ކުރީގެ ރައީސުން ހައްޔަރު ކުރުމުގެ ސަޤާފަތް ނިމުމަކަށް ގެނެވޭނީ ބަދަލު ހިފުން ދޫކޮށްލައިގެން: ނިހާން
ކުރީގެ ރައީސުން ހައްޔަރު ކުރުމުގެ ސަގާފަތް ނިމުމަކަށް ގެނެވޭނީ ބަދަލު ހިފުން ދޫކޮށް އެންމެން އެއްބައިވެގެން ކަމަށް ވިލިމާލޭ ދާއިރާގެ ކުރީގެ މެންބަރު އަދި ޖުމްހޫރީ ޕާޓީގެ މިހާރުގެ ކައުންސިލު މެންބަރު އަޙުމަދު ނިހާން ޙުސެއިން މަނިކު ވިދާޅުވެއްޖެއެވެ.
ނިހާން މިހެން ވިދާޅުވީ ޕީއެސްއެމް އިން ރޭގައި ގެނެސްދިން "އާސްކް ސްޕީކަރ" ޕްރޮގްރާމުގައި ރާއްޖޭގައި ރައީސްކަން ކުރައްވާ ބޭފުޅުން ހައްޔަރުކޮށް ޖަލުގައި ބަންދުކުރުން ހުއްޓުމަކަށް އަންނަން ޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވުމާ ގުޅިގެން ކުރެއްވި ޓްވީޓެއްގައެވެ.
އެގޮތުން ނިހާން ވިދާޅުވީ ރައީސް ކަން ކުރައްވާފައިވާ ބޭފުޅުން ހައްޔަރު ކުރުމަކީ ރާއްޖޭގައި އޮތް "ސަގާފީ ބަލިމަޑުކަމެއް" ކަމަށާއި އެއީ ނިމުމަކަށް އަންނަން ޖެހޭ ކަމެއް ކަމަށެވެ. އެކަން ހުއްޓުވޭނީ ބަދަލު ހިފުން ދޫކޮށް ހުރިހާ ފަރާތަކުން ގައުމީ އެއްބައިވަންތަކަން އިސްކޮށްގެން ކަމަށް ވެސް ނިހާނު ވިދާޅުވެފައިވެއެވެ.
"ތިޔައީ ޒަމާނުއްސުރެ ދިވެހިންގެ ތެރޭގައި އޮތް ސަގާފީ ބަލިމަޑުކަމެއް. ތިޔައީ ނިމުމަކަށް އަންނަން ޖެހޭ ކަމެއް. ތިޔަ އުސޫލު ހުއްޓުވޭނީ ބަދަލު ހިފުން ދޫކޮށް ހުރިހާ ފަރާތަކުން ޤައުމީ އެއްބައިވަންތަ އިސްކޮށްގެން. ހަމަ ކޮންމެހެންވެސް ޖަލަން ލާން ޖެހޭތީ އެ ގޮތަށް ޢަމަލު ކުރުމުގެ ނަތީޖާ!" ނިހާނު ވިދާޅުވެފައި ވެއެވެ.
ރޭގެ ޕްރޮގްރާމުގައި ރައީސް ނަޝީދު ވިދާޅުވީ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް ޖަލުގައި އޮންނަވަން ޖެހޭތީ އެމަނިކުފާނު މިހާރު ވެސް ހިތާމަ ކުރައްވާ ކަމަށެވެ.
