އާސަންދަ ނިޒާމަށް ބޮޑު ބަދަލެއް ގެނެސް މުއްސަނދިންގެ އަތުން ވަކި އަދަދެއް ނަގަނީ
އާސަންދަ ނިޒާމަށް ކުރަމުން އަންނަ ހޭދަ ކުޑަކުރުމުގެ ގޮތުން އެންމެ މުއްސަނދި މީހުންގެ އަތުން އަންނަ އަހަރުން ފެށިގެން ވަކި އަދަދެއް އެ ނިޒާމަށް ދައްކަން ޖެހޭ ގޮތަށް ބަދަލު ގެނައުމަށް ނިންމައިފި އެވެ.
ސަބްސިޑީ އާއި އެހެނިހެން އެހީތަކުގެ ތެރެއިން އެންމެ ބޮޑު ހޭދައެއް ދައުލަތުން ކުރަމުން ދަނީ އާސަންދަ ނިޒާމަށެވެ. ވުމާ އެކު ނިޒާމު ދެމެހެއްޓެނިވި ގޮތަކަށް ހިންގުމަށް ބޮޑެތި ބަދަލުތަކެއް ގެނައުމަށް ސަރުކާރުން ވަނީ ނިންމާފަ އެވެ.
އެގޮތުން އަންނަ އަހަރުގެ އެޕްރީލު މަހުން ފެށިގެން މައިގަނޑު ދެ ބަދަލެއް ގެނައުމަށް ނިންމައި އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހެޅި ބަޖެޓުގައި ވަނީ ހިމަނާފަ އެވެ. ސަރުކާރުން ލަފާކޮށްފައިވާ ގޮތުން މި ބަދަލުތަކާ އެކު އާސަންދައަށް ކުރަމުން އަންނަ ހަރަދުގެ ތެރެއިން ގާތްގަނޑަކަށް 600 މިލިއަން ރުފިޔާ ކުޑަކުރެވޭނެ އެވެ.
ބަޖެޓު ތަފްސީލު ރިޕޯޓުގައި ވަނީ މަހަކު 60،000 ރުފިޔާއަށް ވުރެ ގިނައިން އާމްދަނީ ލިބޭ ނުވަތަ އިންކަމް ޓެކްސް ދައްކަން ޖެހޭ މީހުންގެ އަތުން ވަކި އަދަދެއް ނަގަން ހިމަނާފަ އެވެ. ފިނޭންސް މިނިސްޓްރީން ބުނެފައި ވަނީ އެގޮތަށް "ކޮންޓްރިބިއުޝަން" އާއެކު، އާސަންދަ ނިޒާމު ހަރުދަނާ ކުރެވޭނެ ކަމަށާއި އެންމެ ފަގީރު ހާލުގައި އުޅެމުންދާ މީހުންނަށް މާލީ ބުރައަކާ ނުލާ ސިއްހީ ހިދުމަތް ލިބޭނެކަން ކަށަވަރު ކުރެވޭނެ ކަމަށެވެ.
އެންމެ މުއްސަނދި މީހުން އައުޓްޕޭޝަން ހިދުމަތް ހޯދާއިރު އަދި "އެސެންޝަލް" ނޫން ބޭސް ގަންނައިރު ބިލުގެ ވަކި މިންވަރެއް "ކޮންޓްރިބިއުޝަން" ގެ ގޮތަށް ބަދަލުކޮށް އަމަލުކުރަން ވަނީ ނިންމާފަ އެވެ. އެގޮތަށް ހަމަޖެއްސީ އަމިއްލަ އަތުން އަހަރެއްގެ މައްޗަށް ގިނަވެގެން ހަރަދުކުރަން ޖެހޭ އެންމެ މިންވަރުތައް ކަނޑައެޅުމަށްފަހުގަ އެވެ. އެ އަދަދުގެ އިތުރަށް އަތުން ފައިސާ ދައްކަން ނުޖެހި މިހާރެކޭ އެއްގޮތަށް ހިދުމަތް ލިބޭނެ އެވެ.
އެ ބަދަލުގެ އިތުރުން އެންމެ ގިނައިން އާމްދަނީ ލިބޭ މީހުންގެ އަތުން ފާމަސީތަކާއި ސަރުކާރުގެ ހޮސްޕިޓަލުތަކުން ހޯދާ ބައެއް ސިއްހީ ހިދުމަތްތަކަށް ކޯ-ޕޭ ނިޒާމެއް ތައާރަފުކުރަން ޕްލޭނެއް ހިމަނާފައިވެ އެވެ.
"ކޮންޓްރިބިއުޝަން" ގެ ނިސްބަތާއި އަހަރެެއްގެ ތެރޭގައި ގިނަވެގެން ހަރަދުކުރަން ޖެހޭ އަދަދު ފިނޭންސް މިނިސްޓްރީން ކަނޑައަޅާފައި ވަނީ އާމްދަނީގެ ގިންތިތަކަށް ބެލުމަށްފަހުގަ އެވެ. އެހެންނަމަވެސް އެކަން ކުރާއިރު އުމުރުން 18 އަހަރު ނުވާ ކުދިންނާއި 65 އަހަރުން މަތީގެ މީހުންގެ އިތުރުން ދިގު މުއްދަތަށް ފަރުވާ ހޯދަން ޖެހޭ ބަލިތަކަށް ފަރުވާ ކުރަމުންދާ މީހުން އިސްތިސްނާ ކުރާނެ އެވެ.
ތިޔަ ހުރިހާ ކަމެއްވެސް ތިކުރަނީ ދައުލަތުން އާގޮތްގޮތަށް ވައްކަން ކުރަން….ފުރަތަމަ ކުރަންވީ ކަމަކީ ދައުލަތުން ވައްކަން ކޮށްފިއްޔާ އަތްކެނޑުމުގެ ގާނޫނެއް ގެނައުން…..ޙައްލަކީ ޢުމަރު…އެސޮރު ކުރާނެ ކެރޭނެ..ކުރާނެ …އެހިތްވަރު ހުންނާނެ.