"އެމްޑީއެން ގެ ތަހުގީގު ގޮސްފައިވާ މިންވަރު ހާމަކޮށްދެއްވާ!"
އެމްޑީއެން އިން އިސްލާމްދީނާއި ކީރިތި ރަސޫލާއަށް ފުރައްސާރަކޮށް ލާދީނީ ރިޕޯޓެއް ނެރުނު މައްސަލައިގެ ތަހުގީގު ގޮސްފައިވާ މިންވަރު ހާމަ ކޮށްދެއްވުމަށް އެދި ދީނީ 20 ޢިލްމުވެރިންނެއްގެ ނަމުގައި އިސްލާމިކް މިނިސްޓްރީ އަށް ސިޓީއެއް ފޮނުވައިފިއެވެ.
އިސްލާމިކް މިނިސްޓަރ ޑރ. އަޙުމަދު ޒާހިރު އަށް އެޑްރެސް ކުރައްވާ ޢިލްމުވެރިން ހުށަހެޅި ސިޓީގައި ވިދާޅުވެފައިވަނީ އެމްޑީއެން އޭ ކިޔުނު ޖަމިއްޔާއަކުން އިސްލާމްދީނާއި ދެކޮޅަށް އެކުލަވާލާފައިވާ ރިޕޯޓެއްގެ މައްސަލަ 2019 ވަނަ އަހަރު ގެ ފަހުކޮޅު ފެންމަތިވި ކަމަށެވެ.
އެއިރު އެކަން ތަހުގީގު ކުރުމަށް އިސްލާމިކް މިނިސްޓްރީން ވެސް އެމައްސަލަ ފުލުހުންނަށް ހުށަހެޅިކަން ފާހަގަ ކުރައްވަމުން، އެރިޕޯޓާއި ގުޅިގެން މުޅި ރާއްޖޭގެ އެކި ކަންކޮޅުތަކުގައި ކަންބޮޑުވުން ފާޅުވެ އިހުތިޖާޖު ވެސް ކުރުމުން ޔޫތު މިނިސްޓްރީން އެޖަމިއްޔާ އުވާލިކަން ވެސް ޢިލްމުވެރިންގެ ސިޓީގައި ވަނީ ފާހަގަ ކުރައްވާފައެވެ.
ނަމަވެސް އޭގެ ފަހުން 365 ދުވަސް (އެއް އަހަރު) ފާއިތުވެގެން ގޮސްފައިވާއިރު ވެސް، އެމްޑިއެން ގެ އެރިޕޯޓު ލިޔުނު ފަރާތްތަކާމެދު އެއްވެސް ތަހުގީގެއް ހިންގިކަމެއް ފުލުހުން ހާމަ ކޮށްފައި ނުވާކަން ވެސް އެސިޓީގައި ވަނީ ފާހަގަ ކޮށްފައެވެ. އަދި އެކަމުގެ މައުލޫމާތު ވެސް އެއްވެސް ފަރާތަކާ ހިއްސާ ކޮށްފައި ނުވާކަން ވެސް ފާހަގަ ކޮށްފައިވެއެވެ.
"މިކަމަކީ ކޮންމެ މުސްލިމު ރައްޔިތަކު ވެސް، އަދި ވަކިން ޚާއްސަކޮށް އަޅުގަނޑުމެން ދިވެހިރާއްޖޭގައި ދީނީ ވަޢުޛު ބުނުމުގެ ހުއްދަ ތިޔަ މިނިސްޓްރީން ދެއްވާފައިވާ ފަރާތްތަކުގެ ހައިސިއްޔަތުން، ނުހަނު ކަންބޮޑުވާ ކަމެކެވެ. ވީމާ މިމައްސަލައިގެ ތަހުގީގު ގޮސްފައިވާ ހިސާބެއް ފުލުހުންގެ ކިބައިން ބައްލަވާ އަޅުގަނޑުމެންނަށް ހާމަކޮށްދެއްވުމަށް އެދި ވަރަށް އިޙްތިރާމާއެކު ދަންނަވަމެވެ." 20 ޢިލްމުވެރިންގެ ފަރާތުން ފޮނުއްވި ސިޓީގައި ވިދާޅުވެފައިވެއެވެ.
Ads by STO
