މިއޮތީ ބަރުދަން ލުއި ކުރުމަށް އަމިއްލަ ނަފްސަށް ހިތްވަރު ލިބޭނެ ވަރަށް ފަސޭހަ 5 ކަމެއް!
ވަރަށް ގިނަ މީހުން ބަރުދަން ލުއި ކުރުމަށް އެކި ކަހަލަ ކަންތައްތައް ކުރަން ފަށާ މަންޒަރު ފެނެއެވެ. ނަމަވެސް ދުވަސްކޮޅެއް ވެސް ނުވެ ދެން ފެންނާނީ އެކަން ހުއްޓާލާ މަންޒަރެވެ. ނަމަވެސް ދެތިން ދުވަހަކު ދުވަން ގޮސްގެން، ނުވަތަ ދެތިން ދުވަހަކު ޖިމަށް ގޮސްގެން 70 ކިލޯގެ މީހަކު 30 ކިލޯ އަށް ބަދަލުވާނެ ކަމަށް ހީކުރާނަމަ ތިޔަ ކުރެވެނީ ކުށްހީއެކެވެ. ކަސްރަތު ކުރަން ގޮސް 3 ދުވަހުގެ ތެރޭގައި ކަސްރަތު ކުުރުމަށް ހިތްވަރު އެލި އައިސްފައިވާ ޖޯޝު ގެއްލެނީ ކަމުގައިވެސް ވެދާނެއެވެ.
މިފަދަ މީހުންނަށް ބަރުދަން ލުއި ކުރުމަށް އަމިއްލަ ނަފްސަށް ހިތްވަރު ލިބޭނެ ވަރަށް ފަސޭހަ 5 ކަމެއް އެބައޮތެވެ.
1- ބަރުދަން ލުއި ކުރުމަށް ބޭނުންވާ ސަބަބު އަބަދުވެސް ހަނދާނުގައި ބަހައްޓާށެވެ.
ކޮންމެ މީހަކުވެސް ބަރުދަން ލުއި ކުރުމަށް ބޭނުން ވާނީ ސަބަބު ތަކަކަށް ޓަކައި ކަން ގައިމެވެ. އެގޮތުން ބަރުދަން ލުއި ކުރުމަށް ތިބާގެ އަމިއްލަ ނަފްސަށް ހިތްވަރު ދިނުމުގެ ގޮތުން ކުރެވިދާނެ ފުރަތަމަ ކަމަކީ ބަރުދަން ލުއި ކުރުމަށް ތިބާ ބޭނުންވާ ސަބަބު ތިބާގެ ހަނދާނުގައި އަބަދު ވެސް ބެހެއްޓުމެވެ، އަދި މިކަންތައްތައް ތިބާއަށް ފެންނަ ތަނެއްގައި ނޯޓު ވެސް ކުރެވިދާނެެއެވެ، ނަތީޖާއެއްގެ ގޮތުން އެ ލިޔުންތައް ފެނުމުން، ކަސްރަތު ކުރުމަށް ތިބާއަށް ހިތްވަރު ލިބި އެކަމުގައި ދެމި ހުރުމަށް ފަސޭހަ ވެގެން ދާނެއެވެ. ބަރުދަން ލުއި ކުރުމަށް މީހުން ބޭނުންވާ ބައެއް ސަބަބުތަކުގެ ތެރޭގައި އާންމުންގެ ތެރޭގައި ތިމާގެ ހަށިގަނޑު ރީތިކޮށް ބެހެއްޓުމަށާއި ހަކުރުބަލި ހުންނަ މީހުން ދުޅަހެޔޮކަން މަތީ ހުރުމަށް މަގުފަހިވުން ހިމެނެއެވެ.
2- ހާސިލްކުރަން ބޭނުންވާ ލަނޑުދަނޑިއެއް ކަނޑައަޅާށެެވެ.
ބަރުދަން ލުއިކުރުމަށް މަސައްކަތް ފެށުމުގެ ކުރިން ބަރުދަން ލުއި ކުރުމުގައި ތިބާގެ ލަނޑުދަނޑި އެއް ކަނޑައަޅަން ވާނެއެވެ. ފުރަތަމަ ކަމަކަށް، ހަފްތާއެއްގެ ތެރޭގައި 1 ކިލޯ ނުވަތަ ދެކިލޯ ލުއި ކުރުމަށް ވެސް އަޒުމު ކަނޑައެޅިދާނެއެވެ. އެގޮތުން ފެށުމުގެ ގޮތުން ކުޑަ ލަނޑުދަނޑިތަކެއް ކަނޑައަޅާށެވެ. ދެން އެއަށްފަހު، ދުވަަހަކަށްވުރެ ދުވަހެއް ހާސިލުކުރަން ބޭނުންވާ ލަނޑުދަނޑިތައް ގިނަ ކުރާނީއެވެ.
