މެސެޖުތައް ލީކުވި މައްސަލައިގައި ހައިކޯޓުގެ އިދާރީ މުވައްޒަފުންނާ ދެކޮޅަށް ޝަކުވާ ހުށަހަޅައިފި
ވަކި މައްސަލަތަކެއް ބެއްލެވުމަށް ފަނޑިޔާރުންގެ ބެންޗު ބަދަލު ކޮށްދިނުމަށް އެދި ޤާނޫނީ ވަކީލު އަލްއުސްތާޛް އަހުމަދު ނާޒިމް ޢަބްދުއްސައްތާރު، ހައި ކޯޓުގެ ރެޖިސްޓްރާއަށް ފޮނުއްވި މެސެޖުތަކެއް ލީކު ކޮށްލި މައްސަލައިގެ ޝަކުވާ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އަށް އެ މަނިކުފާނު ހުށަހަޅައިފިއެވެ.
ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ އާއިޝަތު ރިޒުނާއަށް އެޑްރެސް ކުރައްވާ ވަކީލު ނާޒިމް ފޮނުއްވި ސިޓީއެއްގައި ވިދާޅުވެފައި ވަނީ، މި އަހަރުގެ އޮގަސްޓު މަހާއި ސެޕްޓެމްބަރު މަހުގައި ވަކީލު ނާޒިމްގެ ފޯނުން ހައިކޯޓުގެ އިދާރީ މުވައްޒަފުންނަށް ފޮނުވި ސިޓީތަކެއް ހައިކޯޓުގެ ކުރީގެ ފަނޑިޔާރު ޝުޖާއު އުސްމާން، ޓްވިޓާގައި ލީކުކޮށްފައި ވާތީ އެ މައްސަލަ ބަލައި ދިނުމަށެވެ.
ހައިކޯޓުގެ ކުރީގެ ފަނޑިޔާރު ޝުޖާއު އުސްމާން މިދިޔަ ހުކުރު ދުވަހު ކުރެއްވި ޓްވީޓެއްގައި ވިދާޅުވެފައި ވަނީ ހައިކޯޓުގައި ހުރި މައްސަލަތަކަށް ނުފޫޒު ފޯރުވާ އެއް ބޭފުޅަކީ ކުރީގެ ރައީސް މުޙައްމަދު ނަޝީދުގެ ކޮއްކޯފުޅު ނާޒިމް އަބްދުއްސައްތާރު ކަމަށެވެ. އަދި އެމަނިކުފާނު އަމުރު ކުރައްވަނީ އޭނާ ވަކާލާތުކުރާ މައްސަލަތަކަށް ބައެއް ފަނޑިޔާރުން ބެންޗުގައި ނުހިމެނުމަށް ކަމަށެވެ.
ޝުޖާއު އުސްމާން ވަނީ، ހައިކޯޓުގެ ރެޖިސްޓްރާއަށް ވަކީލު ނާޒިމް ފޮނުއްވި މެސެޖެއްގެ ސްކްރީންޝޮޓެއް ވެސް އެ ޓްވީޓާ އެކު ހިމަނައިފައެވެ. އޭގައި ވަކީލު ވަނީ މައްސަލައެއްގެ އަދާހަމަ އަހައި، އަދި އެހެން މައްސަލައެއް ބެލުމަށް ފަނޑިޔާރު ޝަހީދު ފައިސަލްއާ ހަވާލު ނުކުރުމަށް އެދިލައްވައިފައެވެ.
މިކަމާ ގުޅޭގޮތުން "ދެން"އިން ސުވާލު ކުރުމުން ވަކީލު ނާޒިމް ވިދާޅުވީ އެ މެސެޖަކީ އޭނާ ހައި ކޯޓުގެ ރެޖިސްޓްރާއަށް ފޮނުއްވި މެސެޖެއް ކަމަށާއި އެ ފަދައިން އެދިލެއްވި ކަމަށެވެ. އަދި އެގޮތަށް އެދިލެއްވީ، ހުށަހަޅާ މައްސަލަތައް އަބަދުވެސް އެއް ފަނޑިޔާރަކާ ހަވާލު ކުރާތީ ކަމަށް ވިދާޅުވިއެވެ.
Ads by STO
