ވެލިގަނޑު ރިސޯޓުގެ ކޮޓަރިއެއްގައި އަލިފާން ރޯވެއްޖެ
އއ. އަތޮޅުގައި ގާއިމު ކޮށްފައި ހުންނަ ވެލިގަނޑު ރިސޯޓުގެ ކޮޓަރިއެއްގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފްގެ ތަރުޖަމާނު މޭޖަރ އިބްރާޙިމް އާޒިމް ވިދާޅުވީ އެރިސޯޓުގައި އަލިފާނުގެ ހާދިސާއެއް ހިނގައިގެން އެމްއެންޑީއެފް ގެ ފަޔަރ އެންޑް ރެސްކިޔު ސާވިސްއިން ހަރަކާތްތެރިވާން ފަށާފައިވާ ކަމަށެވެ.
މިހާދިސާގެ ރިޕޯޓު ލިބިފައިވަނީ 14:15 ހާއިރު ކަމަށް ވެސް އެމްއެންޑީއެފް އިން މައުލޫމާތު ދެއްވާފައިވެއެވެ.
އެމްއެންޑީއެފް އިން ބުނީ އަލިފާން ރޯވެފައި ވަނީ އެރިސޯޓުގެ ގެސްޓު ރޫމެއްގައި ކަމަށެވެ. ރޯވި އަލިފާންގަނޑު އެރިސޯޓުގެ މުވައްޒަފުން ވަނީ ކޮންޓްރޯލު ކޮށްފައި ކަމަށް ވެސް އާޒިމް ވިދާޅުވިއެވެ. ސިފައިން ދަނީ އެރިސޯޓަށް ދާން ދަތުރު ކުރަމުންނެވެ.
މިހާދިސާއާ ގުޅޭ އިތުރު ތަފްސީލެއް އަދި ލިބިފައެއް ނުވެއެވެ.
އަލިފާނުގެ ހާދިސާތައް ގިނަވެފައިވާއިރު މި ޖަނަވަރީން ފަސްވަނަ ދުވަހުގެ ރޭ އޮޅުވެލި ރިސޯޓްގެ ގެސްޓް ރޫމެއްގައި އަލިފާން ރޯވެ އަނދާފައި ވެއެވެ. އަދި މިދިޔަ ޑިސެމްބަރު މަހުގެ 13 ވަނަ ދުވަހު ހއ. މަނަފަރު ރިސޯޓްގެ އިންޖީނުގޭގައި އަލިފާން ރޯވި އިރު 29 ޑިސެމްބަރުގައި ތާޖު އެގްޒޯޓިކާ ރިސޯޓްގެ އިންޖީނުގޭގައި ރޯވި އެވެ.
