ގުދުރަތީ ކާރިސާތަކަށް ވިލުންތެރިވުމަށް ރައީސް އިސްކަންދެއްވާ: ނައިބު ރައީސް
އަލަށް އެކުލަވާލި ރާއްޖޭގެ "ކާރިސީ ހިރާސް ކުޑަކުރުމުގެ އިސްތިރާޖު" މި ވެރިކަމުގެ ޅަފަތުގައި އެކުލަވާލެވުމުން ދައްކުވައިދެނީ، ރައީސް ޑރ. މުހައްމަދު މުއިއްޒުގެ ސިޔާސަތު ބައްޓަންކުރެއްވުމުގައި އެކަމަށް ދެއްވާ އަހަންމިއްޔަތުކަން ކަމުގައި ނައިބު ރައީސް ހުސައިން މުހައްމަދު ލަތީފު ވިދާޅުވެއްޖެ އެވެ.
އެމަނިކުފާނު އެހެން ވިދާޅުވީ، ސުނާމީ ކާރިސާއަށް 20 އަހަރު ފުރުމާ ގުޅުވައިގެން، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) ގެ ފަރާތުން އިންތިޒާމުކުރާ "ވިލުންތެރި 20" މައުރަޒު ހުޅުވުމަށް މިއަދު ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.
"ވެރިކަމަށް ވަޑައިގެންނެވިތާ އަހަރަކާ ކުޑަ ދުވަސްކޮޅެއްގެ ތެރޭގައި މިފަދަ އިސްތިރާޖެއް އެކުލަވާލެވުމުން ދައްކުވައިދެނީ އެމަނިކުފާނު [ރައީސް] ސިޔާސަތު ބައްޓަންކުރެއްވުމުގައި މި ކަންކަމަށް ދެއްވާ އަހަންމިއްޔަތުކަން ޔަގީން،" ނައިބު ރައީސް ވިދާޅުވި އެވެ.
"އާ ހިތްވަރަކާއި އަޒުމަކާ އެކު، ވިލުންތެރި ރާއްޖެއެއް ބިނާކުރުމުގެ ނަތީޖާ ހާސިލު ކުރުމަށް މިއަދު އަނެއްކާވެސް އަޅުގަނޑުމެން މި ތިބީ ނިކުމެ،" ނައިބު ރައީސް ފާހަގަކުރެއްވި އެވެ.
ރަސްމިއްޔާތުގައި ނައިބު ރައީސް ވަނީ ސުނާމީ ކާރިސާއިން ލިބުނު ގެއްލުންތަކުން އަރައިގަނެ، ވިލުންތެރި ފަތިހަކަށް ގައުމު ގެންދެވުނީ، މާތްﷲ މި ގައުމަށް މިންވަރުކުރައްވާފައިވާ އިސްލާމީ ހިދާޔަތުގެ ނޫރުގެ ސަބަބުންކަން ފާހަގަކުރައްވާފަ އެވެ. ކާރިސާގެ ވަގުތުގައި ދިވެހިން ދެއްކި އެއްބައިވަންތަކަމުގެ ނަމޫނާގެ ހަނދާން އާކުރައްވައި، ސަލާމަތީ ބާރުތަކާއި ދަރުމަވެރިންނާއި އާންމު ރައްޔިތުން، އެކަކު އަނެކެއްގެ ކިބައިން ހިތްވަރު ނެރެ، ގައުމީ ހިދުމަތުގައިވި ގުރުބާނީގެ އަގުވަޒަންކުރެއްވި އެވެ. އަދި ކާރިސާ އާއެކު އުފަންވި، އެންޑީއެމްއޭގެ މަސައްކަތްތަކަށް ވެސް އަލިއަޅުއްވާލެއްވި އެވެ.
"މި ކާރިސާއަށް ފަހު ވުޖޫދަށް އައި ނޭޝަނަލް ޑިޒާސްޓާ މެނޭޖްމަންޓް ސެންޓަރު މިއަދު އޮތޯރިޓީއަކަށް ބަދަލުވެ، ފުރިހަމަ ގާނޫނީ ބާރުވެރިކަމާ އެކު ކާރިސާގެ ހާލަތަކަށް އިޖާބަދިނުމާއި ތައްޔާރުވެ ތިބުމަށް އެ އޮތޯރިޓީން ކުރަމުންދާ މަސައްކަތްތައް ފާހަގަކޮށް، ފަށްފަށުން ޝުކުރު ދަންނަވަން،" ނައިބު ރައީސް ވިދާޅުވި އެވެ.
ސުނާމީ ކާރިސާއަށް 20 އަހަރު ފުރުމާ ގުޅުވައިގެން އެންޑީއެމްއޭގެ ފަރާތުން އިންތިޒާމުކުރާ މި މަޢުރަޒު ކުރިއަށްދަނީ ނޭޝަނަލް އާޓް ގެލެރީގަ އެވެ. އެ ރަސްމިއްޔާތުގައި ނައިބު ރައީސް ވަނީ އަންގާރަ ދުވަހު، ނޭޝަނަލް ޑިޒާސްޓާ މެނޭޖްމަންޓް ކައުންސިލުން ފާސްކުރި "މޯލްޑިވްސް ޑިޒާސްޓާ ރިސްކް ރިޑަކްޝަން ސްޓްރެޓަޖީ 2024-2030" ގެ ފޮތް އިފުތިތާހުކޮށްދެއްވާފަ އެވެ.
އަދި ރަސްމިއްޔާތުގައި ހުށަހެޅުއްވި އެއްބައިވަންތަކަމުގެ ދުވަހުގެ ހާއްސަ ލަވައެއް އެމަނިކުފާނު ބައްލަވާލެއްވި އެވެ. އެއަށްފަހު، މައުރަޒު ބައްލަވާލައްވައި، "ފަނޑުވުމެއް ނެތް ހަނދާންތައް" ސެގްމެންޓްގައި ސުނާމީ އާ ގުޅޭ ހާއްސަ މެސެޖެއް ލިޔުއްވި އެވެ. ރަސްމިއްޔާތުގައި "ވިލުންތެރި 20" މައުރަޒުގެ ފޮޓޯ ފޮތް ނައިބު ރައީސަށް ވަނީ އަރުވާފަ އެވެ.
ރާއްޖެއަށް ކުރިމަތިވި އެންމެ ނުރައްކާތެރި ކާރިސާ ހިނގާފައިވަނީ މީގެ 20 އަހަރު ކުރިން، ޑިސެމްބަރު މަހުގެ 26 ވީ އާދީއްތަ ދުވަހު ހެނދުނު 09:23 ގަ އެވެ.
Ads by STO
