އަމީން ދޫކޮށްލި މައްސަލަ ސުޕްރީމް ކޯޓުގައި އިސްތިއުނާފު ކުރަނީ
ނިރުބަވެރި ހަމަލައިގައި ބައިވެރިވުމުގެ ކުށުގެ ދައުވާއާއި އެފަދަ އަމަލެއް ކުރުމަށް ރޭވުމުގެ ކުށުގެ ދައުވާ އުފުލައިފައިވާ މުހައްމަދު އަމީނަށް ދައުވާކުރުމުގެ މުއްދަތުގެ ތެރޭގައި ދައުވާކޮށްފައި ނުވާތީ، ދައުވާތައް ބާތިލްކޮށް އޭނާ މިނިވަންކުރަން ހައި ކޯޓުން މިއަދު ކުރި ހުކުމް ސުޕްރީމް ކޯޓުގައި އިސްތިއުނާފު ކުރަން ޕްރޮސެކިއުޓާ ޖެނެރަލްގެ އޮފީހުން ނިންމައިފިއެވެ.
އަމީން މިނިވަން ކުރުމަށް ހައިކޯޓުން ހުކުމް ކުރީ ދައުވާ ކުރުމުގެ މުއްދަތުގެ ތެރޭގައި އަމީންގެ މައްޗަށް ދައުވާކޮށްފައި ނުވާތީ ކަމަށް ބުނެއެވެ.
އަމީންގެ މައްޗަށް ދައުވާ އުފުލައިފައި ވަނީ ޓެރަރިސްޓް ޖަމާއަތެއްގައި ބައިވެރިވުމުގެ ކުށުގެ ދައުވާއާއި، ޓެރަރިޒަމްގެ އަމަލެއް ކުރުމަށް ރޭވުމުގެ ކުށުގެ ދައުވާއެވެ.
ފުލުހުން ތުހުމަތުކޮށްފައިވާ ގޮތުގައި އަމީނަކީ އައިއެސް ޖަމާއަތާ ގުޅިގެން އަފްޣާނިސްތާނުގެ ޚުރާސާނަށް ދިވެހިން ފޮނުވި މީހެކެވެ. އަދި އޭނާއަކީ ރާއްޖޭގައި އައިއެސްގެ ލީޑަރު ކަމަށް ދައުލަތުން ކޯޓުގައި ބުނެފައި ވެސް ވެއެވެ.
އިންޓެލިޖެންސް ރިޕޯޓުތަކާއި މޯބައިލް ފޮރެންސިކް ރިޕޯޓަކާއި ކޮމްޕިއުޓާ ފޮރެންސިކް ރިޕޯޓަކާއި ޓެކްޓިކަލް އިންޓެރޮގޭޝަން ރިޕޯޓެއް އަދި ސިއްރު ލިޔުންތަކެއްގެ ގޮތުގައި އެމެރިކާގެ ކަމާބެހޭ ފަރާތްތަކެއްގެ ލިޔުންތަކަކާއި އަމީނަކީ ކާކުކަން ބަޔާންކޮށް ކައުންޓަ ޓެރަރިޒަމް ސެންޓަރުން ތައްޔާރުކޮށްފައިވާ ބްރީފެއް އަމީނާ ދެކޮޅަށް ދައުލަތުން ވަނީ ކްރިމިނަލް ކޯޓަށް ހުށަހަޅައިފައެވެ.
އެހެން ނަމަވެސް އަމީން ވަނީ މި ހުރިހާ ތުހުމަތުތަކަކަށް އިންކާރު ކޮށްފައެވެ.
އަމީނަކީ 2007ވަނަ އަހަރު ސަލްޓަން ޕާކުގައި ބޮން ގޮއްވި މައްސަލައިގައި ތުހުމަތު ކުރެވުނު މީހެކެވެ.
Ads by STO
