އެފްރިކަން ޔޫނިއަންއިން ސޫދާން ސަސްޕެންޑް ކޮށްފި
އަސްކަރީ ބަޣާވާތެއްކޮށް ވެރިކަން ވަައްޓައިލައި މިލިޓަރީ ވެރިކަމެއް ގާއިމް ކޮށްފައިވާތީ އެފްރިކަން ޔޫނިއަން (އޭޔޫ)ގެ ހުރިހާ ހަރަކާތަކުން ސޫދާން ސަސްޕެންޑްކޮށްފިއެވެ.
އެފްރިކަން ޔޫނިއަންގެ ޕޮލިޓިކަލް އެފެއާޒް ޕީސް އެންޑް ސެކިއުރިޓީން މިއަދު ވަނީ އޭޔޫއިން ސޫދާން ސަސްޕެންޑް ކޮށްފައިވާކަން ކަށަވަރުކޮށްދީފައެވެ. ރިޕޯޓްތައް ބުނާގޮތުގައި ސޫދާނުގައި މިނިވަން އިންތިހާބެއް ބާއްވައި ރައީސަކު އިންތިހާބުކޮށް އިންތިހާބީ ސަރުކާރެއް އެކުލަވައި ނުލަނީ އޭޔޫއިން ސޫދާންގެ ސަސްޕެންޝަން އުވައެއްް ނުލާނެއެވެ.
މިދިޔަ ހޯމަ ދުވަހު ސޫދާނުގެ ބޮޑުވަޒީރުކަމުގައި ހުންނެވި އަބްދުﷲ ހަމްދުކް ހައްޔަރު ކުރުމާ އެކު ސޫދާނުގެ އެތެރޭގެ ހަމަނުޖެހުންތައް ވަނީ ބޮޑުވެފައެވެ. މިއާ އެކު އެގައުމުގެ މިލިޓަރީ ޖެނެރަލް އަބްދުލްފައްތާހް އަލް ބުރުހާން ވަނީ އެގައުމުގައި ކުއްލި ނުރައްކަލުގެ ހާލަތު އިއުލާނުކޮށްފައެވެ.
އެހެން ނަމަވެސް އަންގާރަ ދުވަހު ސޫދާނުގެ މަގުތައް މައްޗަށް ގިނަ އަދަދެއްގެ ރައްޔިތުން ނުކުމެ ދަނީ ބޮޑެތި މުޒާހަރާތައްކޮށް ހަމަނުޖެހުން ހިނގަމުންނެވެ. މިގޮތުން މުޒާހަރާގެ ބައިވެރިން ދަނީ ބޮޑެތި މަގުތައް ބަންދުކޮށް ބޮޑެތި ޓަޔަރު ފަދަ ތަކެތީގައި އަލިފާން ޖަހަމުންނެވެ.
Ads by STO
