ދިރިހުރި ދުވަހު ހާލު ނުބެލޭ ބަޔަކު މަރުވާ ދުވަހު މޫނު ނުބެލިޔަސް ހެޔޮ!
ރައްޓެހިންގެ އަދަދު މަދެއް ނޫނެވެ. މީސްމީޑިއާގެ އެކި މަންސަތަކުގައި ބައިވަރު ރައްޓެހިން އެބަތިއްބެވެ. ފޭސްބުކުގައި އެތައް ހާސް ރައްޓެހިންނެކެވެ. އިންސްޓަގްރާމްގައި އެތައް ހާސް ފޮލޯވަރުންނެކެވެ. އަދި ވައިބާ އާއި ވަޓްސް އެޕްގައި ގުނާ އަދަދު ނުކުރެވޭހާ ގުރޫޕު ތަކާއި ރައްޓެހިންނެވެ.
ގިނަ ރައްޓެހިންތަކެއް ދިރިއުޅުމަށް ދުވަސްކޮޅަކަށް އާދެއެވެ. މެހެމާނެއް ފަދައިންނެވެ. ދެތިން ހަތަރު މަހު ދިރިއުޅުމުގައި މަޑުކޮށްލުމަށްފަހު އެފަދަ ރައްޓެހިން ގެއްލެއެވެ. ފަހަރުގައި އެފަދަ ރައްޓެހިންނަށް އަހަރެން ކަމު ނުދަނީއެވެ. ނުވަތަ އަހަރެންގެ ފަރާތުން އެމީހުން ބޭނުންވާ ކަމެއް ނުފުދެނީއެވެ. އެހެން ނަމަވެސް އެހާ ގާތުގައި އެކުގައި އުޅެފައި ވަކިވެގެން ދިއުމަކީ ހިތަށް ހާދަ އުނދަގޫ ވާ ކަމެކެވެ. ހިތުގައި ހާދަހާ ބޮޑު ލައްގަނޑެއް ޖެހޭ ކަމެކެވެ. ނަމަވެސް މައްސަލައެއް ނެތެވެ. އެމީހުން އަހަރެން ދޫކޮށްލާފައި އެދިޔައީ އެމީހުންނަށް އަހަރެން މުހިންމު ނުވީމައެވެ.
ހަގީގީ ރަހުމަތްތެރިންނަކީ ކޮބައިކަން އެނގޭނީ ތިބާ ހާލުގައި ޖެހޭ ދުވަހުއެވެ. ތިބާގެ އަތްމަތިދަތިވެ ތިބާގެ ދިރިއުޅުމުގައި އަޑިގުޑަންތަކާ ކުރިމަތިލާން ޖެހުމުންނެވެ. އޭރުން ތިބާއަށް ހަގީގީ ރަހުމަތްތެރިންނަކީ ކޮބައިކަން އެނގިދާނެއެވެ. ހަމައެކަނި ކަމެއް ޖެހުމުން ގުޅާލާ މީހުންނަކީ ހަގީގީ ރަހުމަތްތެރިން ކަމުގައި ނުދެކޭށެވެ. އެއީ ހަގީގީ ރަހުމަތްތެރިންނެއް ނޫނެވެ. އެމީހުންނަށް ތިބާ މުހިންމު ވާނަމަ ތިބާގެ އިއްޒަތަކީ އެމީހުންގެ ކުރިމަތީގައި ފެން ކައްކާ ބޮލީގެ އިއްޒަތަކަށް ނުވާނެއެވެ. އެއަށްވުރެ ތިބާގެ އިއްޒަތް އެމީހުންނަށް މަތިވެރިވެފައި މުހިންމުވާން ޖެހޭނެއެވެ. އެހެން ނުވާނަމަ ތިއީ އެކުވެރިންނެއް ނޫނެވެ. ދުުރުހިލޭ މީހުން ވެސް ކަމެއް ޖެހުނީމާ ޚަބަރެއް ވެދާނެއެވެ.
މިއަދު ވެސް އަހަރެން ބަލި އެނދެއްގައި އޮންނަން ޖެހިއްޖެނަމަ އަހަރެންގެ ހާލު ބަލަން އަންނާނީ ކިތައް ރައްޓެހިން ބާވައޭ އަހަރެންގެ ހިތަށް އަރައެެވެ. އަތްމަތި ދަތިވެ ހާލުގައި ޖެހި މަގުމަތިވާ ދުވަހެއް އަތުވެއްޖެނަމަ އަހަަރެން ދަންނަ ކަމަށް ހަދާނީ އަހަރެންގެ ކިތައް ރަހުމަތްތެރިން ބާވައޭ އަހަރެންގެ ހިތަށް އަރައެވެ. އެދުވަހުން އެ ރަހުމަތްތެރިންވެސް އަހަރެން ދޫކޮށްފައި ދާނީ ކަންނޭނގެއެވެ. އެއީ ދުނިޔޭގެ އާދައެވެ. ރައްޓެހިން ގިނަވާނީ ތިބާ މަޝްހޫރުވެފައި މުއްސަނދިވި ވަރަކަށެވެ. ނަމަވެސް އެއީ ތިބާގެ ރައްޓެހިންނެއް ނޫނެވެ. އެއީ ތިބާގެ މަޝްހޫރު ކަމާއި މުއްސަނދި ކަމުގައި ތިބާއާއެކު އުޅޭ މީހުންނެވެ.
