ޖިއާންގެ އާއިލާއަށް ބަދަލު ދޭން ނިންމި ނިންމުން އިސްތިއުނާފް ކުރުމަށް ހައި ކޯޓަށް ހުށަހަޅައިފި
ޑަބްލިއު ކޮންސްޓްރަކްޝަންއިން ހަދަމުން ދިޔަ މ. ނަލަހިޔާ މަންޒިލްގެ ފަސްވަނަ ފަންގިފިލާއިން ސިމެންތި ބަސްތާއެއް ވެއްޓި އުމުރުން ހަ އަހަރުގެ ޖިއާން ރައުޝަން މަރުވި މައްސަލައިގައި، ބަދަލެއްގެ ގޮތުން އާއިލާއަށް 4.5 މިލިއަން ރުފިޔާ ދޭން ޑަބްލިޔު ކޮންސްޓްރަކްޝަންގެ މައްޗަށް ކުރި ހުކުމް އިސްތިއުނާފު ކުރުމަށް އެ ކުންފުނިން ހައިކޯޓަށް ހުށަހަޅައިފިއެވެ.
ބަނގްލަދޭޝަށް ނިސްބަތްވާ ޖިއާން މަރުވި މައްސަލައިގައި ބަދަލެއްގެ ގޮތުގައި އެވަރު ދޭން ހުކުމް ކޮށްފައި ވަނީ އޯގަސްޓު މަހުގެ 31 ވަނަ ދުވަހުއެވެ. ސިވިލް ކޯޓުން ކުރި ހުކުމްގައި ބުނެފައި ވަނީ، 4.5 މިލިއަން ރުފިޔާ ޑަބްލިއު ކޮންސްޓްރަކްޝަނުން ދެ މަސް ދުވަހުގެ ތެރޭގައި ދައްކާ ހަލާސް ކުރަން ޖެހޭނެ ކަމަށެވެ.
ސިވިލް ކޯޓުގެ އެ ހުކުމް ޑަބްލިއު ކޮންސްޓްރަކްޝަނުން އިސްތިއުނާފް ކުރުމަށް އެދި ހައި ކޯޓަށް ހުށަހަޅައިފައި ވަނީ މިދިޔަ މަހުގެ 16 ވަނަ ދުވަހުއެވެ.
