މެޗުގެ ނިސްބަތުން ދުނިޔޭގެ ލަނޑު ލިސްޓުގެ ދެ ވަނައިގައި ދަގަނޑޭ
މެސީ އާއި ރޮނާލްޑޯ ފަހަތަށް ޖައްސާލައި، ކުޅުނު މެޗުގެ ނިސްބަތުން، ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިންގެ ލިސްޓުގެ ދެވަނައަށް ރާއްޖޭގެ ގައުމީ ފުޓްބޯޅަ ޓީމުގެ ކުރީގެ ކެޕްޓަން އަލީ އަޝްފާގު (ދަގަނޑޭ) ހިމެނިއްޖެއެވެ.
އިނގިރޭސިވިލާތަށް ނިސްބަތްވާ ނޫހެއް ކަމަށްވާ "ގިވްމީސްޕޯޓްސް" ވެބްސައިޓުން އާއްމުކުރި ޤައުމީ ޓީމަށް ލަނޑުޖެހި އެންމެ މޮޅު 10 ކުޅުންތެރިންގެ ލިސްޓަށް ބަލާއިރު ދަގަނޑޭ ލިސްޓުގެ ދެ ވަނައިގައި އޮތީ 80 މެޗުން 53 ގޯލް ޖަހައި މެޗަކަށް 0.66 ގޯލުގެ ނިސްބަތުންނެވެ.
މި ލިސްޓުގެ އެއްވަނައިގައި އޮތީ 83 މެޗުން 63 ގޯލް ޖަހައި މެޗަކަށް 0.76 ގޯލުގެ ނިސްބަތުން ޔޫއޭއީގެ އަލީ މަބްޚޫތެވެ.
ދަގަނޑޭގެ ފަހަތުން ތިންވަނައިގައި އިންޑިއާގެ ކެޕްޓަން ސުނިލް ޗެތުރީ އޮތް އިރު، ހަތަރު ވަނައިގައި އޮތީ ޕޯޗުގަލްގެ ކްރިސްޓިއާނޯ ރޮނާލްޑޯއެވެ. މަޝްހޫރު ލިއޮނަލް މެސީ އޮތީ މި ލިސްޓުގެ 10 ވަނައިގަ އެވެ.
އުމުރުން 35 އަހަރުގެ ދަގަނޑޭއަކީ ރާއްޖޭގައި މިހާތަނަށް އުފެދުނު އެންމެ މޮޅު ފުޓުބޯޅަ ކުޅުންތެރިޔާއެވެ. ދަގަނޑޭ އަކީ ސާފް ޗެމްޕިއަންޝިޕުގައި އެންމެ ގިނަ ގޯލުޖެހި ކުޅުންތެރިޔާ ވެސް މެއެވެ.
Ads by STO