3- ދިރިއުޅުމާއި ގުޅޭނެ ގޮތަކަށް ކަންކަން ރާވާލާށެވެ.
ބަރުދަން ލުއި ކުރުމަށް ވަރަށް ގިނަ އެކި ބާވަތްތަކުގެ ކަންތައްތައް ކުރެވިދާނެއެވެ. އަދި އެކަންތައްތައް އެކި ގޮތް ގޮތަށް ވެސް ރާވާލެވިދާނެއެވެ. އެގޮތުން ވަރަށް އުނދަގޫ ގޮތްތަކާއި ވަރަށް ފަސޭހަ ގޮތްތައް ވެސް ހުންނާނެއެވެ. އެހެން ނަމަވެސް އެތަނުން ޚިޔާރު ކުރަން ވާނީ ތިބާގެ ދިރިއުޅުމާއި ގުޅޭނެ ކަހަލަ "ޑައިޓް ޕްލޭން" އެކެވެ. ގިނަ ދުވަސް ތަކަކަށް ފޫހިނުވެ ހިކުމަށް މަސައްކަތް ކުރެވޭނީ އޭރުންނެވެ.
4- ބަރުދަން ލުއި ކުރެވޭވަރުގެ ތަފާސް ހިސާބު ބަލަހައްޓާށެވެ.
ބަރުދަން ލުއި ކުރެވޭ ވަރު ފޮތެއްގައި ނުވަތަ ތިބާގެ ސްމާޓް ފޯނުގައި ނަމަވެސް "ރިކޯޑް" ކުރަމުން ގެންދާށެވެ. ބަރުދަން ލުއި ކުރެވޭ ވަރުގެ ތަފާސް ހިސާބު ބަލަހައްޓާށެވެ. އަދި އެ ހަފްތާއެއްގައި ކާ އެއްޗެެހި ވެސް ނޯޓްކޮށް އެއެއްޗެހީގެ ރިކޯޑެއްވެސް ބަލަހައްޓާށެވެ. އޭރުން ދެހަފްތާއެއްގެ ރިކޯޑް އަޅާކިޔާލުމުން، ތިބާ ކާންވީ ކޯއްޗެއްކަން އަދި ނުކާންވީ ކޯޗެއްކަން ތިބާއަށް އެނގިގެން ދާނެއެވެ. އަދި މިގޮތަށް ރިކޯޑްތައް ބެލެހެއްޓުމުން ދެން އަޒުމު ކަނޑައަޅަންވީ ކޮންކޮން ކަންކަމަކަށް ކަންވެސް އެނގިގެން ދާނެއެވެ.
5- ބަރުދަން ލުއި ކުރުމުގައި ލިބޭ ކާމިޔާބީތައް ފާހަގަ ކުރާށެވެ.
ބަރުދަން ލުއި ކުރުމަކީ އެއްވެސް ހާލެއްގައި ފަސޭހަ މަސައްކަތެއް ނޫނެވެ. އެއީ ވަރަށް ބުރަ މަސައްކަތެކެވެ. އެގޮތުން ކެއުމަށް ބަދަލު ގެނެސް ކަސްރަތުކޮށް އަދި ކިތައްމެ ކާހިތްވާ އެއްޗެއް ނަމަވެސް ނުކައި ހުންނަން ޖެހެއެވެ. އެހެންކަމުން، ބަރުދަން ލުއި ކުރެވުމުން އެކަން ފާހަގަކޮށް އުފާ ފާޅު ކުރަން ޖެހެއެވެ. އޭގެ ސަބަބުން ތިބާގެ އަމިއްލަ ނަފްސަށް ބަރުދަން ލުއި ކުރުމަށް އަދި ތިބާގެ ލަނޑުދަނޑިތައް ހާސިލު ކުރުމަށް ހިތްވަރު ލިބިގެން ދާނެއެވެ.
ބަރުދަން ލުއި ކުރުމަށް ތިމާއަށް ހިތްވަރު ލިބޭހާ ހިނދަކު ތިބާއަށް ބަރުދަން ލުއި ކުރުމަށް މަސައްކަތް ކުރެވޭނެއެވެ. އެެހެންކަމުން ބަރުދަން ލުއިކުރުމަށް އަމިއްލަ ނަފްސަށް ހިތްވަރު ލިބޭ މި 5 ކަންތައް އަބަދުވެސް ކުރުމަށް ހަނދާނުގައި ބަހައްޓައްޗެވެ.
