އަލުން ލޮކްޑައުންކޮށް ބޯޑަރު ބަންދުކުރުމުގެ ވިސްނުމެއް އަދި ނެތް: އަމީން
ކޮވިޑަ-19އަށް ފައްސިވާ މީހުންގެ އަދަދު އިތުރުވަމުން އައި ނަމަވެސް ލޮކްޑައުންކޮށް ބޯޑަރު ބަންދުކުރުމުގެ ވިސްނުމެއް އަދި ނެތް ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
ރާއްޖެ ޓީވީ "ފަލަ ސުރުހީ" ފްރޮގްރާމްގައި ބައިވެރިވެވަޑައިގެން ވާހަކަފުޅު ދައްކަވަމުން މިނިސްޓަރު އަމީން ވިދާޅުވީ މިހާރު އުސޫލުތައް ހަދަމުން ގެންދަނީ އަލުން ފުރަބަންދަކަށް ދާން ބޭނުން ނުވާތީ ކަމަށެވެ. ބޯޑަރުތައް ވެސް އަލުން ހުޅުވާލީ ފުރަބަންދަކަށް ދިއުމުގެ ވިސްނުން ނެތުމުން ކަމަށް މިނިސްޓަރު އަމީން ވިދާޅުވިއެވެ.
"މިވަގުތު އަމާޒެއް ނޫން ލޮކްޑައުނަކަށް ދިޔުމަކީ. އަމާޒެއް ނޫން ބޯޑަރު ބަންދުކުރުމަކީ، ވިޔަފާރިތައް ބަންދުވެފައި އޮތުމަކީ. ވިޔަފާރިތަކާއެކީގައި ބޯޑަރުތައް ވެސް ހުޅުވި މީހުންނަށް އާންމު ހާލަތަކަށް ތިބެވޭނެ ހިސާބަކަށް ދިޔުން އެއީ މައިގަނޑު އަމާޒަކީ" އަމީން ވިދާޅުވިއެވެ.
އަމީން ވިދާޅުވީ، ބަލީގެ ނުރައްކާ އަދިވެސް ފިލައިގެން ނުދާ ކަމަށާއި، ރާއްޖޭގައި ބަލި އިންތިހާއަށް އިތުރުވެގެންދާނަމަ ސިއްޙީ ފަރުވާދޭ ތަންތަނަށް ނުކަތާވަރަށް ކޭސްތައް ފެނުން އެކަށީގެންވާ ކަމަށާއި ނަމަވެސް ކޮންމެ މީހަކަށް ވެސް ފަރުދީ ޒިންމާ އަދާކުރެވިއްޖެނަމަ އިތުރު ލޮކްޑައުނަކަށް ދާން ނުޖެހޭނެ ކަމަށެވެ.
މިނިސްޓަރު ވަނީ މާސްކު އެޅުމާއި، ގައިދުރުކަން ބެހެއްޓުމާއި، ތަންތަނަށް އެއްވާ މީހުންގެ އަދަދު މަދުކުރުމާއި، ކޮންމެހެން ގެއިން ނިކުންނަން ޖެހިގެން މެނުވީ ގެއިން ނުނިކުުތުން ފަދަ ކަންކަމަކީ ބަލިން ރައްކާތެރިވުމަށް ކުރެވިދާނެ ކަންކަން ކަމަށް ވިދާޅުވެފައެވެ.
