ޝަރުއީ ދާއިރާއަށް ނުފޫޒު ފޯރުވަންޏާ ސީދާ ރައީސަށް އަންގަން އިލްތިމާސްކޮށްފި
ރާއްޖޭގެ ޝަރުއީ ދާއިރާއަށް އެއްވެސް ނުފޫޒެއް ފޯރުވަން ބޭނުންނުވާ ކަމަށާއި އެފަދަ ކަމެއް ކުރާ މީހަކު ވަޒީފާއިން ވަކިކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒުގެ ވެރިކަަމަށް އެއް އަހަރު ފުރުމާ ގުޅިގެން މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަަކަފުޅު ދައްކަވަމުން ރައީސް ވިދާޅުވީ އެމަނިކުފާނަށް އެނގިގެން ސިޔާސީ ގޮތުން މަގާމަކަށް އައްޔަންކޮށްފައިވާ މީހަކު ޝަރުއީ ދާއިރާއަށް ނުފޫޒު ފޯރުވާފައި ނުވާ ކަމަށެވެ.
އަދި އެފަދަ ކަމެއް ހިނގަމުންދާކަން އެއްވެސް ރައްޔިތަކަށް ފާހަގަވެފައިވާ ނަމަ، އެކަން ރައީސްގެ ސަމާލު ކަމަށް ގެންނެވުމުން، އެމީހަކު ވަގުތުން ވަޒީފާއިން ވަކިކުރައްވާނެ ކަމަށް ވިދާޅުވި އެވެ.
"އަޅުގަނޑު އައްޔަންކޮށްފައި ހުރި މީހެއް ޝަރުއީ ދާއިރާއަށް ނުފޫޒެއް ފޯރުވާ ކަމަށް ފެނިވަޑައިގަންނަވާނަމަ، އަޅުގަނޑަށް އެކަން އަންގާލަދެއްވާ. އެމީހަކު ވަގުތުން ވަކިކުރާނަން،" ރައީސް ވިދާޅުވި އެވެ.
އިތުރަށް އެމަނިކުފާނު ވިދާޅުވީ ޝަރުއީ ދާއިރާއަށް އެއްވެސް ގޮތަކުން ނުފޫޒު ފޯރުވަން ބޭނުންފުޅުވެ ވަޑައިނުގަންނަވާ ކަމަށާއި އެފަދަ އަމަލެއް ހިނގަމުންދާ ނަމަ، އެއީ ކޮންމެ މީހަކަށް ވިޔަސް ވަޒީފާއިން ވަކިކުރާނެ ކަމަށެވެ.
ޝަރުއީ ދާއިރާއަށް ނުފޫޒު ފޯރުވުމަކީ ރައްޔިތުން ބޭނުންވާ ގޮތް ނޫން ކަމަށާއި އެމަނިކުފާނު ވެރިކަމާ ހަވާލުވެވަޑައިގެން ވަގުތުން ފެށިގެން، ރާއްޖޭގެ ޝަރުއީ ދާއިރާއަށް ނުފޫޒު ފޯރުވުން ނިމުމަކަށް ގެނެސްފައިވާ ކަމަށް ވިދާޅުވި އެވެ.
"އެކަމެއް ނުހިނގާނެ މި ގައުމަކު ދެނެއް. އަޅުގަނޑުމެން މަސައްކަތް ކުރަނީ، އަޅުގަނޑު ވައުދުވީ ގޮތަށް ހާމަ، ދެފުށް ފެންނަ ސަރުކާރެއް ގޮތަށް،" ރައީސް ވިދާޅުވި އެވެ.
އިތުރަށް ރައީސް ވިދާޅުވީ ވެރިކަމާ ހަވާލުވެ ވަޑައިގެންނެވިއިރު ވެސް ކުރީގެ ރައީސް އަބްދުﷲ ޔާމީން ހުންނެވީ ޝަރުއީ ހުކުމެއްގައި ކަމަށެވެ. އެގޮތުގައި އެ ހުންނެވީ މި ސަރުކާރުން އެ ދާއިރާއަށް ނުފޫޒު ނުފޯރުވާތީ ކަމަށެވެ.
ވެރިކަމާއި ހަވާލުވެ ވަޑައިގެންނެވީއްސުރެ ރައީސް ދެއްވަމުން އައި އެއް ޔަގީންކަމަކީ ޝަރުއީ ދާއިރާއަށް ނުފޫޒު ނުފޯރުވާނެކަމުގެ ޔަގީންކަމެވެ. މި އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަމުން ވެސް ވިދާޅުވީ، ޝަރުއީ ދާއިރާއަށް އެއްވެސް ނުފޫޒެއް ނުފޯރުވާނެ ކަމަށެވެ. އަދި އެފަދަ ނުފޫޒެއް ސަރުކާރަށް ނިސްބަތްވާ އެއްވެސް ފަރާތަކުން ފޯރުވާކަން އެނގިއްޖެނަމަ ވަގުތުން ފިޔަވަޅު ވެސް އަޅުއްވާނެ ކަމަށެވެ.
