އެންޑީއެމްއޭ ގެ ދިފާޢު ގައި ރޮޒެއިނާ: ވައްކަމެއް، ކޮރަޕްޝަނެއް ނުހިންގާ!
ކޮވިޑް-19 އާއި ގުޅިގެން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ކޮށްފައިވާ ޚަރަދުތަކާއި ގުޅޭގޮތުން އުފުލިފައިވާ ތުހުމަތުތައް އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ދިފާޢު ކުރައްވައިފިއެވެ.
އެގޮތުން އޮޑިޓާ ޖެނެރަލްގެ އޮފީހުން އެކުލަވާލި އެންޑީއެމްއޭ ގެ ކޮމްޕްލަޔަންސް އޮޑިޓު ރިޕޯޓުން އިދާރީ ބައެއް ކަހަލަ ކަންކަން ފާހަގަވި ނަމަވެސް، ބޮޑު ވައްކަމެއް ކޮށްގެން ނުވަތަ ކޮރަޕްޝަންގެ އަމަލެއް ހިންގައިގެން ނޫޅޭ ކަމަށް ރޮޒެއިނާ ވަނީ ވިދާޅުވެފައެވެ.
މިމަހުގެ 16 ވަނަ ދުވަހު ނެރުނު އެރިޕޯޓުގައި ކޮވިޑާއި ގުޅިގެން ކޮށްފައިވާ ޚަރަދުތަކާއި ގުޅޭ މައްސަލަތަކެއް ފާހަގަކޮށްފައި ވާއިރު، ގިނަ ބައެއްގެ ފާޑުކިޔުން ވެސް އެ އޮތޯރިޓީއަށް ވަނީ އަމާޒުވެފައެވެ.
އެންޑީއެމްއޭ އިން އެތުހުމަތުތަކާއި ގުޅިގެން އިއްޔެ ނޫސް ކޮންފަރެންސެއް ވެސް ބާއްވާފައިވާއިރު އޮޑިޓު ރިޕޯޓުން ފާހަގަ ކޮށްފައިވާ ކޮންމެ ނުކުތާއެއް ވަކިވަކިން ތަފްސީލު ވެސް ކޮށް ދެއްވިއެވެ.
ރާއްޖެޓީވީން ރޭގައި ދެއްކި ޕްރޮގްރާމެއްގައި ބައިވެރިވެ ވަޑައިގެން މެންބަރު ރޮޒެއިނާ ވިދާޅުވީ އެންޑީއެމްއޭ ގެ ރިޕޯޓު އާންމުވުމުން ވެގެން އުޅޭގޮތަކާ މެދު ސުވާލު އުފެދުނު ކަމަށާއި އަދި ރިޕޯޓާ ގުޅިގެން އެންޑީއެމްއޭ އިން ބުނާ އެއްޗެއް ބަލަން ބޭނުންވެފައި ހުރި ކަމަށެވެ.
އެރިޕޯޓުގައި ވެސް އެންޑީއެމްއޭއިން ކޮރަޕްޝަނެއް ހިންގާފައިވާ ކަމަށް ނުވަތަ ރާވައިގެން ވައްކަމެއް ކޮށްފައިވާ ކަމަށް ތުހުމަތުކޮށްފައި ނުވާކަން ރޮޒެއިނާ ފާހަގަ ކުރެއްވިއެވެ.
"ފާހަގަކުރެވިފައި ހުރީ އިދާރީގޮތުން ފުރިހަމަ ކުރަންޖެހޭ ބައެއް ކަންތައްތައް ފުރިހަމަ ނުކޮށް އޮތްކަން. އެކަންކަމާ ގުޅިގެން ވަރަށް ރީޒަނަބަލް އެކްސްޕްލަނޭޝަންސް ދެއްވާފަ އެވަނީ ޑިޒާސްޓާއިން" އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވިއެވެ.
