މަރުވިމީހާގެ ހާދިސާގެ ތަހުގީގަށް އާއްމުންގެ ފަރާތުން މައުލޫމާތު ހޯދަނީ
އައިޖީއެމްއެޗް ސަރަޙައްދު މޫދު އަޑިން މަރުވެފައި އޮއްވާ އިއްޔެ ފެނުނު މީހާގެ މަރުގެ ހާދިސާގެ ތަހުގީގަށް، އާއްމުންގެ ފަރާތުން މައުލޫމާތު ދިނުމަށް ފުލުހުން އެދިއްޖެއެވެ.
މިކަމާއި ގުޅޭގޮތުން ފުލުހުން މިއަދު ނެރުނު ބަޔާނެއްގައި ބުނެފައިވަނީ، އައިޖީއެމްއެޗް ސަރަޙައްދު މޫދު އަޑިން މަރުވެފައި އޮއްވާ ފެނުނު މީހާގެ މަރުގެ ހާދިސާއާ ގުޅިގެން ފުލުހުން ކުރިއަށް ގެންދާ ތަހުގީގަށް އާއްމުންގެ ފަރާތުން މައުލޫމާތު ބޭނުންވާ ކަމަށެވެ.
އެގޮތުން މިއޮކްޓޯބަރު މަހުގެ 22 ވީ ބުރާސްފަތި ދުވަހުގެ ހެނދުނު 9:00 އާއި 12:00 އާއި ދެމެދު ރަސްފަންނު ސަރަޙައްދުގައި ހަރަކާތްތެރިވެފައިވާ ފަރާތްތަކާއި، މަރުގެ މިހާދިސާއާއި ގުޅޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ އެފަރާތަކާއި ވާހަކަ ދައްކާ މައުލޫމާތު އޮޅުން ފިލުވަން ބޭނުންވާ ކަމަށް ފުލުހުންގެ ބަޔާނުގައި ވެއެވެ.
ވީމާ އެގަޑީގައި ރަސްފަންނު ސަރަޙައްދުގައި ހަރަކާތްތެރި ވެފައިވާ ފަރާތްތަކުން، ނުވަތަ މަރުގެ މިހާދިސާއާއި ގުޅޭ އެއްވެސް ލިބިލައްވާފައިވާ ފަރާތެއްވާނަމަ ފުލުހުންގެ އެމަޖެންސީ ނަންބަރު 119 އަށް ނުވަތަ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުގެ 9911099 ފޯނަށް ގުޅުމަށް ވެސް ފުލުހުން އެދިފައިވެއެވެ.
އައިޖީއެމްއެޗް ކައިރި މޫދުން މީހަކު މަރުވެފައި އޮއްވާ އިއްޔެ ހެނދުނު ފެނުނުއިރު، އޭނާ ވަނީ "މަރާލާފަ" ކަމަށް ވެސް އަޑު ފެތުރިފައިވެއެވެ.
މިހާދިސާގައި މަރުވެފައި ވަނީ އުމުރުން 31 އަހަރުގެ ފިރިހެނެކެވެ.
Ads by STO
