މެންބަރު އިކުރާމް ހަމަލާދިން ކަމަށް ބުނާ މައްސަލަ މަޖިލީހުން ބަލައިދޭން އެދިއްޖެ
ކޮވިޑް-19 އަށް ސާމްޕަލް ނެގި ސިއްޙީ ޚިދުމަތްތެރިޔާއަށް ދިއްގަރު ދާއިރާގެ މެންބަރު އިކުރާމް ހަސަން ހަމަލާދިން މައްސަލަ ރައްޔިތުންގެ މަޖިލީހުގެ އިމްތިޔާޒު އަދި ސުލޫކީ ކޮމިޓީން ބަލައިދިނުމަށް މޯލްޑިވްސް ހެލްތު ޕްރޮފެޝަނަލް ޔޫނިއަނުން މިއަދު ހުށަހަޅައިފި އެވެ.
މިދިޔަ ހުކުރު ދުވަހުގެ ރޭ މާފަންނު މަދަރުސާގައި، ކޮވިޑަށް ޓެސްޓު ކުރުމަށް ސާމްޕަލް ނެގި މީހަކަށް އިކުރާމް ހަމަލާދިން ކަމަށްބުނާ މައްސަލައެއް ވަނީ ފެންމަތި ވެފައެވެ. މިކަމާއި ގުޅިގެން ގިނަ ބައެއްގެ ފާޑުކިޔުން އިކުރާމަށް ވަނީ އަމާޒުވެފައެވެ.
މިމައްސަލަ މިހާރު ފުލުހުން ވެސް ބަލަމުން އަންނައިރު، މާރާމާރީއެއް ނުހިންގާ ކަމަށް މެންބަރު އިކުރާމް ވަނީ އެރޭ މީސްމީޑިއާ މެދުވެރިކޮށް ވިދާޅުވެފައެވެ.
ހެލްތު ޕްރޮފެޝަނަލް ޔޫނިއަން އިން މިކަމާއި ގުޅިގެން ނެރުނު ބަޔާނެއްގައި ބުނެފައިވަނީ އިކްރާމް ދެ ފަހަރެއްގެ މަތިން އަތް އިސްކޮށް، އަނިޔާކުރާ ނަމަ ޖެހުމުގެ ހައްގު އޮންނާނެ ކަމާއި ތަކުރާރުކޮށް ޖަހާނެ ކަމަށް ވިދާޅުވެފައިވާ ކަމަށެވެ. އަދި އޭނާއަކީ މަޖިލީހުގެ މެމްބަރެއް ކަމަށާއި އެގޮތަށް އަނިޔާ ނުކުރެވޭނެ ކަމަށް ވިދާޅުވެފައިވާ ކަމަށް ވެސް ބުނެފައިވެއެވެ.
މީގެއިތުރުން ފުލުހުންނަށް މައްސަލަ ހުށަހަޅާނެ ކަމަށް ވިދާޅުވެ އިކްރާމް ބިރު ދެއްކި ކަމަށް ވެސް ބުނެފައިވެއެވެ.
