އައިސީސީގެ ނިންމުމަކީ ޖަރީމާތަކަށް ޖަވާބުދާރީ ކުރުވަން އެޅޭ މުހިންމު ފިޔަވަޅެއް: ރައީސް
އިންޓަނޭޝަނަލް ކްރިމިނަލް ކޯޓް (އައިސީސީ) އިން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމަށް އިއްޔެ ނެރުނު އަމުރަކީ ފަލަސްތީނުގެ ރައްޔިތުންނާ ދެކޮޅަށް ހިންގާފައިވާ ހަނގުރާމައިގެ ޖަރީމާތަކަށާއި އިންސާނިއްޔަތާ ހިލާފު އަމަލުތަކަށް ޖަވާބުދާރީ ކުރުވުން ކަށަވަރު ކުރުމަށް އެޅޭ ވަރަށް މުހިންމު ފިޔަވަޅެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އައިސީސީން ވަނީ ނަތަންޔާހޫގެ އިތުރުން އިޒްރޭލުގެ ކުރީގެ ޑިފެންސް މިނިސްޓަރު ޔޯވް ގަލަންޓް އަދި ހަމާސްގެ އަސްކަރީ ވެރިޔާ މުހައްމަދު ޟައީފް ހައްޔަރު ކުރުމަށް އަމުރު ނެރެފަ އެވެ. އެފަދަ އަމުރެއް ނެރެދިނުމަށް އައިސީސީގެ ޕްރޮސެކިއުޓަ ކަރީމް ހާން އެދިފައި ވަނީ މިދިޔަ މެއި މަހުގަ އެވެ. އެހެންނަމަވެސް ނަތަންޔާހޫ ވަނީ މި މަހުގެ ކުރީކޮޅު ގަލަންޓް ޑިފެންސް މިނިސްޓަރުކަމުން ވަކިކޮށްފަ އެވެ.
ނުރަސްމީ ދަތުރުފުޅެއްގައި އިނގިރޭސިވިލާތުގައި ހުންނަވާ ރޭ "އެކްސް" ގައި ކުރެއްވި ޕޯސްޓެއްގައި ރައީސް ވިދާޅުވީ ފަލަސްތީނުގެ ރައްޔިތުންނާ ދެކޮޅަށް ހިންގާފައިވާ ހަނގުރާމައިގެ ޖަރީމާތަކަށާއި އިންސާނިއްޔަތާ ހިލާފު އަމަލުތަކާ ގުޅިގެން ނަތަންޔާހޫ ހައްޔަރު ކުރުމަށް އައިސީސީން ނެރެފައިވާ އަމުރަށް ރާއްޖޭން ފުރިހަމައަށް އިހުތިރާމު ކުރާނެ ކަމަށެވެެ.
"ބައިނަލްއަގުވާމީ ގާނޫނުތައް ނަގަހައްޓައި، ފަލަސްތީނުގެ ރައްޔިތުންނަށް އިންސާފު ކަށަވަރު ކޮށްދިނުމަކީ ސަރަހައްދުގެ ހަމަޖެހުން އަލުން އިއާދަކުރުމަށް ކޮންމެހެން ބޭނުންތެރި ކަމެއް،" ރައީސް ވިދާޅުވި އެވެ.
ފަލަސްތީނުގެ ދިފާއުގައި ރާއްޖޭން އަބަދުވެސް ވަކާލާތު ކުރަމުން އަންނައިރު، މިފަހުން ސައުދީ އަރަބިއްޔާގައި ބޭއްވި ޖޮއިންޓް އަރަބް-އިސްލާމިކް ސަމިޓުގައި ތަގުރީރު ކުރައްވަމުން ރައީސް ވަނީ މުސްލިމް އަދި އަރަބި ގައުމުތަކުން ފަލަސްތީނަށް ތާއީދުކުރާ އުސޫލަކުން ފިޔަވަޅުތައް އެޅުމަށް އިލްތިމާސް ކުރައްވާފަ އެވެ.
ފަލަސްތީނުގެ ރައްޔިތުންނާ ދެކޮޅަށް، އެތައް ޒަމާންތަކެއް ވަންދެން ދިގުލައި ގޮސްފައިވާ އަނިޔާވެރިކަން ނިމުމަކަށް އަންނަން ޖެހޭކަން ފާހަގަކުރައްވައި، "ފުދިއްޖެ" ކަމަށާއި، "ދެން އިތުރަށް އެކަން ބަރުދާސްތު ކުރުމެއް ނެތް" ކަމުގައި ރައީސް ވިދާޅުވި އެެވެ. އިޒްރޭލުގެ އުދުވާނީ އަމަލުތައް ކުށްވެރި ކުރަމުން ދިޔަ ނަމަވެސް، އާރާއި ބާރު ލިބިފައިވާ ވެރިންގެ ކިބައިން އެކަށީގެންވާ ފިޔަވަޅުތަކެއް އަޅުއްވާ މަންޒަރު ފެނިގެންނުދާކަން ވެސް އެމަނިކުފާނުގެ ތަގުރީރުގައި ފާހަގަކުރެއްވި އެވެ.
އައިސީސީގައި 124 ގައުމެއް ހިމެނޭއިރު، އެ ކޯޓުގެ އަމުރެއް ރައްދުވާ މީހަކު އެއިން ގައުމަކަށް ހިނގައްޖެ ނަމަ ހައްޔަރުކުރަން ޖެހެ އެވެ. ނަމަވެސް އެފަދަ އަމުރުތައް ތަންފީޒު ކުރުމުގެ ބާރު އައިސީސީއަށް ލިބިދީފައެއް ނުވެ އެވެ.
