ކޮންމެ އިންތިޒާރަަކީ ކެތްތެރިކަމުގެ އިމްތިހާނެކެވެ.
އަހަރެމެން އެންމެންނަކީ ވެސް ދުނިޔޭގައި އުޅޭއިރު އެތައް ހުވަފެން ތަކެއް ދެކޭނެ ބައެއްކަން ޔަގީނެވެ. އަދި އެ ހުވަފެންތައް ހަގީގަތަކަށް ހެދުމަށްމަސައްކަތް ކުރާނެ ބައެއް ކަން ވެސް ގައިމެވެ.
ނަމަވެސް ކޮންމެ ކަމެއް ހާސިލު ކުރުމަށް ޓަކައި ކެތްތެރިކަމުގެ ސިފަ އިންތިހާއަށް ބަޭނުންވާނެކަން ޔަގީނެވެ. އެހެނީ އެއްވެސް ކަމަކީ ތިމާ ބޭނުންވަާއިރަށްވާނެ ކަންކަމެއް ނޫނެވެ.
އެގޮތުން އަހަރެމެން ލޯބިވާ ކޮންމެ މީހަކީ އަހަރެމެންނަށް ލިބޭނެ މީހެއް ނޫނެވެ. އަހަރެމެން ކިތައްމެ ލޯބިވި ކަމުގައި ވިޔަސް އެމީހަކު ލޯބި ނުވާނަމަ ކުރެވޭނެ އެއްވެސް ކަމެއް ނޯއްވެއެވެ.
ލޯބިވާ މީހަކު ހާސިލު ކުރުމަށް ޓަކައި ވެސް އެތައް މަސައްކަތެއް ކުރަން ޖެހޭ ކަމީ އަހަރެމެން އެންމެންވެސް ދެކޭ ހަގީގަތެކެވެ. އާއެކެވެ. ލޯތްބަކީ ވަރަށްފާޑެއްގެ އެއްޗެކެވެ. އެހެނީ އެއީ ތިމާ ގަސްތުގައި ވާ އެއްޗެއް ނޫނެވެ. އެއީ ތިބާއަށް ވެވޭ އެއްޗެކެވެ.
ލޯބިވާ މީހާ ހާސިލު ކުރުމަށް ޓަކައި ގިނަ ބަޔަކު ދިގު އިންތިޒާރު ތައް ކުރެއެވެ. ހަގީގަތުގައި ވެސް އެ ނޫން މީހަކު ބޭނުން ނުވާތީއެވެ.
ލޯބީގެ ކަންތައްތައް އެކަންޏެއް ނޫނެވެ. ކާމިޔާބު މީހަކަށް ވުމަށް ޓަކައިވެސް ދިގު އިންތިޒާރު ތަކެއް ކުރަން ޖެހެއެވެ. މިސާލަކަށް ވަޒީފާއެއް ހޯދުމަކީ އަޅުގަނޑުމެންގެ މި ކުޑަ މުޖުތަމައުގައި ވެސް ނުހަނު އުނދަގޫ ކަމެކެވެ.
ވަޒީފާއެއް ނުލިބިގެން ވަޒީފާއެއް ލިބޭނެ ކަމުގެ އުއްމީދުގައި ދިގު އިންތިޒާރުތަކެއް އެތައް ބަޔަކު ކުރެއެވެ.
ނަމަވެސް ޔަގީންވާ އެއްކަމެއް އެބަ އޮތެވެ. ގިނަ ފަހަރަށް ދިގު އިންތިޒާރުގެ ނަތީޖާ ފޮނި ވާނެކަމެވެ. ދިގު އިންތިޒާރަކަށް ފަހުވެސް ތިބާއަށް އުފާވެރިކަންލިބޭނެކަމެވެ. މިއީ ދުނިޔެ އަހަރެމެންނަށް ދައްކަމުން އަންނަ ހަގީގަތެވެ.
ކޮންމެ ދިގު އިންތިޒާރަކީ ކެތްތެރިކަމުގެ އިމްތިހާނެއްކަން ގައިމެވެ. ނަމަވެސް މި އިމްތިހާނުން ގިނަ ބަޔަކު ވަނީ ފެއިލް އެވެ. ފާސްވަނީ މަދު ބަޔަކުއެވެ.
ކެތްތެރިކަމުގެ ސިފައަކީ އަހަރެމެންގެ މާތްވެގެންވާ އިސްލާމް ދީނުގައި ވެސް ވަރަށް ބޮޑަށް ބާރު އަޅުއްވާފައިވާ ސިފައެކެވެ. މާތް الله ވޮޑިގެންވަނީކެތްތެރިންނާ އެކުގައި ކަމަށް ކީރިތި ޤުރުއާނުގައި އެކަލާނގެ ވަހީ ކުރައްވާފައިވެއެވެ.
