ކުޑަކުއްޖަކާ ބަދު އަހުލާގީ އަމަލު ހިންގި މީހަކު ދޫކޮށްލި ވާހަކައަކީ ދޮގެއް: ހީނާ
ކުޑަކުއްޖަކާ ބަދު އަހުލާގީ އަމަލު ހިންގައިގެން ހުކުމް ތަންފީޒު ކުރަމުންދާ މީހަކު ދޫކޮށްލި ކަމަށް ބުނެ، ސޯޝަލް މީޑިއާގައި ފަތުރަމުންދަނީ ހަގީގަތާ ހިލާފު ދޮގު ވާހަކައެއް ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެ އެވެ.
ހީނާ އެހެން ވިދާޅުވީ ކުޑަކުއްޖަކާ ބަދު އަހުލާގީ އަމަލު ހިންގައިގެން ހުކުމް ތަންފީޒު ކުރަމުންދާ ހއ. ހޯރަފުށި، އަންދަލީބުގެ، ހާޝިމް އިބްރާހިމް ދޫކޮށްލާފައިވާ ކަމަށް ބުނެ ސޯޝަލް މީޑިއާގެ ބައެއް އެކައުންޓުތަކުން ފަތުރަމުންދާ ވާހަކަތަކާ ގުޅިގެންނެވެ.
މޯލްޑިވްސް ކަރެކްޝަނަލް ސާވިސްއިން އާންމުކޮށްފައިވާ ނޫސް ބަޔާނެއް ހިއްސާކުރައްވާ މިރޭ "އެކްސް" ގައި ކުރެއްވި ޕޯސްޓެއްގައި ހީނާ ވިދާޅުވީ އެ ސާވިސްއިން ވަނީ ކަމުގެ ހަގީގަތް ހާމަކޮށްފައި ކަމަށެވެ.
ކަރެކްޝަންސްގެ ބަޔާނުގައި ބުނީ އުމުރުން 57 އަހަރުގެ ހާޝިމަކީ 2022 ވަނަ އަހަރުން ފެށިގެން ހުކުމް ތަންފީޒު ކުރުމަށް ޖަލަށްލާފައިވާ މީހެއް ކަމަށެވެ. އެ އަހަރުން ފެށިގެން ވެސް އުނަގަނޑުގެ މައްސަލައެއް ހުރެ، އެކަމުގެ ވޭން އޭނާ އައީ ތަހައްމަލު ކުރަމުން ކަމަށެވެ.
ހާޝިމްގެ ސާޖަރީ ރާއްޖޭން ކުރެވެން ނެތް ކަަމަށް ޑޮކްޓަރުން ދެއްވި ލަފާގެ މަތިން ކަރެކްޝަންސްގެ މެޑިކަލް ބޯޑުން ނިންމުމާ އެކު، އޭނާ ރާއްޖޭން ބޭރަށް ބޭސްފަރުވާއަށް ދިއުމުގެ ހުއްދަ މިދިޔަ އޮގަސްޓު މަހުގެ 5 ވަނަ ދުވަހު ދީފައިވާ ކަމަށެވެ. ބޭސްފަރުވާ ހޯދުމަށްފަހު ސެޕްޓެމްބަރު މަހުގެ 16 ވަނަ ދުވަހު އޭނާ އެނބުރި މާލެ އައިސްފައިވާ ކަމަށް ކަރެކްޝަންސްއިން ބުންޏެވެ.
"ހާޝިމް އަބޫބަކުރުގެ ބަލި ހާލަތު ހުރި ގޮތުން ، ޑޮކްޓަރު ދެއްވާފައިވާ ރެކަމެންޑޭޝަން އާ އެއްގޮތަށް ޖަލުގައި ބަހައްޓައިގެން ފަރުވާ ނުދެވޭނެތީ، އޭނާ ވަނީ ހުކުމް ތަންފީޒު ކުރުމަށް ވަގުތީ ގޮތުން ގޭބަންދުގައި ބެހެއްޓިފަ އެވެ،"
ކަރެކްޝަނުން ބުނި ގޮތުގައި އެ ސާވިސްއިން ދަނީ އޮންނަ އުސޫލާ އެއްގޮތަށް ހާޝިމް މޮނީޓާކޮށް ބަލަހައްޓަމުން ކަމުގަ އެވެ.
Ads by STO
