ހޯކްސް މައްސަލާގައި ޓްރާންސްޕޯޓުން ބުނީ ޕޯޓުތައް ގަވާއިދުން އޮޑިޓްކުރާ ކަމަށް
ރާއްޖޭގެ ޕޯޓްތައް ގަވާއިދުން އޮޑިޓް ކުރާ ކަމަށާއި، އޮޑިޓްގައި މުޅި ސަރަހައްދު ކެމެރާއަށް ކަވާ ނުވާކަން ފާހަގަ ކުރެވިއްޖެނަމަ، އެ ސަރަހައްދެއް ކަވާ ކުރެވޭ ގޮތަށް ކެމެރާތައް ބަހައްޓާ ކަމަށް ޓްރާންސްޕޯޓް މިނިސްޓްރީއިން މިއަދު ބުނެފި އެވެ.
މިދިޔަ އޮކްޓޯބަރު މަސް ތެރޭގައި ހޯކްސް ޕްރައިވެޑް ލިމިޓެޑްގެ ބޯޓެއް ކަމަށްވާ, "އެމްޓީ ހޯކްސް ޖަވާހިރު" ނަމަކަށް ކިޔާ ބޯޓަކުން ވަގަށް ރާއްޖެ އަށް އެތެރެކުރި ގިނަ އަދަދެއްގެ ސިނގިރޭޓްގެ މައްސަލާގައި ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ޓްރާންސްޕޯޓް މިނިސްޓްރީ ހާޒިރު ކުރި އެވެ. އެ މިނިސްޓްރީގެ ފަރާތުން ކޮމިޓީ ބައްދަލުވުމުގައި ބައިވެރިވެ ވަޑައިގެންނެވީ ސްޓޭޓް މިނިސްޓަރު އަބްދުލް ލަތީފް މުހައްމަދާއި، ޑެޕިއުޓީ މިނިސްޓަރު އިބްރާހިމް ޔާސިރު އެވެ.
ހޯކްސްއަކީ ތެޔޮ އެތެރެކޮސް ވިޔަފާރިކުރަމަށް މަޝްހޫރު ކުންފުންޏަކަށްވާއިރު ދުންފަތުގެ އިސްތިއުމާލު ކުރުމަށް ބޭނުންކުރާ އެއްވެސް ބާވަތެއް އެތެރެކުރުމުގެ އެއްވެސް ވިޔަފާރިއެއް ބައިވެރިވުމެއް އަދި އެފަދަ އެއްވެސް ޝައުގުވެރިކަމެއް ނެތް ކަމަށް އެ ކުންފުނިން ބުނެ އެވެ.
ކޮމިޓީ ބައްދަލުވުމުގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ލަތީފް ވިދާޅުވީ، މިނިސްޓްރީގެ މެންޑޭޓުގައި އޮންނަނީ އޮޑިޓް ކުރުން ކަމަށެވެ. އެގޮތުން ކޮންމެ އަހަރަކުވެސް ގަވާއިދުން އޮޑިޓް ކުރަމުންދާ ކަމަށް އޭނާ ވިދާޅުވި އެވެ. އަދި އޮޑިޓް ކުރާއިރު ގައިޑްލައިނަކަށް ބަލަނީ އޭއެސްޕީއެފް ކޯޑު ކަމަށް ވެސް ވިދާޅުވި އެވެ.
"މިހާރު ގާއިމްކޮށްފައިހުރި ހުރިހާ ފެސިލިޓީއެއް، ހާއްސަކޮށް ތިލަފުށީގައި ގާއިމްކޮށްފައި ހުރި ހުރިހާ ފެސިލިޓީއެއް އަހަރަކު އެއްފަހަރު އޮޑިޓް ކުރަން. އޮޑިޓް ކުރާއިރު ގައިޑްލައިނަކަށް މި ބަލަނީ އޭއެސްޕީއެފް ކޯޑު. ކޯޑުގަ ހުންނަ މިނިމަމް ރިކުއާމެނޓަށް ފެތޭ ހުރިހާ ކަމެއް ފުރިހަމަ ކޮށްގެން ހުއްދަ މި ދެނީ،" ލަތީފް ވިދާޅުވި އެވެ.
އޮޑިޓް ކުރުމުގެ ތެރެއިން ބޯޓެއް ޕޯޓުން ބޭރުގައި އޮވެއްޖެނަމަ، އެ ސަރަހައްދު ވެސް ކެމެރާއިން ކަވާ ކުރާކަން ޔަގީންކުރާ ކަމަށް ލަތީފް ވިދާޅުވި އެވެ. މީގެކުރިން އެފަދަ ކަމެއް ހިނގުމުން އަމަލުކުރި ގޮތް ހިއްސާކުރަމުން ލަތީފް ވިދާޅުވީ، "...އެގޮތަށް ހުރި ބޯޓެއް ފާހަގަކުރެވިގެން އެ ބޯޓުގެ އެ ސަރަހައްދު އެއްކޮށް ކަވާ ކުރެވޭނެ ގޮތަކަށް ކެމެރާ ހަރުކުރުމަށް ކުރި އޮޑިޓްގައި ފާހަގަކޮށް، އެކަންކަން ހަމަ ޖެއްސިން،" ކަމަށެވެ.
އިތުރަށް އޭނާ ވިދާޅުވީ، ޕޯޓްތަކުގައި ސީސީޓީވީ ކެމެރާއިން ސަރަހައްދު ކަވާ ނުކުރާނަމަ، މިހާރުވެސް އެ ސަރަހައްދުތައް ކަވާކުރުމަށް ލަފާ ދެވިދާނެ ކަމަށެވެ. މިހާރު އަމަލުކުރަމުންދާ ގޮތުން ހުރިހާ ޕޯޓް ފެސިލިޓީއެއް ސީސީޓީވީ ކެމެރާއިން ކަވާ ކުރެވޭކަން ފާހަގަ ކުރައްވާ، އެ ފުޓޭޖްތައް 90 ދުވަހަށް ބެކަޕް ކުރެވިފައި ހުންނާނެކަމަށް ވެސް ލަތީފް ވިދާޅުވި އެވެ.
ޕޯޓްތަކުގައި ކެމެރާ ހަރުކޮށް ބެލެހެއްޓެމުންދާއިރު، ކެމެރާ ފުޓޭޖް ބެލުމުގެ ހުއްދަ ކަސްޓަމްސް އަށާއި، އެމްއެންޑީއެފަށް އޮވެ އެވެ.
