އިއްޔެ އޮއްސުނީ ޑިމޮކްރެސީގެ އިރު: ޝާހިދު
ސަރުކާރުން ހުށަހަޅައި ކުޑަ ވަގުތުކޮޅެއްގެ ތެރޭގައި އިއްޔެ ގާނޫނު އަސާސީ ބަދަލުކޮށްލި ކޮށްލުމަކީ ރާއްޖޭގެ ޑިމޮކްރަސީގެ އިރު އޮއްސުން ކަމަށް ވިދާޅުވެ އިިދިކޮޅު މައި ޕާޓީ، އެމްޑީޕީގެ ރައީސް އަބްދުﷲ ޝާހިދު ކަންބޮޑުވުން ފާޅުކޮށްފި އެވެ.
ސަރުކާރުން ގާނޫނު އަސާސީއަށް 5 އިސްލާހެއް ގެނެސް އެ އިސްލާހުތައް ފާސްކޮޮށް އިއްޔެ އިން އިއްޔެ އަށް ރައީސް ޑރ މުހައްމަަދު މުއިއްޒު ވަނީ ތަސްދީގުކުރައްވާފަ އެވެ. އެ އިސްލާހުގެ ތެރެއިން އެމްޑީޕީގެ އެންމެ ބޮޑު އެއް ކަންބޮޑުވުމަކީ އިންތިހާބުވާ ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ގޮނޑި ގެއްލޭ ގޮތަށް އޮތް އޮތުމެވެ. އެކަމާ ދެކޮޅަށް އެމްޑީޕީ އާއި ޑިމޮކްރެޓްސް އިން ދަނީ ކަންބޮޑުވުން ފާޅުކުރަމުންނެވެ. އެއީ ގާނޫނު އަސާސީގެ ބާރު ކަނޑުވާލުން ކަމަށް ވެސް އެ ޕާޓީތަކުން ބުނަމުންދެ އެވެ.
ގާނޫނޫ އަސާސީއަށް ގެނައި ބަދަލުތަކާ ގުޅޭގޮތުން އެމްޑީޕީގެ އޮފީހުގައި މިއަދު ބޭއްވި ޕްރެސް ބްރީފިންގައި އެ ޕާޓީގެ ރައީސް ޝާހިދު ވިދާޅުވީ އެ އިސްލާހުތަކަކީ ޑިމޮކްރެޓިކް ހަމަތަކުން ގާނޫނަށް ގެނައި އިސްލާހުތަކެއް ނޫން ކަމަށެވެ. ގާނޫނު އަސާސީގެ މުޅި މަފްހޫމަކީ މަޝްވަރާކުރުން ކަމަށްވާއިރު ކަންކަން ކޮށްފައިވަނީ އުސޫލުން ބޭރުން ކަމަށް ކުރީގެ ފޮރިން މިނިސްޓަރު ޝާހިދު ވިދާޅުވި އެވެ.
މަޖިީހުގެ ރައީސްކަން ވެސް މީގެ ކުރިން ކުރެއްވި ޝާހިދު ވިދާޅުވި ގޮތުގައި މަޖިލީހުގެ މެންބަރުންގެ ގޮނޑި ގެއްލޭ ގޮތަށް އިސްލާހު ފާސްކުރުމުން އާ މަޖިލީހެއް އިންތިހާބު ކުރަން ޖެހޭ ކަމަށެވެ. އެއީ އުފައްދަން ޖެހޭ ސުވާލެއް ކަމަށް ވިދާޅުވި އެވެ. އަވަސް އަރުވާލައިގެން ގާނޫނު އަސާސީ އިސްލާހު ކުރުމުގެ ފަހަތުގައި އެހެން ކަމެއް ފޮރުވިފައިވާ ކަމަށް ޝާހިދު ތުހުމަތު ކުރެއްވި އެވެ.
