ކޮވިޑް-19: ފްލޫ ކްލިނިކްތަކުން ފައްސިވާ މީހުން އިތުރުވެ، ނުރައްކާ ބޮޑު ވަނީ
ފްލޫ ކްލިނިކްތަކުން ކޮވިޑް-19 އަށް ފައްސިވާ މިންވަރު އިތުރުވެފައިވާ ކަމަށާއި މިއީ ކަންބޮޑުވާން ޖެހޭ ކަމެއް ކަމަށް ހެލްތް އެމަޖެންސީ އޮޕަރޭޝަންގެ ތަރުޖަމާނު ޑރ. ނަޒްލާ ރަފީގް ވިދާޅުވެއްޖެއެވެ.
އެ ސެންޓަރުގައި ރޭ ބޭއްވި ނޫސްވެރިންގެ ބައްދަލުވުމުގައި ނަޒްލާ ވިދާޅުވި މިދިޔަ ހަފްތާއާ އަޅާބަލާއިރު، މި ހަފްތާގައި ފްލޫ ކްލިނިކްތަކުން ބައްޔަށް ފައްސިވި މީހުންގެ އަދަދުތައް އިތުރުވެފައިވާ ކަމަށާއި މިއީ ކަންބޮޑުވާން ޖެހޭ ފަދަ ޓްރެންޑެއް ކަމަށެވެ.
"މި ނިމުނު ހަފްތާގައި ޖުމްލަ ފްލޫ ކްލިނިކް ޕޮޒިޓިވިޓީ މިވަނީ 9 ޕަސެންޓަށް އަރާފައި އަނެއްކާވެސް. މިއީ ލެވަލް ވަން. ލެވަލް ވަންގައި ހުރިކަމަށް ވީނަމަވެސް ހަމަ ލެވަލް ޓޫ އާއި ވަރަށް ކައިރީގައި މި އުޅެނީ. އަޅުގަނޑުމެން މި ބަލާ ހުރިހާ އިންޑިކޭޓާސްތަކުގެ ތެރެއިން ކޭސްތައް އިތުރުވަމުންދާނަމަ ނުވަތަ ޙާލަތު އިތުރަށް ގޯސްވަމުންދާނަމަ އެންމެ ފުރަތަމަ މައްޗަށްދާނެ އިންޑިކޭޓަރއަކީ މިއީ ކަމަށް އަޅުގަނޑުމެންނަށް ބެލެވެނީ." ނަޒްލާ ވިދާޅުވިއެވެ.
ޑރ. ނަޒްލާ އިތުރަށް ވިދާޅުވީ ފްލޫ ކްލިނިކްތަކުން ފައްސިވާ މީހުންގެ އަދަދު އިތުރުވަމުން އަންނަ ނަމަ ރައްކާތެރިކަމުގެ ފިޔަވަޅުތަކަށް އިތުރަށް ސަމާލުކަން ދޭން ޖެހޭ ކަމަށެވެ.
ކޮވިޑް-19 ގެ މިހާރުގެ ހާލަތަށް ބަލައި، ބައެއް ލުއިތައް ދެވުނު ނަމަވެސް ރައްކާތެރިކަމުގެ ފިޔަވަޅުތައް އެންމެ އެކަށީގެންވާގޮތުގައި ނޭޅުމުގެ ސަބަބުން ބޮޑެތި ކްލަސްޓަރތައް ފެންނަމުންދާ މިންވަރުވެސް އިތުރުވެފައިކަން ފާހަގަކޮށް ނަޒްލާ ވިދާޅުވީ އަދި ވެސް އެންމެ ގިނަ ކްލަސްޓާތައް އުޅެނީ މަސައްކަތުގެ މާހައުލުގައި ކަމަށެވެ.
ހާލަތަށް ދީފައިވާ ލުއިތަކާއެކު ވެސް ރައްކާތެރިކަމުގެ ފިޔަވަޅުތަކަށް ހުރިހާ ފަރާތްތަކަކުން ވެސް ބޯލެނބުން މުހިންމުކަން ޑރ. ނަޒްލާ ފާހަގަ ކުރެއްވިއެވެ.
Ads by STO
