ބައިވެރިއަކު އިޚްތިޔާރު ކުރުމުގައި އެންމެ ބަލަނީ ކޮންކަންތައްތަކަކަށް؟
ގިނަ މީހުން ޤަބޫލުކުރާ ގޮތުގައި "ރަނގަޅު" ބައިވެރިޔަކު ހޯދުމަކީ މިޒަމާނުގައި ވަރަށް ވެސް އުނދަގޫ ކަމެކެވެ. ކަނޑުން އިތާމުތް ހޯދުން ވެސް އެއަށްވުރެ ފަސޭހަ ވާނެ ކަމަށް ޤަބޫލު ކުރާ މީހުން މަދެއް ނޫނެވެ.
މިހެން ވަނީ ސަބަބު ތަކަކާ ނުލައެއް ނޫނެވެ. ދިރިއުޅުމުގައި އަދި ވަކިން ޚާއްސަކޮށް "ލޯބީގައި" ތިމާއާ ދިމާވާ ބައެއްގެ ސަބަބުންނާއި ކުރިމަތިވާ ކަންތައްތަކެއްގެ ސަބަބުން މީހުންނަށް އިތުބާރު ކުރުމާއި މީހުން ދައްކާހާ ވާހަކައެއް ފަސޭހައިން ޤަބޫލު ކުރުން ވަނީ އުނދަގޫ ކަމަކަށް ވެފައެވެ.
ނަމަވެސް ހަގީގަތަކީ ދިރިއުޅުމުގައި ކިތަންމެ ދޯކާއެއް ލިބިފައިވީ ނަމަވެސް، ރަނގަޅު ބައިވެރިއެއް ލިބެން އެންމެން ވެސް ބޭނުންވާ ކަމެވެ.
"ރަނގަޅު" ބައިވެރިއަކު ހޯދުން ގިނަ މީހުން މާނަ ކުރަނީ ތިމާ ހިތް އެދޭފަދަ ސިފަތަކެއް ވެސް ލިބިގެންވާ ބަޔަކަށެވެ. ކިތަންމެ ވަރަކަށް ދެކޮޅު ހެދިކަމުގައި ވިޔަސް، އެލިސްޓުގައި މީހުން ހުންނަ ސިފަ ވެސް ގިނަ ފަހަރަށް ހިމެނެއެވެ. ތިމަންނާމެން ސިފައަކަށް ނުބަލަމޭ ބުނި ކަމުގައި ވިޔަސް ގިނަ މީހުންނަށް އެހެންމީހުންގެ އެންމެ ފުރަތަމަ ވެސް އަޅައިގަންނަނީ އެމީހުންގެ ސިފައަށެވެ.
ބައިވެރިއަކު ހޯދުމުގައި ގިނަ މީހުން ބަލާ ކަންތައްތަކެއް ވެއެވެ. އޭގެ ތެރޭގައި އެމީހަކީ ތިމާއަށް އޯގާތެރި މީހެއްތޯ އާއި، ތެދުވެރި މީހެއްތޯ ވެސް ބަލައެވެ. އަދި އެމީހަކީ ތިމާއަށާއި އެހެން މީހުންނަށް އިޙްތިރާމު ކުރަން ދަންނަ މީހަކަށް ވުމަކީ ވެސް ނުހަނު މުހިންމު ކަމެކެވެ.
މަޖާ މިޒާޖެއް ހުރުމަކީ ގިނަ މީހުންނަށް އެހެން މީހުންގެ ފަރާތުން ފެންނަ ވަރަށް ކަމުދާ އަދި އެހާމެ އަޅައިގަންނަ ސިފައެކެވެ. ނަމަވެސް ސީރިއަސް ވާންޖެހޭ ވަގުތުތަކުގައި ވެސް މަޖާވުމަކީ ހަމަ އެހާ ފަސޭހައިން އެމީހަކާމެދު ފޫހި ވެސް ކޮށްލުވާ ކަމެކެވެ. އެހެންކަމުން މިސިފައަކީ ވަރަށް ވިސްނައިގެން ބެލެންސް ކޮށްގެން ގެންގުޅެންޖެހޭ ސިފައެކެވެ.
މީގެއިތުރުން އަންހެން ކުދިންނަށް ފިރިހެނުންގެ ކިބައިގައި ވަރަށް އަޅައިގަންނަ އެހެންކަމެއް ވެއެވެ. އެއީ އެމީހުންގެ ގައިން މީރުވަސް ދުވުމެވެ. ގިނަ އަންހެނުން، ފިރިހެނުންގެ ސާފުތާހިރުކަމަށް އެންމެ ފުރަތަމަ ވެސް ޕޮއިންޓު ދެނީ އެމީހުންގެ ގައިން ދުވާ މީރު ވަހަށް ބަލާފައެވެ. އަދި އެއަށްފަހު އެމީހުން ހެދުން އެޅުމުގެ ގޮތާއި (ޑްރެސިންގ ސެންސް ހުންނަ ގޮތް) ދެން ހުންނަ އަޚްލާޤީ ސިފަތައް ފާހަގަވާން ފަށައެވެ.
މިކަންތައްތަކުގެ އިތުރުން އެމީހަކު އަދާކުރާ ވަޒީފާއަކާއި، ނުވަތަ ވަޒީފާއެއް އަދާކުރުމުގައި ވިސްނުން ހުންނަ ގޮތާއި ދިރިއުޅުމާމެދު ދެކޭ ހަރުދަނާ ގޮތްތަަކަށް ވެސް ބަލާ މީހުން މަދެއް ނޫނެވެ.
ޙަޔާތުގެ ބައިވެރިއަކު ހޯދުމުގައި މީހުން ބަލާ ކަންކަން އިންތިހާއަށް ގިނައެވެ. ތިޔަ ބޭފުޅުން އެންމެ ބަލަނީ ކޮންކަމަކަށް ހެއްޔެވެ؟
