ހިތަށް އަނިޔާވާ އެންމެހާ ކަންކަމުން ދުރުހެލިވާން ޖެހޭ: މިނިސްޓަރ އަސްލަމް
ހިތުގެ ދުޅަހެޔޮ ކަމަށްޓަކައި ހިތަށް އަނިޔާވާ އެންމެހާ ކަންކަމުން ދުރުހެލިވާން ޖެހޭކަމަށް ހެލްތު މިނިސްޓްރީ ހިންގުމާއި ހަވާލުވެ ހުންނެވި މިނިސްޓަރ މުޙައްމަދު އަސްލަމް ވިދާޅުވެއްޖެއެވެ.
މިއަދު ފާހަގަ ކުރާ "ވޯލްޑް ހާޓް ޑޭ"އާ ގުޅިގެން މިނިސްޓަރ އަސްލަމް ދެއްވި މެސެޖެއްގައި ވިދާޅުވެފައި ވަނީ ކޮވިޑް-19 ގެ ބަލިމަޑުކަމުގެ ތެރެއިން މުޅި ދުނިޔެ ވެސް ހޭދަ ކުރަމުން ދަނީ ހިތާމަވެރި ދުވަސްތަކެއް ކަމަށާއި މިފަދަ ދުވަސްވަރެއްގައި ދުޅަހެޔޮ ސިއްޙަތެއްގައި ތިބެން މަސައްކަތް ކުރަން ޖެހޭ ކަމަަށެވެ.
އެގޮތުން ދުޅަހެޔޮ ހަޔާތެއް ލިބުން ވަނީ ދުޅަހެޔޮ ހިތަކާއިއެކު ކަމަށް ވެސް މިނިސްޓަރ އަސްލަމް ވިދާޅުވިއެވެ.
"މިފަދަ ދުވަސްވަރެއްގައި ވެސް އަޅުގަނޑުމެން ދުޅަހެޔޮ ސިއްހަތެއްގައި ތިބެން މަސައްކަތް ކުރަން ޖެހޭ. ކަސްރަތު ކުރުމާއި ސިއްހަތަށް ރަނގަޅު ކާނާ ކެއުމާއި ހިތްހަމަޖެހުން ލިބިގަންނަން ޖެހޭ. މާތް ﷲ ގެ އިރާދަފުޅާއެކު އަޅުގަނޑުމެން މި ހިތްދަތި ދުވަސްތަކުން އަރައިގަންނާނަން. ދިވެހި ހުރިހާ ރައްޔިތުންނަށް ވެސް އުފާވެރިކަމާއި ދުޅަހެޔޮ ސިއްހަތަކަށް އެދެން، އާމީން،" މިނިސްޓަރ އަސްލަމް ވިދާޅުވެފައިވެއެވެ.
