ކޯވިޑް19 އާއި ގުޅިގެން ކެންސަލުކުރި ޓިކެޓްތަކުގެ ރިފަންޑު ދޭން ޖެހޭނެ: އީޔޫ
ކޯވިޑް 19ގެ ސަބަބުން، ކެންސަލުކުރި ފްލައިޓްތަކުން ޓިކެޓް ނަގާފައިވާ މީހުންނަށް ރިފަންޑު ދޭން ޖެހޭނެ ކަމަށް ޔޫރަޕިއަން ޔޫނިއަން އިން ބުނެފިއެވެ.
އީޔޫގެ ޓްރާންސްޕޯޓް ކޮމިޝަނަރ، އަޑީނާ ވެލިއަން ބުނީ، ދުނިޔެއަށް ބަލިމަޑުކަމެއްގެ ގޮތުގައި ނިންމާފައިވާ ކޯވިޑް 19 ވައިރަސް ޖެހިގެން ވަރަށް ގިނަ އެއާލައިން ކޮމްޕެނީތަކެއްގެ ފްލައިޓްތައް ކެންސަލް ކުރަން ޖެހިފައިވާ ކަމަށެވެ. އަދި ފްލައިޓްތައް ކެންސަލު ކުރަން ޖެހުމުން، އަލުން ދަތުރު ކުރަން ބޭނުންވާ މީހުންނަށް އެ ފުރުސަތު ، ދަތުރު ކުރަން ބޭނުން ނުވާ މީހުންނަށް ރިފަންޑް ދޭން ޖެހޭނެ ކަމަށް ވެލިއަން ބުނެފައިވެއެވެ.
ބޮޑެތި އެއާލަައިން ކުންފުނިތަކުން ކަސްޓަމަރުންނަށް ރިފަންޑް ދިނުމަށް ދެކޮޅު ހަދާ ކަމުގެ މައުލޫމާތުތަކެއް ލިބިފައިވާ ކަމަށްވެސް އީޔޫއިން ބުނެފައިވެއެވެ.
ކެންސަލް ވި ފްލައިޓްތަކުން ކަސްޓަމަރުންނަށް ރިފަންޑުގެ ގޮތުގައި ދައްކަން ޖެހޭ ފައިސާގެ އަދަދު 3.90 ބިލިއަން ޑޮލަރަށް އަރާނެ ތަފާސް ހިސާބުތަކުން ދައްކައެވެ.
ވެލިއަން ބުނީ، މިހާރުވެސް ގިނަ އެއަރލައިން ކުންފުނިތަކުން ދަނީ މާލީ އެހީތެރިކަމަށް އެދި ސަރުކާރަށް އާދޭސް ކުރަމުން ނެވެ.
ކޯވިޑް 19 ބަލި ޖެހުނު މީހުންގެ އަދަދު ދޮޅު މިލިއަނަށް ވަނީ އަރާފައެވެ. މި ނުރައްކާތެރި ބަލީގައި މަރުވި މީހުންގެ އަދަދު ވަނީ 83416 އަށްވުރެ މަތިވެފައެވެ. ދުނިޔޭގެ ސިއްހަތު ޖަމިއްޔާއިން މިވަނީ ކޯވިޑް 19 އަކީ ދުނިޔެއަށް ބަލި މަޑުކަމެއްގެ ގޮތުގައި ކަނޑައަޅާފައެވެ.
