ޒަމާނީ ފެންވަރަށް އައްޑޫ ލިންކް ރޯޑް ތަރައްގީކުރަން 829 މިލިއަނަށް އާރުޑީސީއަށް
ޒަމާނީ ފެންވަރަށް އައްޑޫ ލިންކް ރޯޑް ތަރައްގީކުރުމަށް 829.7 މިލިއަން ރުފިޔާއަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކޮށްފި އެވެ.
އައްޑޫ ސިޓީގެ ލިންކް ރޯޑް މަގުތަކާއި ފެން ހިންދާ ނިޒާމު ޒަމާނީ ފެންވަރަށް ތަރައްގީކުރުމުގެ އެއްބަސްވުމުގައި ސޮއިކޮށްފައި ވަނީ ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓްރީގައި މިއަދު ބޭއްވި ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި އެއްބަސްވުމުގައި އިންފްރާސްޓްރަކްޗާ މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަބްދުﷲ މުއްތޮލިބެވެ. އާރުޑީސީގެ ފަރާތުން ސޮއިކުރައްވާފައި ވަނީ އެ ކުންފުނީގެ މެނޭޖިން ޑިރެކްޓަރު އަލީ ޒުހައިރެވެ.
ރަސްމިއްޔާތުގައި އައްޑޫ ސިޓީގެ ފޭދޫ ދެކުނު ދާއިރާގެ މެމްބަރު އިބްރާހީމްދީދީ، ފޭދޫ އުތުރު ދާއިރާގެ މެމްބަރު އިސްމާއީލް ނިޒާރު އަދި ހިތަދޫ އުތުރު ދާއިރާގެ މެމްބަރު މުހައްމަދު ސިނާން ބައިވެރިވެވަޑައިގެންނެވި އެވެ.
މި މަޝްރޫއުގެ ދަށުން އައްޑޫ ލިންކް ރޯޑް ޒަމާނީ ފެންވަރަށް އަލުން ތަރައްގީކުރާނެ އެވެ. އެގޮތުން:
- 67.58 ކިލޯމީޓަރުގެ ސީޓީބީ އަޅާފައިވާ މަގުތަކުގައި ތާރު ނުވަތަ ގާ އެޅުން
- ފޭދޫގައި ފެން ހިންދާ ނިޒާމް ގާއިމުކުރުން
- ދުވާރުތައް ހެދުން
- ރޯޑް މާކިން އަދި ސައިން ބޯޑް ހަރުކުރުން
މަޝްރޫއުގެ މަސައްކަތް އާރުޑީސީ އާ ހަވާލުކުރީ 829.7 މިލިއަން ރުފިޔާއަށް 1،440 ދުވަހުގެ ތެރޭގައި ނިންމާ ގޮތަށެވެ. އެއީ ގާތްގަނޑަކަށް ހަތަރު އަހަރު ދުވަހުގެ މުއްދަތެކެވެ.
Ads by STO
