އެމްޑީޕީގެ ބާރު ކަނޑުވާލުމުގައި ވައްޑޭގެ ހިއްސާ ބޮޑުކަމަށް ވިދާޅުވެ ފައްޔާޒް ފާޑުކިޔުންތަކެއް އަމާޒުކުރައްވައިފި
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ބާރު ކަނޑުވާލުމުގައި މުޙައްމަދު ވަހީދު (ވައްޑޭ)ގެ ހިއްސާ ބޮޑުކަމަށް ވިދާޅުވެ، އެ ޕާޓީގެ ކުރީގެ ޗެއަރޕަރސަން ފައްޔާޒް އިސްމާޢީލުގެ ފާޑުކިޔުންތަކެއް އަމާޒުކުރައްވައިފިއެވެ.
ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓަކާ ގުޅިގެން އުފެދެމުންދާ ހިޔާލުތަފާތުވުންތަކެއްގެ ތެރެއިން މި މައްސަލަ ފެންމަތިވެފައި ވަނީ، ނިމިދިޔަ އެމްޑީޕީގެ ސަރުކާރުގައި ކޯލިޝަން ބައިވެރިންނަށް މާގިނަ ފުރުސަތުތަކެއް ދީފައިވާކަމަށް ތުހުމަތުކުރައްވައި، ޕާޓީއަށް ގެއްލުންވީ އެހެންވެކަމަށް ދޭހަވާ މޭރުމަކުން ވައްޑޭ ޝުއޫރު ފާޅުކުރެއްވުމާ ގުޅިގެންނެވެ. އޭނާ މި ޕޯސްޓު ފަހުން އިންޓަނެޓުން ނެގި ނަމަވެސް، ފައްޔާޒް ވަނީ އެކަމަށް ވަރަށް ހޫނުކޮށް ރައްދުދެއްވާފައެވެ.
ފައްޔާޒްގެ ރައްދުގައި ސާފު އިބާރާތުން ވިދާޅުވެފައިވަނީ، ޕާޓީގެ ބިންގާ ގުޑުވާލުމުގައި އެންމެ އިސްކޮށް ހަރަކާތްތެރިވި އެއް ފަރާތަކީ ޚުދު ވައްޑޭ ކަމަށެވެ. މީގެ އިތުރުން ފައްޔާޒް ކުރެއްވި އެހެން ޕޯސްޓެއްގައި، މާޒީގައި ހިނގާފައިވާ ކަންކަމާ ގުޅިގެން ބަދަލުހިފުމުގެ ރޫހެއް ގެންގުޅުމަކީ ޕާޓީއަށް އެއްވެސް ފައިދާއެއް ކުރާނެ ކަމެއް ނޫންކަން ފާހަގަކުރެއްވިއެވެ. އޭނާ އިލްތިމާސްކުރެއްވީ ޕާޓީއަށް ލިބިފައިވާ ގެއްލުންތަކުގެ މަތިން ހަނދާން ހުރި ނަމަވެސް، ކުރިއަށް އޮތް ތަނުގައި ގައުމުގެ މަސްލަހަތު އިސްކޮށް، އެންމެން ގުޅިގެން މަސައްކަތްކުރުމަށެވެ.
ފާހަގަކޮށްލެވޭ ގޮތުގައި ފައްޔާޒް އާއި ވައްޑޭ އަކީ މިވަގުތު ކުރީގެ ރައީސް މުޙައްމަދު ނަޝީދުގެ ސިޔާސީ ހަރަކާތްތަކުގައި އެންމެ އިސްކޮށް އުޅުއްވާ ދެ ބޭފުޅުންނެވެ. ނަމަވެސް، މި ފަދަ ބަހުގެ ހަމަލާތަކެއް ބަދަލުކުރެވިގެން ދިޔުމުން، ޕާޓީގެ އެތެރޭގައި އަދިވެސް ނުތަނަވަސްކަން އޮތް މިންވަރު ހާމަވެގެންދެއެވެ. 2023ވަނަ އަހަރުގެ ރިޔާސީ އިންތިޚާބުން އެމްޑީޕީއަށް ނާކާމިޔާބީއާ ކުރިމަތިލާންޖެހުނު އެންމެ ބޮޑު އެއް ސަބަބަކީވެސް ރައީސް ނަޝީދަށް ތާއީދުކުރައްވާ މެންބަރުން ޕާޓީ ދޫކުރައްވައި 'ދަ ޑިމޮކްރެޓްސް' ގެ ނަމުގައި އައު ޕާޓީއެއް އުފެއްދެވުން ކަމަށް ގިނަ ބަޔަކު ގަބޫލުކުރެއެވެ.
ޑިމޮކްރެޓްސް އުފެއްދެވުމުގައި އިސްކޮށް އުޅުއްވުމަށްފަހު، ވައްޑޭ ހިމެނޭހެން ގިނަ ބޭފުޅުންތަކެއް އަލުން އަނބުރާ އެމްޑީޕީއާ ގުޅިވަޑައިގަތީ ނިމިދިޔަ އަހަރުގެ ފަހުކޮޅުގައެވެ. އޭގެ ފަހުން ރައީސް ނަޝީދުގެ ފެކްޝަނުން އެމްޑީޕީގެ ކޮންޓްރޯލް ހޯދުމަށް ގިނަ މަސައްކަތްތަކެއް ކުރަމުންދާ މި ދަނޑިވަޅުގައި، އެ ފެކްޝަންގެ އެތެރޭގައި އުފެދިފައިވާ މި ޚިޔާލުތަފާތުވުންތަކަކީ ސިޔާސީ މަސްރަހު ދިރާސާކުރާ ފަރާތްތަކުގެ ސަމާލުކަން ލިބިފައިވާ ކަމެކެވެ.
