ނަޝީދަށް ދިން ހަމަލާ ސަރުކާރުން ސީރިއަސްކޮށް ނުނެގުމުން ޓެރެރިޒަމަށް ހިތްވަރު ލިބޭ ވާހަކަތައް އިތުރުވި: އިންތި
ރައީސް މުޙައްމަދު ނަޝީދަށް އަމާޒުކޮށް ހަރުކަށި ފިކުރަށް ނިސްބަތްވާ ބަޔަކު މެއި ހަ ވަނަ ދުވަހު ދިން ހަމަލާ ސަރުކާރުން ސީރިއަސް ހަމަލާއެއްގެ ގޮތުގައި ނުނެގުމުގެ ނަތީޖާއަކަށް ވެެގެން ދިޔައީ ޓެރެރިޒަމަކަށް ހިތްވަރު ލިބޭ ވާހަކަތައް އިތުރުވެގެން ދިޔުން ކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ޓެރަރިޒަމާ ދެކޮޅަށް ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަން ގޮވައިލާ އެމްޑީޕީގެ ޤައުމީ މަޖިލީހަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހެޅުއްވި ގަރާރަށް ބަހުސް ކުރައްވަމުން އިންތި ވިދާޅުވީ، ޓެރެރިޒަމް މައްސަލައަށް އެޑްރެސް ކުރެއްވުމަށް ޓަކައި ސީރިއަސްކަން ހުރިކަން ސަރުކާރުން ދެއްކުމަކީ ވަރަށް މުހިންމު ކަމެއްގެ ކަމަށެވެ. މިގޮތުން އިންތި ވިދާޅުވީ، ނަޝީދަށް ދިން ހަމަލާގެ ސީރިއަސްކަން ނުދެއްކެވުމުގެ ސަބަބުން އެކަމުގެ ނަތީޖާ ފެންނަމުންދާ ކަމަށެވެ.
"ބޮން ގޮއްވައިލި ދުވަހު، ރައީސް ނަޝީދު އަވަހާރަކޮށްލުމަށް ހަމަލާދިން ދުވަހު ، ވަރަށް ގިނަ ފަރާތްތަކެއް ސައިލެޓް ވެގެން ދިޔަ. ޖެހިގެން އައި ދުވަހު ސަރުކާރުން އެކަން ސީރިޔަސްކޮށް ނުނަގާކަން ފެނުނީމާ ހަމަ ހެއްދެވި ނުހެއްދެވިޔަށް އަނެއްކާ ވެސް ޓެރެރިޒަމަށް ވާގިވެރިވެ، ޓެރެރިޒަމަށް ހިތްވަރު ލިބޭ ކަހަލަ ރާގުތަކަށް ފާޅުކަން ބޮޑު ގޮތެއްގައި އެކިއެކި ޕަބްލިކް ޕްލެޓްފޯމްތަކުގައި ޝުއޫރު ފާޅު ކުރަމުން އެބަދޭ." އިންތި ވިދާޅުވިއެވެ.
އިންތި ވިދާޅުވީ، މިގޮތަށް ވާހަކަފުޅު ދައްކަވާ މީހުންގެ ތެރޭގައި ވަރަށް ދަންނަ މީހުން ވެސް ފާހަގަ ކުރެވޭ ކަމަށެވެ. އަދި އެމްޑީޕީގެ ކުރީގެ ނައިބު ރައީސް އަލްހާން ފަހުމީއަށް އިޝާރާތް ކުރައްވަވާ އިންތި ވިދާޅުވީ ރައީސް ނަޝީދަށް ލިބުނު ހަމަލާއަކީ ރައީސް ނަޝީދުގެ ސަބަބުން ލިބުނު ހަމަލާއެއް ކަމަށް ބުނަމުން އަންނަ ކަމަށާއި ކަމުގެ ސީރިއަސްކަން ނަގައިލަމުން އަންނަ ކަމަށެވެ.
އިންތިގެ ވާހަކަފުޅުގައި ވިދާޅުވީ، މިއީ ޓެރެރިޒަމްގެ މައްސަލައިގައި ކުއްލި ނުރައްކަލުގެ ހާލަތު އިއުލާން ކުރަން ޖެހޭ އެންމެ އައުލާކަން ބޮޑު ވަގުތުު ކަމަށެވެ. އަދި ޓެރެރިޒަމްގެ މައްސަލަ ސީރިޔަސްކޮށް ނަގައި ފުލުހުން މިކަން ހުއްޓުވުމަށް ދޭން ޖެހޭ އެއްބާރުލުން ކުއްލި ނުރައްކަލުގެ ހާލަތުގެ ތެރެއިން ވިޔަސް ދޭން ޖެހޭ ކަަމަށް އިންތި ވިދާޅުވިއެވެ.
މިރޭ އެމްޑީޕީގެ ޤައުމީ މަޖިލީހުގައި ބައިވެރިވި 39 މެންބަރުންގެ އަޤުލަބިއްޔަތުން ވަނީ ޓެރެރިޒަމްއާ ދެކޮޅަށް ޤައުމުގައި ކުއްލި ނުރައްކަލުގެ ހާލަތު އިޢުލާން ކުރުމަށް އެމްޑީޕީގެ ފަރާތުން ސަރުކާރަށް ހުށަހެޅުމަށް ފާސްކޮށްފައެވެ.
