ކޮންމެ ވެކްސިނެއްވެސް އޭގެ ވަގުތުގައި ޖަހައި، ފުރިހަމަ ކުރަންޖެހޭ: ޑރ. ނަޒްލާ
ބަލިތަކުން ރައްކާތެރިވުމަށްޓަކައި ކޮންމެ ވެކްސިނެއް ވެސް އޭގެ ވަގުތުގައި ޖަހާ ފުރިހަމަ ކުރުން މުހިންމު ކަމަށް ޤައުމީ ވެކްސިން ޕްރޮގްރާމުގެ ހެޑް ޑރ.ފާޠިމަތު ނަޒްލާ ރަފީޤު ވިދާޅުވެއްޖެއެވެ.
ސަރުކާރުން ރާވާފައިވާ ގައުމީ ކޮވިޑް ވެކްސިން ޕްރޮގްރާމާ ގުޅޭ ގޮތުން ވާހަކަ ދައްކަވަމުން ޑރ. ނަޒްލާ ވިދާޅުވީ ވެކްސިނުގެ ސަބަބުން ގައިންގަޔަށް އަރާ ގިނަ ބަލި ތަކެއް މިހާތަނަށް ވެސް ރާއްޖޭގައި ކޮންޓްރޯލް ކުރެވިފައިވާ ކަމަށެވެ. އަދި މީގެ ތެރެއިން ބައެއް ބަލިތައް މިހާރު ނައްތާލެވިފައިވާ ކަން ވެސް ނަޒްލާ ފާހަގަކުރެއްވިއެވެ.
"މިގޮތުން ޕޯލިޔޯ، ނިއުނެޓަލް ޓެޓްނަސް އަދި މީސަލްސްވެސް ރާއްޖޭގައި ނައްތާލެވުނު. އަދި ހޯއްގޮވާ ކެއްސުން، ކަރުފޮޅުފަދަ ބަލިތައް ވެސް ވަރަށް މަދުން ފެންނަނީ. ނަމަވެސް ވެކްސިން ޖަހާ މިންވަރު ދަށް ހިނގައްޖެއްޔާ މިބަލިތައް އިތުރަށް އައިސް ފެތުރުމުގެ ފުރުޞަތު އޮންނާނެ."
ނަޒްލާ އިތުރަށް ވިދާޅުވީ ބަލިތަކުން ކޮންޓްރޯލް ކުރުމަށްޓަކައި ކޮންމެ ވެކްސިނެއްވެސް އޭގެ ވަގުތުގައި ޖެހުން މުހިންމު ކަމަށެވެ.
އިންޑިއާއިން ހަދިޔާކުރި "ކޮމިޝީލްޑް" ވެކްސިން ރާއްޖޭގައި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން މިމަހުގެ 26 ގައި ދީފައިވާއިރު، ވެކްސިން ޖެހުމަށް ކުރަން ޖެހޭ އެންމެ ފަހުގެ މަސައްކަތްތައް އަންނަނީ ސަރުކާރުން ކުރަމުންނެވެ.
Ads by STO
