25 ބިލިއަނަށް ބަޖެޓު ކުޑަކޮށްފި ނަމަ ދައުލަތެއް ނުހިންގޭނެ: ބޮންޑެ

އަންނަ 2022 ވަނަ އަހަރަށް ލަފާކުރާ ދައުލަތުގެ ބަޖެޓު 25 ބިލިއަން ރުފިޔާއަށް ކުޑަކޮށްފި ނަމަ ދޮށީ އުމުރުގެ މީހުންނަށް ދެމުން އަންނަ ޕެންޝަން ފައިސާ ނުދެވޭނެ ކަމަށާއި ތައުލީމާއި ސިއްހީ ދާއިރާއަށް ހަރަދު ކުރާނެ ފައިސާ ވެސް ނުހުންނާނެކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެއެވެ.

Ads by Hajj Corporation

ބަޖެޓަށް ބަހުސް ކުރައްވަމުން މިއަދު އޮތް ރައްޔިތުންގެ މަޖިލީހުގެ ޖަލްސާގައި ބޮންޑެ ވަނީ ދައުލަތުގެ ބަޖެޓު 25 ބިލިއަން ރުފިޔާއަށް ކުޑަކުރިން މަޖިލީހުގެ މައިނޯރިޓީ ލީޑަރު، އޭދަފުށީ ދާއިރާގެ މެމްބަރު އަހުމަދު ސަލީމް ގޮވައިލެއްވުމުން އެއީ ވާން ނެތް ކަމެއްކަމަށް ވިދާޅުވެފައެވެ. އެގޮތުން ބޮންޑެ ވިދާޅުވީ އެ އަދަދަށް ބަޖެޓު ކުޑަކޮށްފި ނަމަ ދައުލަތުން ދޭންޖެހޭ އެތައް ހިދުމަތެއް މެދުކަނޑައިލާންޖެހޭނެ ކަމަށެވެ.

ސަރުކާރު މުވައްޒަފުންނަށް މުސާރަ ދިނުމަށާއި އެހެނިހެން ވެސް ހަރަދުތަކަށް ދައުލަތުން ހަރަދުކުރަން ހިމަނައިފައިވާ 22 ބިލިއަން ރުފިޔާ ކަނޑައިނުލެވޭނެކަމަށް ބޮންޑެ ވިދާޅުވިއެވެ. އެހެންކަމުން މިހާރު ހުށަހަޅައިފައިވާ 36.9 ބިލިއަން ރުފިޔާގެ ބަޖެޓުން ބޮޑު އަދަދެއް ކުޑަކޮށްފި ނަމަ ދައުލަތް ނުހިންގޭނެކަމަށް އޭނާ ތަކުރާރުކޮށް ވިދާޅުވިއެވެ.

"37 ބިލިއަން ރުފިޔާގެ ބަޖެޓު ބޮޑެއް ނޫން. އެހެން ނަމަވެސް މި ސިޔާސަތުތައް، ކަރަންޓުގެ ސިޔާސަތު އަދި ތައުލީމުގެ ސިޔާސަތު އެއީ އަޅުގަނޑު ދެކޭގޮތުގަ އިތުރުކޮށްލަން ޖެހޭ އަދި ބަޖެޓު ކޮމިޓީން ދިރާސާ ކުރާއިރުގަ އެކަމަށް ރިއާޔަތް ކޮށްދިނުމަށް އެދި އަޅުގަނޑު ހުށަހަޅަން" ބޮންޑެ ވިދާޅުވިއެވެ.

ކަރަންޓުގެ އަގުހެޔޮ ކުރުމަށް ދޭ 540 މިލިއަން ރުފިޔާގެ ސަބްސިޑީއާއި ކަރަންޓު އުފައްދާ ކުންފުނިތަކަށް އެސްޓީއޯއިން ވިއްކާ ތެޔޮ އަގުހެޔޮ ކުރުމަށް ކަނޑައަޅައިފައިވާ ސަބްސިޑީއަށް ބަދަލު ގެނެވިދާނެ ކަމަށް ބޮންޑެ ވިދާޅުވިއެވެ.

މިސަރުކާރުގެ ސިޔާސަތަކީ ރާއްޖެ ލާމަރުކަޒު ކުރުން ކަމަށާއި އެހެން ނަމަވެސް ކޮންމެ ފަހަރަކު ވެރިކަން ބަދަލުވާއިރު އިދިކޮޅުގައި މިހާރު އޮތް ފަރާތްތަކުން ވެރިކަމަށް ވަޑައިގެން މަރުކަޒުކުރުމުގެ މަސައްކަތް ކުރައްވާކަމަށް ބޮންޑެ ވިދާޅުވިއެވެ. ލާމަރުކަޒު ކުރުމަށް މިހާރު ބަޖެޓުގައި ހިމަނައިފައިވާ ފައިސާއަކީ ލިބޭނެ ކުރިއެރުމެއްގެ ގޮތުގައި ބޮންޑެ ސިފަކުރެއްވިއެވެ.

އިއްޔެގެ މަޖިލިސް ޖަލްސާގައި 25 މިލިއަން ރުފިޔާއަށް ބަޖެޓު ކުޑަކުރަން ސަލީމް ގޮވައިލެއްވިއިރު އޭނާ ވިދާޅުވީ ބަޖެޓު ކުޑަނުކޮށްފި ނަމަ ޑޮލަރުގެ އަގު އުފުލިދާނެ ކަމަށެވެ. އަދި ވިދާޅުވީ ދައުލަތުގެ ދަރަނި އިންތިހާއަށް އުފުލިގެން ގޮސްފައިވާއިރު މިހާރު ބޮޑު ސަމާލުކަމެއް ދޭންވީ ދަރަނި އެއްހަމައެއްގައި ހިފެހެއްޓުމުގެ ބަދަލުގައި ދަރަނި ކުޑަކުރުމަށް ކަމަށެވެ.