"ކޮންމެވެސް ގޯހެއް އެބަ އުޅޭ، އެހާ އަވަހަށް ކަންކުރީމާ. ބާ ކައުންސިލާ އެހެނިހެން ތަންތަނުގެ ހިޔާލު ހޯދައިގެން. މަޖިލިހުގެ ދައުރު ހަމަވަންދެން އެ ސުވާލު ކުރާނެ. ސުވާލުގެ ޖަވާބު ރައްޔިތުން ބޭނުންވޭ،" ވިދާޅުވި އެވެ.
....އިއްތިފާގުން ދިމާވީ މަގުރިބު ނަމާދަށް ގޮވިތަނާ. އިއްޔެ އޮއްސުނީ ހަމަ އިރެއް ނޫން. އިއްޔެ އެ އޮއްސުނީ ޑިމޮކްރަސީގެ އިރު.
ޝާހިދު ވިދާޅުވީ މަޖިލީހުގެ ސުޕަ މެޖޯރިޓީ ސަރުކާރަށް އޮތުމުން ގާނޫނު އަސާސީ ބޭނުންވާހާ ގޮތަށް އިސްލާހުކުރުމަކީ ޑިމޮކްރަސީގެ އުސޫލެއް ނޫން ކަމަށާއި، އެގޮތަށް ކަންކަން ކުރުމުން ދައްކުވައިދިނީ ޕީއެންސީން ބޭނުންވާހާ ގޮތަކަށް ހުރިހާ ކަމެއް ކުރާނެ ކަން ކަމަށެވެ. އަދި ޝަރުއީ ދާއިރާއަށާއި މަޖިލީހަށް ސަރުކާރުން ބޭނުންވާހާ ގޮތަކަށް ބަދަލު ގެންނާނެކަން ކަމަށް ވެސް ވިދާޅުވި އެވެ.
"އަނެއް ދެ ބާރަށް ބޭނުން އިރަކު ބަދަލު ގެންނާނެކަން އެ ދައްކައިދިނީ. އަބްދުއްރަހީމް ރައީސްކަމުން ވަކިކުރާނެ. އިތުރު ސުވާލެއް ނުކުރާނެ. މަޖިލިސް ރައީސް މުށުތެރެއަށް އެ ލީ. އުއްތަމަ ފަޑިޔާރު ވެސް ބޭނުން އިރަކު ވަކި ކުރެވިދާނެކަން. ސުޕްރީމް ކޯޓު އެ އޮތީ ރައީސްގެ ފުލް ކޮންޓްރޯލްގައި،"
ޝާހިދު ވިދާޅުވީ ކުރީގެ އެންޓި ޑިފެކްޝަން ގާނޫނުން ހަނި ބާރެއް ނަަމަވެސް ލިބޭ ކަމަށާއި މިހާތަނަށް މަޖިލިހުން ބަލަމުން އައީ އެމެރިކާގެ އުސޫލުން ކަމަށެވެ. އެކަމަކު މިހާރު ފެންނަނީ ރަސްކަލެއް އުފެދޭ މަންޒަރު ކަމަށް ވިދާޅުވި އެވެ.
އޭނާ ވިދާޅުވީ ގާތްގަނޑަކަށް 50،000 އެއްހާ މެންބަރުންގެ ތިބޭ އެމްޑީޕީގެ މުހިއްމު އަސާސަކީ ޑިމޮކްރަސީ ގާއިމުކުރުން ކަމަށާއި ސަރުކާރުން ބޭނުންވަނީ ރައްޔިތުން މާޔޫސްކޮށްފައި ކަންކުރަން ކަމަށެވެ.
"ރައްޔިތުންގެ މަޑުން ތިބޭނެ ކަމަށް ބަަލައިގެން ނުވާނެ. އުންމީދު އާކުރާށޭ، ސަރުކާރު ބަލިވަނީ.. ޑިމޮކްރަސީއަށް އަންނަ ގޮންޖެހުންތަކުން އަރައިގަނެވޭނެ އުންމީދު އާކުރަން ޖެހޭ،" ވިދާޅުވި އެވެ.
