މިއީ ކުއްލި ނުރައްކަލުގެ ހާލަތެއް ނޫން، އެމްޑީޕީ މެންބަރުން ޤައުމީ މަޖިލީހުގައި ބައިވެރި ނުވީ ވެސް އެހެންވެ: ރައީސް ޞާލިޙް
މޯލްޑިވްސް ޑިމޮކްރަޓިކް ޕާޓީ، އެމްޑީޕީގެ ޤައުމީ މަޖިލީހަށް އެ ޕާޓީގެ ރައީސް މުހައްމަދު ނަޝީދު ހުށަހެޅުއްވި ކުއްލި ނުރައްކަލުގެ ހާލަތު އިއުލާންކޮށް ހަރުކަށި ފިކުރަށް ނިސްބަތްވާ މީހުން ހައްޔަރު ކުރުމަށް ސަރުކާރަށް ގޮވާލި ޤަރާރު ފާސް ކުރުމަށް ބޭއްވި ޤައުމީ މަޖިލީހުގައި މެންބަރުން ބައިވެރި ނުވީ އެ ފަދަ ހާލަތެއް އޮތް ކަމަށް މެންބަރުން ޤަބޫލު ނުކުރައްވާތީކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ރައީސް ޞާލިޙް ވިދާޅުވީ، އެމްޑީޕީގެ ޤައުމީ މަޖިލީހަކީ 140އަށް ވުރެ ގިނަ މެމްބަރުން ހިމެނޭ މަޖިލީހެއް ކަމަށާއި އެ ޤަރާރު ފާސް ކުރަން ބޭއްވި ޖަލްސާގައި ބައިވެރިވެ ވަޑައިގަތީ 39 މެންބަރުން ކަމަށެވެ. އަދި މެންބަރުން އެ ޖަލްސާގައި ބައިވެރިވެ ވަޑައިނުގަތީ، ރައީސް ނަޝީދު ހުށަހަޅުއްވާ ޤަރާރަކަށް ނޫނެކޭ ބުނަން ބޭނުން ނުވާތީ ކަމަށާއި އަދި ފަދަ ހާލަތެއް އޮތް ކަމަށް ނުދެކޭތީ ކަމަށެވެ.
"އަޅުގަނޑަށް ޤަބޫލު ކުރެއްވުނީ އެމްޑީޕީގެ ޤައުމީ މަޖިލީހުގެ ގިނަ މެންބަރުން މިކަން މި ގޮތަށް ކުރަން ބޭނުން ނުވާކަން. އެރޭގެ އެ ޖަލްސާގައި ގިނަ މެންބަރުން ބައިވެރި ނުވީ، އަޅުގަނޑަށް ޤަބޫލު ކުރެވޭ ގޮތުގައި އެއްވެސް ބޭފުޅަކު ބޭނުމެއް ނުވޭ، ރައީސް ނަޝީދު ހުށަހަޅުއްވާ އެއްޗަކަށް ފާޅުގައި ދެކޮޅަށް އެއްޗެއް ބުނާކަށް." އެހެން ނަމަވެސް މަޖިލީހުގައި ބައިވެރިވެ ވަޑައިނުގަތީ ކުއްލި ނުރައްކަލުގެ ހާލަތު އޮންނަން ޖެހޭ ކަމަށް ފެނިވަޑައިނުގަތުމުން ކަމަށްވެސް ރައީސް ޞާލިޙް ވިދާޅުވިއެވެ.
އެމްޑީޕީގެ ޤައުމީ މަޖިލީހަށް ރައީސް ނަޝީދު ހުށަހެޅުއްވި ޤަރާރު ފާސްކޮށްފައި ވަނީ ވޯޓުގައި ބައިވެރިވެ ވަޑައިގެންނެވި 39 މެމްބަރުންގެ ވޯޓުންނެވެ. އެ މަޖިލީހުގައި 142 މެންބަރަކު ތިއްބަވާއިރު، އެ މަޖިލިސް ރައީސް ޞާލިޙަށް ތާޢީދު ކުރައްވާ މެންބަރުން ބޮއިކޮޓް ކުރެއްވި ކަމަށް އޭރު އަޑު ފެތުރުނެވެ.
ޤަރާރު ހުށަހަޅުއްވަމުން އެރޭ ރައީސް ނަޝީދު ވިދާޅުވީ، އެ މަނިކުފާނަށް އަމާޒުކޮށް ދިން ޓެރަރިސްޓް ހަމަލައާ ބެހޭ ގޮތުން ފުލުހުން އާންމުކުރި މައުލޫމާތުތަކާ ގުޅިގެން ކުއްލި ނުރައްކަލުގެ ހާލަތު އިއުލާން ކުރަން ޖެހޭ ކަމަށެވެ. އަދި މިކަން ކުރަން ޖެހެނީ ފުލުހުންނަށް ޓެރަރިޒަމް ހުއްޓުވުމަށް އެކަށީގެންވާ ބާރު ދިނުމުގެ ގޮތުން ކަމަށާއި ފުލުހުންނަށް ބާރުތައް ދެވިއްޖެ ނަމަ ފުލުހުންގެ މަސައްކަތްތައް ހަރުދަނާ ވާނެކަމަށް ރައީސް ނަޝީދު ވިދާޅުވިއެވެ.
"އަޅުގަނޑަށް ފެންނަ ފެނުމުގައި ފުލުހުންނަށް މި ކަންކަމުގައި އުޅޭ މީހުންތައް ފާހަގަވާނެ. އެހެން ނަމަވެސް މިވަގުތު އެކިއެކި ސަބަބުތަކާ ހުރެ އެމީހުން ހައްޔަރު ނުވެ އެ ތިބެނީ. އަޅުގަނޑަށް ފެންނަ ފެނުމުގައި ފުލުހުންނަށް މި ޖާގަ ލިބުމުން މީހުން ހައްޔަރު ވެސް ކުރެވޭނެ އަދި ފުލުހުންނަށް މިކަމުގައި މާ ހަރުދަނާ މަސައްކަތެއް ވެސް ކުރެވޭނެ." ރައީސް ނަޝީދު ވިދާޅުވިއެވެ.