މިއަދު އަހަރެންގެ ހާލުބެލުން އަހަރެންގެ ރައްޓެހިންނަށް މުހިއްމެއް ނޫނެވެ. އަަހަރެން ހުރީ ކޮން ހާލެއްގައިތޯ ބަލާލުމަކީ ބޭނުންތެރި ކަމެއް ކަމުގައި އެމީހުން ނުދެކެއެވެ. އަހަރެން ދިރިއުޅުން ހުރީ ކޮން ހާލަތެއްގައި ތޯ ބަލާލުމަކިީ އެމީހުންނަށް އެއްވެސް ބޭނުމެއް ނެތް ކަމަކަށް ވަނީ ކަންނޭނގެއެވެ. މިއަދު އަަހަރެން އޮތީ ހޮސްޕިޓަލުގައި ބަލި އެނދެއްގައިތޯ ވެސް ބަލާލުމަކީ އެމީހުންނަށް މާ މުހިއްމުކަމެއް ނޫނެވެ. ބަލިވެ އުޅޭ ޚަބަރެއް ލިބިއްޖެ ނަމަ މީސްމީޑިއާގައި "ގެޓް ވެލް ސޫން" ޖަހާލުމުން އެ ނިމުނީއެވެ.
އެހެނަސް ކަން އޮތް ގޮތަކީ އެއެއް ނޫނެވެ. އެމީހަކު ބަލި އެނދުގައި އޮންނަ އިރު އެމީހެއްގެ ހާލު ބަލާލާ އެމީހަކަށް ޒިޔާރަތް ކޮށްލުމަށް އެމީހެއްގެ ރަހުމަތްތެރިން އައުމަކީ އެމީހެއްގެ ހިތަށް ހާދަހާ ބޮޑު ތަސައްލީއެއް ލިބޭނޭ ކަމެކެވެ. ފޭސްބުކުގައި "ގެޓްވެލް ސޫން" ޖަހާލާ ގޭގައި އަރާމް ކުރަން އޮތަކަސް ، ބަލަ! އަހަންނަކަށް ވާނޭ ފައިދާއެއް ނޯންނާނެއެވެ. ފަހަރުގައި އަހަރެން ގުނަމުންދަނީ އަހަރެންގެ ފަހު ދުވަސްތައް ކަމުގައިވެސް ވެދާނެއެވެ. މިއަދު އަހަރެންގެ ގާތަށް ޒިޔާރަތްކޮށް އަހަރެން ހެއްވާލަ ނުދީފިނަމަ އެ އެކުވެރިންނަށް އަހަރެންގެ ހިނިތުންވުން ނުފެނި ވެސް ދާނެއެވެ.
އަހަރެންގެ މަރުގެ ހަބަރު އެ އެކުވެރިންނަށް ލިބޭނީ ކޮން ދުވަހަކުން ކަމެއް އެކަކަށް ވެސް ނޭނގޭނެއެވެ. އެދުވަހަކުން އަަނެއްކާ ވެސް އަހަރެންގެ ވާހަކަތައް މީސްމީޑިއާގައި ހިއްސާކުރާނެއެވެ. ތައުޒިޔާގެ މެސެޖުތަކުން މުޅި މީސްމީޑިއާ ފުރާލާނެއެެވެ. ނަމަވެސް އެދުވަހަކުން އަހަންނަކަށް އެކަމަކުން ފައިދާއެއް ނުކުރާނެއެވެ. އެދުވަހުން އަހަރެންގެ މޫނު ބަލަން އެ އެކުވެރިން އަންނާނެއެވެ. ނަމަވެސް އަހަރެންގެ ހިނިތުންވުމެއް އެދުވަހަކުން ނުފެންނާނެއެވެ. އަހަރެންނަށް ފޭސްބުކުގައި "ގެޓްވެލްސޫން" ކިޔާލުމަށްފަހު އަހަރެންގެ ހާލު ނުބަލާ ގޭގައި އަރާމް ކުރަން އޮތް އެކުވެރިޔާ އެވެ. ތިބާ އަހަރެންގެ މޫނު ބަލަން ނަޔަސް އަހަންނަށް ހެވެވެ.
