ކޮވިޑުގައި މަރުވާ ލަންކާ މުސްލިމުން ރާއްޖޭގައި ވަޅުލައިދޭން އެދިއްޖެ
ކޮވިޑް-19 ޖެހިގެން ލަންކާގައި މަރުވާ މުސްލިމުން ރާއްޖޭގައި ވަޅުލައި ދިނުމަށް ލަންކާ ސަރުކާރުން އެދިއްޖެއެވެ.
ލަންކާ ސަރުކާރުން މިގޮތަށް އެދިފައިމިވަނީ އެގައުމުގައި ކޮވިޑު ބަލީގައި މަރުވާ މުސްލިމުން، އެމީހުންގެ އާއިލާގެ ނުގަބޫލުގައި އަންދަމުންދާ މައްސަލަ ބޮޑުވެފައި ވަނިކޮށެވެ.
ކޮވިޑް ބަލީގައި މަރުވާ މީހުން އެންދުމަށް ލަންކާއިން ނިންމުމާ ގުޅިގެން ގިނަ ބަޔަކު އަންނަނީ އެކަމާ ނުރުހުން ފާޅުކުރަމުންނެވެ.
ލަންކާގެ މީޑިއާތަކުން ރިޕޯޓު ކޮށްފައިވާ ގޮތުގައި މި މައްސަލަ ބޮޑުވެ، ލަންކާ ސަރުކާރުން ވަނީ ކޮވިޑް ޖެހިގެން މަރުވާ މުސްލިމުން ރާއްޖޭގައި ވަޅުލައިދިނުމަށް ރަސްމީކޮށް އެދި ހުށަހަޅާފައެވެ.
އަދި ލަންކާއިން މިކަމަށް ރާއްޖެ ހިޔާރުކޮށްފައި ވަނީ ރާއްޖެއަކީ ޖަޒީރާ ގައުމަކަށްވެފައި، އެ މައްސަލަ ރާއްޖެއަށް ދިމާނުވާތީއެވެ.
ލަންކާ ސަރުކާރުން މިކަމަށް އެދި ހުށަހަޅާފައި ވަނީ ރާއްޖޭގެ ވަކި ރަށެއްގައި މީހުން ވަޅުލުމަށް ކަމަށް ވެސް ރިޕޯޓުތައް ބުނެއެވެ.
މިކަމާ ގުޅިގެން ދިވެހި ސަރުކާރުން އަދި ވަކި ގޮތެއް ނިންމައި ހާމަ ކޮށްފައެއް ނުވެއެވެ.
