ގުޅީފަޅުގެ މަގުތަކާއި މުނިސިޕަލް އިމާރާތްތައް އެޅުމަށް ސީއެމްއީސީ އާ ހަވާލުކޮށްފި
ކ. ގުޅީފަޅުގައި ހިއްކައި އާބާދުކުރާ ބިމުގެ މަގުތައް ހެދުމާއި ބޭނުންވާ މުނިސިޕަލް އިމާރާތްތައް އެޅުމުގެ މަސައްކަތް ކުރުމަށް ޗައިނާ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ) އާއެކު ސޮއިކޮށްފި އެވެ.
މަޝްރޫއުގެ މަސައްކަތް ސީއެމްއީސީ އާ ހަވާލުކޮށްފައި ވަނީ މިއަދު ހެނދުނު ރައީސް އޮފީހުގައި ބޭއްވި ހާއްސަ ރަސްމިއްޔާތެއްގަ އެވެ. ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބެވެ. ސީއެމްއީސީގެ ފަރާތުން ސޮއިކުރައްވާފައި ވަނީ އެ ކުންފުނީގެ ރީޖަނަލް ޖެނެރަލް މެނޭޖަރު ޝެން ހައު ޖިން އެވެ.
ރަސްމިއްޔާތުގައި ވާހަކަ ދައްކަވަމުން އިންފްރާސްޓްރަކްޗާ މިނިސްޓަރު މުއްތޮލިބު ވިދާޅުވީ މިއަދު ވެވުނު އެއްބަސްވުމާ ހަމައަށް އާދެވުނީ ޗައިނާއަށް ރައީސް ޑރ. މުހައްމަދު މުއިއްޒު ކުރެއްވި ފުރަމާނަ ދަތުރުފުޅުގެ ތެރެއިން އިންފްރާސްޓްރަކްޗާ މިނިސްޓްރީ އާ ސީއެމްއީސީ އާއެކު ވެވުނު އެމްއޯޔޫއެއްގެ ދަށުން ކުރެވުނު މަސައްކަތްތަކުގެ ސަބަބުން ކަމަށެވެ.
މިހާތަނަށް އައިއިރު މިނިސްޓްރީ އާ ސީއެމްއީސީ އާ ދެމެދު ޓެކްނިކަލް ލެވެލްގައި ވަރަށް ބައިވަރު މަސައްކަތްތައް ކުރެވިފައިވާކަން ފާހަގަކުރެއްވި އެވެ. އެގޮތުން ޕްރޮޖެކްޓް ސްކޯޕިން އާއި ޓެކްނިކަލް ސްޕެސިފިކޭޝަން ތައްޔާރުކުރުމާ އަދި ކޮންސެޕްޓް ލެެވެލްގެ ޑިޒައިން މަސައްކަތްތައް ކުރެވިފައިވާ ކަމަށް ވިދާޅުވި އެވެ.
"މި ހުރިހާ މަސައްކަތަކަށް ފަހު ކޮންޓްރެކްޓާ ފައިނޭންސް ހަމަޖައްސާ ގޮތަށް ސީއެމްއީސީން ހުށަހެޅި ޕްރޮޕޯސަލް އިވެލުއޭޓްކޮށް، އެޔާ މެދު ކުރެވުނު މަޝްވަރާތަކަށް ފަހު ކޮންޓްރެކްޓަކާ ހަމައަށް މި ވަނީ އާދެވިފައި،"
ގުޅީފަޅުގެ މަގުތަކާއި މުނިސިޕަލް އިމާރާތްތައް އެޅުމަށް ސީއެމްއީސީ އާއެކު އެއްބަސްވުން / ފޮޓޯ:ރައީސް އޮފީސް
މި މަޝްރޫއުގެ ދަށުން ގުޅީފަޅުގެ 300 ހެކްޓަރުގެ ބިމުގެ މަގުތައް ޒަމާނީ ފެންވަރަށް ހަދައި އިލެކްޓްރިކްސިޓީ ޑިސްޓްރިބިއުޝަން ނެޓްވޯކަކާއި ޑިއު ވޯޓަރިން ސިސްޓަމަކާއި ގިގަބިޓް އީތަނެޓް ޕެސިވް އޮޕްޓިކަލް ނެޓްވޯކް (ޖީޕީއޯއެން) ޑަކްޓް ސިސްޓަމެއްގެ އިތުރުން ގޭސް ސްޓޯރޭޖާއި ޑިސްޓްރިބިއުޝަން ސިސްޓަމެއް ގާއިމުކުރާނެ އެވެ. އަދި މުޅި ގުޅީފަޅުގައި ފެނާއި ނަރުދަމާ ނިޒާމު ގާއިމުކުރުމުގެ މަސައްކަތް ވެސް އެ ކުންފުނިން ކުރާނެ އެވެ.
މިނިސްޓަރު ވިދާޅުވި ގޮތުގައި އެއްބަސްވުމުގައި ސޮއިކުރެވުމާ އެކު ސާވޭ އަދި ޑީޓެއިލް ޑިޒައިންގެ މަސައްކަތް ކޮންޓްރެކްޓަރު ފަށާނެ ކަމުގަ އެވެ. އޭގެ އިތުރުން ސައިޓް ތައްޔާރު ކުރުމުގެ މަސައްކަތް ލަސްތަކެއް ނުވެ ފަށާނެ ކަމުގަ އެވެ.
ތިލަމާލެ ބްރިޖުގެ މަސައްކަތަށް ގުޅީފަޅުގެ ބިމުން ބޮޑު ބައެއް ނަގާފައި ވުމުން މިވަގުތު ހިދުމަތްތައް ދިނުމުގައި ދަތިތަކެއް ހުރި ކަމަށް ފާހަގަކުރެއްވި އެވެ. އެހެން ނަމަވެސް މަސައްކަތް ކުރެވެން ހުރި ބިންތައް ބަލައި "ފޭސް އައުޓް" ކޮށްގެން މަސައްކަތްތައް ކުރިއަށް ގެންދިއުމަށް އެއްބަސްވެވިފައިވާ ކަމަށް މުއްތޮލިބު ވިދާޅުވި އެވެ.
އިތުރަށް ވިދާޅުވީ މި ސަރުކާރަކީ ރާއްޖޭގެ ހުރިހާ ސަރަހައްދެއްގެ ތަރައްގީއަކަށް އިސްކަންދޭނެ ސަރުކާރެއް ކަަމަށެވެެ. ނަމަވެސް ގްރޭޓާ މާލެ ސަރަހައްދަކީ ކޮންމެ އަހަރަކު ވެސް އެތައް ސަތޭކަ ބައެއް ހިޖުރަކުރާ ސަރަހައްދަކަށް ވުމާ އެކު، މި ސަރަހައްދުގައި ދިރިއުޅޭ ފަރާތްތަކުގެ ދިރިއުޅުން ފަސޭހަ ކުރުމަކީ ރައީސް ޑރ. މުހައްމަދު މުއިއްޒު ވަރަށް ބޮޑަށް އިސްކަންދެއްވާ ކަމެއް ކަމަށެވެ.
Ads by STO
