ބަދަލުގެ ގޮތުގައި 2 ބިލިއަން ދިން މައްސަލާގައި ސޯލިހަށް ތަހުގީގު ހިންގަން އަންގަން ފާސްކޮށްފި
އެމްޑީޕީގެ ސަރުކާރުން އުފެއްދި ސެޓްލްމަންޓް ކޮމިޓީން ބަދަލުގެ ގޮތުގައި އެކި ފަރާތްތަކަށް ދީފައިވާ މުދަލާއި ފައިސާގެ މައްސަލާގައި ކުރީގެ ރައީސް އިބްރާހިމް މުހައްމަދު ސޯލިހުގެ މައްޗަށް ޖިނާއީ ތަހުގީގެއް ހިންގައި، ދައުވާ ކުރުމަށް ޕްރޮސިކިއުޓަ ޖެނެރަލަށް ލަފާދިނުމަށް ރައްޔިތުންގެ މަޖިލީހުން ފާސްކޮށްފި އެވެ.
އެގޮތަށް ފާސްކޮށްފައިވަނީ 55 މެންބަރުންގެ ވޯޓާ އެކު އެވެ. އެކަމާ ދެކޮޅަށް ވޯޓު ދެއްވީ 11 މެންބަރެކެވެ.
އެ މައްސަލައަކީ އިއްޔެ ބޭއްވި ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމަށް ހުށަހެޅި މައްސަލައެކެވެ. އެ ބައްދަލުވުމުގައި ސޯލިހު ހިމެނިވަޑައިގަންނަވާ ގޮތަށް ތިން ބޭފުޅެއްގެ މައްޗަށް ޖިނާއީ ތަހުގީގެއްކޮށް, ދައުވާކުރަން ލަފާދޭން ފާސްކޮށްފައިވެ އެވެ.
އެއީ ސެޓްލްމަންޓް ކޮމިޓީގައި ހިމެނިވަޑައިގަންނަވާ ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއީލާ އަދި ރައީސް އޮފީހުގެ ކުރީގެ މިނިސްޓަރު އަލީ ޝިޔާމެވެ.
އެ މައްސަލާގައި ބުނެފައިވަނީ 17 ނޮވެންބަރު 2018 އިން ފެށިގެން 17 ނޮވެންބަރު 2023 ގެ ނިޔަލަށް އެކި ފަރާތްތަކަށް ބަދަލުގެ ގޮތުގައި 36 ރަށަކާއި ފަޅަކާއި ދެ ބިލިއަން ރުފިޔާ ދީފައިވާ ކަމަށެވެ.
2019 އިން ފެށިގެން 2023 ވަނަ އަހަރާ ހަމައަށް ވެފައިވާ އެއްބަސްވުންތަކަކީ ބާތިލު އެއްބަސްވުންތަކެއް ކަމަށް ކަނޑައަޅާ, ބަދަލުގެ ގޮތުގައި ދީފައިވާ ތަކެތި އަނބުރާ ދައުލަތަށް ނެގުމަށް ކަމާ ގުޅުންހުރި ފަރާތްތަކަށް އަންގާފައިވެ އެވެ.
އެ މައްސަލަ ދިރާސާކޮށް އެކުލަވާލި ރިޕޯޓް ހުށަހަޅުއްވަމުން މާލިއްޔަތު ކޮމިޓީގެ މެންބަަރު, ދިއްގަރު ދާއިރާގެ ޕީއެންސީގެ މެންބަރު އަހުމަދު ނާޒިމް ވިދާޅުވީ އެ މައްސަލަ ބެލުމަށް ރައީސް އޮފީހާއި އޭޖީ އާއި އޮޑިޓާ ޖެނެރަލްގެ އޮފީހާއި ފިނޭންސް މިނިސްޓްރީ އަދި ޓޫރިޒަމް މިނިސްޓްރީގައި ހުރި ލިޔުންތައް ގެނެސްފައިވާ ކަމަށެވެ.
