރިހަމަކުރެވިދާނެ ގޮތް ދެނެގަތުން ކަމަށް ފަހުމީ ވިދާޅުވި އެވެ. އަދި އޭގެން މިހާރަށްވުރެ ހަރުދަނާ ހަކަތައިގެ ގިއުގަނޑެއް އުފެއްދުންކަން ވެސް ފާހަގަ ކުރެއްވި އެވެ.
