ބްލޮކްތަކުގެ ވެރިން އިންތިޚާބު ކުރުން އޮކްޓޫބަރ 9ގައި
މާލޭސިޓީގެ ކައުންސިލުން ރައްޔިތުންނާ ވީހާވެސް ގާތުން މަސައްކަތް ކުރުމަށް ޓަކައި ކޮންމެ ބްލޮކަކަށް ވެރިއަކު ހަމަޖެއްސުމަށް ބާއްވާ އިންތިޚާބު އަންނަ އޮކްޓޯބަރު މަހު ބާއްވާ ގޮތަށް ހަމަޖެހިއްޖެއެވެ.
މިކަން އިއުލާނުކޮށް ސިޓީ ކައުންސިލުން ވިދާޅުވީ އެ އިންތިޚާބު އޮންނާނީ އަންނަ އޮކްޓޯބަރު މަހުގެ 9ވަނަ ދުވަހާ ހަމައަށް ކަމަށާއި މި މަގާމުތަކަށް ކުރިމަތިލުމުގެ ފުރުސަތު މި އޯގަސްޓު މަހުގެ 26 ވަނަ ދުވަހާ ހަމައަށް ހުޅުވައިލައިފައިވާ ކަމަށެވެ.
މި މަގާމުތަކަށް ހޮވޭ މީހުންނަށް އެއްވެސް މުސާރައެއް ދިނުމަށް ހަމަޖެހިފައެއް ނުވެއެވެ. މި މަގާމަށް ކުރިމަތިލެވޭނީ އުމުރުން 18 އަހަރުވެފައިވާ ދިވެހީންނަށެވެ. މީގެ އިތުރުން އެއްވެސް މީހަކަށް ނުވަތަ ކުޑަކުއްޖަކަށް، ޖިންސީ ނުވަތަ ޖިސްމާނީ އަނިޔާއެއް ކުރިކަން ސާބިތުވެފައިވާ މީހަކަށް ނުވުމާއި އެ ފަދަ މައްސަލައެއްގެ ތަހުގީގުގައި ބަންދުވެފައިވާ މީހަކަށް ނުވުމުގެ އިތުރުން ތަހުގީގީ މަރުހަލާގައި ހުރި މީހަކަށް ނުވުމާއި ވައްކަން ވައްކަން، ޓެކުން، ފޭރުން، ނުވަތަ ކޮރަޕްޝަނުގެ ކުށެއް ސާބިތުވެފައި ނުވުމާ އެކު އެ މީހަކު ކުރިމަތިލާ ބްލޮކެއްގައި ދިރިއުޅޭ މީހަކަށް ވުމަކީ ވެސް މިމަގާމުތަކަށް ކުރިމަތިލާ މީހުންގެ ޝަރުތެކެވެ. އަދި ހަމަ އެހެންމެ ޖިނާއީ ކުށްތައް ފިޔަވައި އެހެން ކުށެއް ސާބިތުވެފައިވާ ނަމަ، ހުކުމް ތަންފީޒު ކުރިތާ ތިން އަހަރު ވެފައިވުމަކީ ވެސް މި މަގާމަށް ކުރިމަތިލާ މީހެއްގެ ކިބައިގައި ހުންނަން ޖެހޭ ޝަރުތެކެވެ.
އިންތިހާބު ކުރެވޭ އެއްވެސް އެހެން މަގާމެއްގައި ހުރި މީހަކަށް ނުވުމާއި މުސްތަގިއްލު މުއައްސަސާއެއްގެ ނުވަތަ ސިޔާސީ މަގާމެއްގައި ހުރި މީހަކަށް ނުވުން ވެސް ބްލޮކްގެ ވެރިނަށް ކުރިމަތިލާ މީހުންގެ ޝަރުތުގެ ގޮތުގައި ވަނީ ކަނޑައަޅައިފައެވެ.
ރައްޔިތުންނާ ގާތުން މަސައްކަތްކުރުމަށް ޓަކައި މާލެސިޓީ ކައުންސިލުން، މާލެ ސިޓީގެ ރައްޔިތުންނާ ބައްދަލުކުރުމަށް ބައްދަލުވުންތައް ވެސް ވަނީ ބާއްވަން ފަށައިފައެވެ.
