މީޑިޔާ ކައުންސިލުން ސެކްރެޓަރީ ޖެނެރަލެއް ހޯދަން އިއުލާނުކޮށްފި
މޯލްޑިވްސް މީޑިޔާ ކައުންސިލު އިދާރާގެ މަސައްކަތްތައް ހިންގުމުގައި އިސްކޮށް ހަރަކާތްތެރިވުމަށް ސެކްރެޓަރީ ޖެނެރަލްގެ މަޤާމަށް މީހަކު ހޯދުމަށް އިއުލާނު ކޮށްފިއެވެ.
ސިވިލް ސާރވިސް ކޮމިޝަނުން ވަނީ، ސެކްރެޓަރީ ޖެނެރަލްގެ މަޤާމަށް ކުރިމަތި ލައްވަން ބޭނުންފުޅުވެލައްވާ ފަރާތްތަކުން، ހުށަހަޅަންޖެހޭ ލިޔުންތަކާއެކު 20 ޑިސެންބަރު 2020 ވާ އާދިއްތަ ދުވަހުގެ މެންދުރުފަހު 14:00 ކުރިން އެ ކޮމިޝަނުގެ އިދާރާއަށް ހުށަހެޅުމަށް އެދިފައެވެ.
މި މަޤާމަކީ ކައުންސިލުގެ ސިޔާސަތާ އެއްގޮތްވާ ގޮތުގެ މަތިން ކައުންސިލުގެ އިދާރާ ހިންގުމުގެ އެންމެހައި މަސްއޫލިއްޔަތެއް އަދާކުރުމުގެ ޒިންމާ މަތިވެފައި އޮންނަ މަޤާމެވެ. އަދި މީޑިޔާ ކައުންސިލުން އަދާކުރުމަށް ޤާނޫނުގައި ކަނޑައަޅާފައިވާ އެންމެހައި މަޤުޞަދުތައް ހާޞިލު ކުރުމަށް ކައުންސިލުގެ މަސައްކަތްތައް ހިންގުމާއި ކައުންސިލުން ނިންމާ ނިންމުންތައް ތަންފީޒު ކުރުމުގެ މަސައްކަތްކުރުން ހިމެނެއެވެ.
އެ މަޤާމަށް ހޮވޭ ފަރާތަކަށް އަސާސީ މުސާރައިގެ ގޮތުގައި 20،500 ރުފިޔާ އަދި ލިވިން އެލަވެންސްގެ ގޮތުގައި 15،000 ރުފިޔާ ލިބޭނެއެވެ. ޖުމްލަ މުސާރައާއި އިނާޔަތުގެ ގޮތުގައި 35،000 ރުފިޔާ ލިބޭނެ ކަމަށް ސަރުކާރުގެ ގެޒެޓުގައި ޝާއިޢުކޮށްފައިވާ އިއުލާނުގައި ބުނެފައި ވެއެވެ.
